Дэлхийд газар нутгийн хэмжээгээрээ ч, олон улсын тавцан дахь нэр хүндээрээ ч дээгүүр орох том улсын нэг бол Хятад. Тус улс 1.4 тэрбум хүн амтай. Өргөн уудам газар нутагтай тул 14 улстай хиллэдэг бөгөөд таван цагийн бүстэй. Дотоодын нийт бүтээгдэхүүнийх нь хэмжээ 17.73 их наяд ам.доллар байна.

Хэрвээ та Хятад улсын талаар "Google"-ээс хайвал ихэвчлэн олны мэдэх үзэсгэлэнтэй, сонирхолтой газар орон, соёл гэх мэт зүйл нь гарч ирнэ. Тэгвэл доорх мэдээллээс зөвхөн Хятадад л харж болох сонирхолтой зүйлстэй танилцах боломжтой.

Дэлхийн хамгийн том Буддагийн хөшөө: Тан гүрний үед баригдсан уг аварга том Будда нь Сичуань мужид байдаг бөгөөд 71 метр өндөр.

Ногоон тосгон: Шэншань арал дээрх ногоон тосгон нь нэгэн цагт цэцэглэн хөгжиж буй загас агнуурын төв байжээ. Тосгонд 2000 гаруй загасчин амьдардаг байсан ч хоол хүнс хүргэлт, боловсрол зэрэг асуудлаас болоод хүмүүс 1990-ээд онд эндэхийг орхин явжээ.

Луут урсдаг шат: Лонгчин хавцлын эргэн тойронд үзэсгэлэнт байгалиас гадна аварга том луут урсдаг шат байдгаараа онцлог. Луут урсдаг шат нь хүмүүсийг хавцлын ёроолоос оргилд хүргэдэг бөгөөд дэлхий дээрх хамгийн том хэмжээтэй гадаах урсдаг шат юм. Энд дүүжин тээвэр, нуурын аялал зэрэг сонирхолтой зүйлс ч мөн бий.

Хуурамч брэндүүд: Хямд ажиллах хүч, нутагшуулах технологи, үйлдвэрлэлийн өндөр хурд гэсэн гурван зүйл нийлээд хуурамч брэндийн төгс давалгааг бий болгодог. Эдийн засгийн хамтын ажиллагаа, хөгжлийн байгууллагын мэдээлснээр дэлхий дээрх бүх хуурамч брэндийн дөрөвний гурвыг Хятадад үйлдвэрлэдэг аж.

Халуун чинжүү идэх тэмцээн: Хятадууд халуун ногооноос айдаггүй улс. Хунань мужид жил бүр халуун чинжүү идэх тэмцээн болдог. Энэ тэмцээний үеэр хэн хамгийн богино хугацаанд хамгийн олон чинжүү идэж чадахыг шалгаруулдаг. Тус наадам нь жил бүрийн долдугаар сард эхлээд бүтэн сар үргэлжилдэг ажээ. Оролцогч Тан Шуайхуй ердөө минут гаруйн дотор 50 чинжүү идэж байжээ.

Хамгийн аюултай авиралт: Шаньси муж дахь Хуашань нь Хятадын хамгийн алдартай уулсын нэг бөгөөд олон зуун жилийн турш жуулчдын очих дуртай газар байсаар ирсэн. Гайхамшигтай үзэмж, эгц хадан цохиогоороо алдартай Хуашань уул нь таван оргилоос бүрддэг. Тан гүрний таван мөнхийн сүм зэрэг хэд хэдэн сүм энд бий.

Чадварлаг үсчид: Хятад үсчид уран сэтгэмж сайтай. Тэд үйлчлүүлэгчдийнхээ хүсэлтээр сүрлэг луу, спортын багийн лого гэх мэт сонирхолтой загварыг сийлэхэд бэлэн байдаг. Зарим үсчин нь өөрийн гэсэн өвөрмөц аргаар үс засалтаа хийдэг. Тухайлбал, Хубэй мужийн нэгэн үсчин 70 гаруй жилийн турш халуун төмөр ашиглан үйлчлүүлэгчийнхээ үсийг тайрчээ.

Халуун усанд дурлагчид: Хятадууд халуун усанд дуртай. Ялангуяа хөдөө орон нутгаар явбал халуун сав барьсан хүмүүс цөөнгүй таарах вий. Хилээр гарахдаа ч тэд халуун усаар дүүргэсэн халуун сав авч явдаг аж.

Эзэнгүй хотууд: Жуулчдыг татдаг ч жинхэнэ оршин суугчдаа татаж чаддаггүй аймшигтай, хоосон хотууд Хятадад олон бий. Хятадад ийм эзэнгүй хот ойролцоогоор 50 байна. Кангбаши нь тэр дундаа хамгийн алдартай. Эдгээр орон сууцанд ихэвчлэн санхүүгийн шалтгаанаар эзэн олддоггүй. Ойрын 10-15 жилийн дотор эдгээр хот эзэнтэй болно гэж зарим хүн үздэг.

Эх сурвалж: INVESTING