Монгол Улсад сүүлийн жилүүдэд мансууруулах бодис, сэтгэцэд нөлөөлөх эм, бэлдмэлийг хууль бусаар олж авах, хэрэглэх, боловсруулах, зарж борлуулах явдал жил ирэх тусам өссөн үзүүлэлттэй байна. Тэгвэл өчигдөр /2024.06.05/ орой гаднын улс орнуудаас хар тамхи, сэтгэцэд нөлөөт мансууруулах бодис оруулж ирдэг гурван бүлгийн 20 орчим этгээдийг цагдаагийн байгууллагаас илрүүлэн баривчилжээ. Хар тамхины хэргээр баривчлагдан, шалгагдаж эхлээд буй энэхүү 20 орчим этгээдүүдийн дунд урлаг соёлын болоод олны танил хүмүүс мөн тэдний хүүхдүүд байгаа гэх мэдээлэл цахим орчинд цацагдсан. Тодруулбал, реппер Wolfizm буюу Б.Гэсэр, Epoch буюу Э.Гомбосүрэн нарын хүмүүсийг хар тамхины хэргээр баривчилсан тухай мэдээллийг ЦЕГ-ын Хар тамхитай тэмцэх газраас тодруулахад, “Нэр бүхий олны танил дуучдыг зөрчлийн тухай хуулийн дагуу шалгаж байна. Албан ёсоор биеэс нь мансууруулах бодис илрээгүй. Эхний байдлаар шээсний дээжийг шинжилгээнд явуулсан гэв”.

Монгол Улсад одоогийн байдлаар мансууруулах болон сэтгэцэд нөлөөт бодисын хэрэглээ нь бүх нийтийн нөхөн үржихүйн хүрээ, бие махбодь болон сэтгэцэд бодитоор нөлөөлөхүйц нийгмийн сөрөг үзэгдлүүдийн дунд тэргүүлэх байр суурь эзлэхгүй байгаа хэдий ч олон жилийн турш мэдэгдэхүйц өөрчлөлт гараагүй ч энэ гэмт хэргийн гаралт сүүлийн жилүүдэд богино хугацаанд эрчимтэй өссөөр байна. Энэ нь геополитик, нийгэм, эдийн засгийн байдал, хөгжил, дэд бүтэц, хяналт шалгалт, эрх зүйн орчин, иргэдийн эрх зүйн мэдлэг, ухамсар, сэтгэхүй, төлөвшил, гадаад орны зарим иргэдийн сөрөг нөлөөллөөс шалтгаалж байна хэмээн мэргэжилтнүүд үзэж буй.