Роман Горилик араг яснаас өөрцгүй болжээ. Хавирга, эгэм нь цухуйж, гэдэс нь хонхойж, цонхигор арьсан дор мөр, түнхний үе нь тодорсон байна. Горилык хэт турсан нь Оросын шоронд өнгөрүүлсэн хоёр жилийн үр дүн бололтой. Тэрбээр Украины хойд хэсэгт орших Чернобылийн АЦС-ын шалган нэвтрүүлэх боомтын харуул байсан. Гэвч 2022 оны гуравдугаар сард Москва Украинд бүрэн хэмжээний халдлага үйлдсэний дараахан Оросын цэргүүд түүнийг саатуулжээ. Горилык Баасан гаригт Орос Украины 75 хоригдол солих журмын дагуу суллагдсан.

Украины эрх баригчид Горилыкын хэд хэдэн гэрэл зургийг  олон нийтэд дэлгэжээ. "Роман болон Украины бусад барьцаалагдсан хүмүүсийн байдал нь хүн төрөлхтний түүхийн хамгийн хар бараан хуудаснууд болох нацистын хорих лагерьт байсан мэт байна" гэж Украины засгийн газрын Дайны олзлогдогсдыг эмчлэх ажлыг зохицуулах штабаас гаргасан мэдэгдэлд дурджээ. Украины Үндэсний гвардын мэдээлснээо суллагдсан хоригдлууд бараг бүгдээрээ хоол тэжээлийн дутагдалд орсон, шарх, гэмтэлтэй, эмчилгээ хийлгээгүй бэртлээс үүдэлтэй архаг өвчин туссан байна.

Украины ерөнхийлөгчийн зөвлөх Михайло Подоляк Оросын шоронд байсан Украин цэргүүд “аймшигтай" байдалтай буцаж ирсэн гэжээ. Тэрбээр "Өлсгөлөнгөөр ​​тарчлаан зовоож байгаа нь аймшигтай. Зодуулж, хүчирхийлүүлсэн нь ил тод" гэсэн ба Оросыг олон улсын хүний ​​эрхийн гэрээг үл тоомсорлож байна гэж буруутгажээ. Женевийн конвенцийн зэвсэгт мөргөлдөөнийг зохицуулдаг олон улсын хууль тогтоомжийн дагуу дайнд олзлогдогсодтой хүмүүнлэг, нэр төртэй харьцах ёстой гэж тусгасан байдаг. Мөн олзлогдогсодыг өдөр бүр эрүүл чанартай хоол хүнсээр хангаж, эрүүл мэндийг нь харгалзан үзэх ёстой гэж заасан. Дайны олзлогдогсдыг эмчлэх ажлыг зохицуулах штабын мэдээлснээр Горилык нь Оросын цэргүүдэд баривчлагдаж, Беларусаар дамжин Орос руу тээвэрлэгдсэн 169 харуулын дунд байсан. Эдгээр хүмүүсийн 89 нь одоог хүртэл Оросын шоронд хоригдсон хэвээр байна. Москва тэднийг тулалдаанд олзлогдсон Оросын цэргийн албан хаагчдын оронд ашиглаж байгаа гэж мэдэгджээ.

Эх сурвалж: CNN