Хойд Солонгосын удирдагч Ким Жон Ун эрх баригч намын албан тушаалтнуудад зориулж шинэхэн баригдсан "Солонгосын Хөдөлмөрийн намын боловсон хүчин бэлтгэх төв сургууль"-иар зочилж, анхны хичээлийн явцтай танилцжээ. Тэрбээр гуравдугаар сарын 30-нд сургуулийн барилгын ажил хараахан дуусаагүй байх үед нэг удаа, баригдаж дууссаных нь дараа тавдугаар сард хоёр удаа тус тус сургуулиар зочилсон.

Солонгосын Хөдөлмөрийн намын боловсон хүчин бэлтгэх төв сургууль нь 1946 онд байгуулагдсан Төв Намын сургуулиас улбаатай. 2020 онд болсон намын улс төрийн товчооны хурлаар тус сургуулийг хүнд суртал, авлига хээл хахуульд автсан гэж шүүмжилсний дараа нэрийг нь өөрчилсөн аж. Уг сургууль нь Кимилсунизм-Кимжонилизм буюу өмнөх удирдагчдын үзэл санаанд суурилсан сургаалийг үргэлжлүүлж, эрх баригч намыг хөгжүүлэхэд хувь нэмрээ оруулна гэдэгт итгэж буйгаа Ким Жон Ун илэрхийлсэн байна.

"Улс төр, цэрэг, эдийн засаг, соёлын салбар, бүс нутгийн хөгжлийг удирдан чиглүүлэх чадвартай намын чадварлаг боловсон хүчин нь эрх баригч намын хувьд хамгийн үнэ цэнэтэй. Хувьсгал, бүтээн байгуулалт ахих тусам тэдний үүрэг чухал болж байна"гэж Ким Жон Ун хэлжээ.

Эх сурвалж: YONHAP