Украинд нийлүүлж буй барууны зэвсгийг Оросын газар нутаг дээр ашиглах, эсвэл онилохгүй гэх дүрэм бий. Гэхдээ нөхцөл байдал даамжирснаар Франц, Герман улсууд уг дүрмийг зөөлрүүлэх болжээ. Ерөнхийлөгч Жо Байдены санаачилсан дүрэм цуцлагдсанаар Европын орнууд түүнийг тэргүүлэгчийн эгнээнээс хассан бололтой.

Украин дайны талбарт өндөр хүчин чадалтай зэвсэг, тухайлбал хил дамнах чадалтай Францын үйлдвэрлэсэн "Storm Shadows"-ыг ашиглах зөвшөөрлийг Эммануэль Макрон олгожээ. Түүний адил Канцлер Шольц олон улсын хуулийн дагуу Оросын газар нутгаас эхлүүлсэн дайралтаас Украин өөрийгөө хамгаалахын тулд барууны техник хэрэгслийг ашиглах эрхтэй гэж санал нэгджээ.

АНУ-ын барууны түншүүд нь дүрэм журмаа зөөлрүүлсэн тул Вашигтон ганцаардмал болжээ. АНУ-ын зэвсэг нь ахиц дэвшлийг зогсооход чухал ач холбогдолтой гэж үздэг. Ялангуяа Оросын цэргүүд Харьковын хойд хэсэгт дараагийн дайралт хийхээр цугларч байгаа энэ үед барууны зэвсэг хамгийн чухал нөлөө үзүүлнэ. Макрон Германд хийсэн төрийн айлчлалынхаа үеэр “Бид пуужин харваж байгаа цэргийн байгууламжууд, Украин руу довтолж буй цэргийн объектуудыг саармагжуулахыг зөвшөөрөх ёстой. Гэхдээ бид Орос дахь бусад бай, иргэний чадавх зэрэгт цохилт өгөхийг зөвшөөрөх ёсгүй. Өөрчлөгдсөн зүйл бол Орос улс практикт бага зэрэг дасан зохицсон явдал юм" гэв.

Мөн "Хэрэв бид ‘Та пуужин харвах цэгт хүрэх эрхгүй’ гэж Украинд хэлбэл, үнэндээ бид тэдэнд ‘Бид танд зэвсэг хүргэж байна, гэхдээ та аюул учруулж болохгүй’ гэж хэлснээс ялгаагүй. Бид өөрсдийгөө өмөөрч болохгүй. Олон улсын хуулийн дагуу Украинд үүнийг хийх бүх боломж бий. Бид үүнийг тодорхой байх ёстой. Украин өөрийгөө хамгаалж чадна" гэж Шольц нэмж тэмдэглэн, Германы зэвсгийг ОХУ-ын нутаг дэвсгэрт цохилт өгөхийн тулд хил рүү ойртуулж магадгүй гэсэн таамаг дэвшүүлэв.

Украины ерөнхийлөгч Владимир Зеленский зүүн хойд Оросын цэргүүдийг онилж чадахгүй байснаар Харьков аюулд орсон гэж мэдэгдсэн. Оросын нутаг дэвсгэр рүү онилох боломжгүй байгаа нь сүүлийн хэдэн долоо хоногийн гол сэдэв боллоо. "Бид Оросын нутаг дэвсгэрт довтлоход түншүүдийнхээ зэвсгийг ашиглахгүй байгаа нь үнэн. Тийм учраас бид үүнийг хийх зөвшөөрөл өгөөч гэж гуйж байна” гэж Зеленский Мягмар гаригт Бельгид айлчлах үеэрээ онцолжээ. Киевийн арми АНУ-аас нийлүүлсэн “HIMARS” пуужин харвагч гэх мэт барууны зэвсгийг Оросын цэргүүдийн эзлэгдсэн нутаг дэвсгэрт бүлэглэн цохиход удаа дараа ашигласан. Гэхдээ АНУ барууны зэвсгийг ашиглахгүй байх дүрэм гаргаснаар Орос Украин руу довтлоход амархан болгож өгчээ.

Эх сурвалж: The Telegraph