АНУ-ын ерөнхийлөгч асан Дональд Трамп сонгуулийн кампанит ажлын хөрөнгө босгох арга хэмжээний үеэр ОХУ, Хятадад "сануулга" өгөв. Тодруулбал, "Украинд түрэмгийлснийх нь хариуд Оросыг бөмбөгдөж, Тайваньд халдвал Хятад руу дайрч болох л байсан" гэж тэр хэлжээ. Энэ үг нь арга хэмжээнд хүрэлцэн ирсэн хүмүүсийг гайхашруулав.

Европын аюулгүй байдал, хамтын ажиллагааны байгууллага дахь Трампийн элч төлөөлөгчөөр ажилладаг байсан Жэймс Гилмор Тайваньд сэтгүүлчдэд яриа өгөхдөө "Трамп бол бусдыг тусгаарлагч биш. Тэр зүгээр л холбоотнууддаа хамгаалах хамгаалалтад илүү их ач холбогдол өгөхийг хичээж байна. Хэрвээ ерөнхийлөгч болвол тэр Тайванийг дэмжинэ. Өмнөх бүрэн эрхийнхээ хугацаанд ч тийм байсан" гэжээ.

Трамп энэ оны хоёрдугаар сард Хятадын дарга Ши Жиньпинийг магтсан. "Fox News" түүнээс "Хятадтай эхлүүлсэн худалдааны дайнаа өргөжүүлэхээр төлөвлөж байгаа юу" гэж асуухад "Дайныг сэргээх бодолгүй байна. Татварыг 60 хувиас илүү гаргах бодолтой байна. Тэгэхээр би Хятадыг сайн сайхан байгаасай гэж хүсч байгаа биз. Бас би Ши Жиньпинд их дуртай. Ерөнхийлөгчөөр ажилладаг байхад минь тэр миний маш сайн найз байлаа" гэж хариулжээ.

Харин Украины тухай Трамп сүүлийн саруудад цөөн хэдэн удаа дурдсан. Өнгөрсөн жил тэр дайныг нэг өдөр хүрэхгүй хугацаанд дуусгаж чадна гэж хэлж байв. Мөн энэ оны хоёрдугаар сард "Бид эргэн төлөгдөх найдваргүй нөхцөлд мөнгө өгнө гэж байхгүй", дөрөвдүгээр сард "Украин тэсч үлдэх эсэх нь биднээс илүү европчуудад л чухал. Гэхдээ бидний хувьд энэ чухал. Урагшаа Европ" гэж тус тус цахим сүлжээндээ бичжээ.

Түүнчлэн тэр энэ оны эхээр Европын удирдагчдад хандаж "Өөрийгөө хамгаалахад хангалттай мөнгө зарцуулдаггүй улсуудад юу хүссэнээ хий гэж Орост хэлнэ" гэж хэлжээ.

Өнгөрсөн долоо хоногт Бронкс хотод болсон жагсаалын үеэр Трамп ОХУ-ын ерөнхийлөгч Путин тэргүүтэй хэд хэдэн авторитар удирдагчийг дурдаад, "Хүссэн ч хүсээгүй ч тоглоом тэдний талд байна. Хэрвээ би дахин сонгогдвол дэлхий дахин биднийг хүндэтгэх болно" гэж хэлсэн байна.

Эх сурвалж: INDEPENDENT