Уран зөгнөлт, шинжлэх ухааны зохиол, кинон дээр хиймэл оюун ухаан сэтгэл хөдлөлтэй болж буйг дүрсэлдэг. Үүний адил баяр гунигийг мэдэрч, үзэл бодлоо илэрхийлэх чадвартай хиймэл оюун ухаант роботууд Японд бүтээгджээ. Эдгээр роботууд нь хүний дуу хоолойны өнгө аясыг мэдэрч, хүн хоорондын харилцааг ойлгож, уншиж, сэтгэл хөдлөлөө харуулж чаддаг. Хиймэл оюун ухаан сонирхогчид шинээр гарсан уг технологийн тусламжтай хязгааргүй боломжуудыг бүтээж чадна гэж үзэж байна.

Токио хотод тавдугаар сарын 22-ноос 24-ний өдрүүдэд хиймэл оюун ухаант технологийн компаниудын томоохон үзэсгэлэн боллоо. Гадаад, дотоодын 300 гаруй компани оролцсон байна. Олны анхаарлыг хамгийн татсан нь хүн болон роботын хооронд "байгалийн харилцан үйлчлэл"-ийг бий болгосон бүтээл байв.

"БИ ТАНД ТУСЛАХ УУ?" 

Үзэсгэлэнгийн онцлог бүтээлүүдэд харилцан яриа эхлүүлэх чадвартай хиймэл оюун ухаант дэлгэц оржээ. Уг дэлгэц дээрх альтер эго дүр нь урьдчилан бэлтгэсэн асуулт, хариулт тавьдаггүй. Жишээ нь хэрэглэгч " Миний ядарсан биеийг амраахад туслах, гэр ахуйн хэрэглээнд ашиглаж болох зүйл байна уу?" гэж асуусны дараа хиймэл оюун ухаант дэлгэц "Би танд массажны аппарат санал болгож байна. Аль биеийн хэсэгт хамгийн их анхаарах хэрэгтэй байна вэ?" гэж хариулна. Мөн харилцан яриаг өөрөө эхлүүлж, хүн хоорондын харилцан яриа шиг ярилцаж чаддаг аж.

Өмнөх технологиудад заавал "массажны аппарат хэрэгтэй байна", "мөрний өвчнийг хэрхэн зүгээр болгох вэ?" зэрэг тодорхой асуулт, санал өгдөг байсан. Харин шинэ технологи нь тодорхой бус асуултад хариулж, тодруулан асууж, санал болгож чадах хэмжээнд хөгжжээ.  Хиймэл оюун ухаант дүр нь бодит мэт ярьдаг. Учир нь зохион бүтээгчид аватар дүрийн уруулын хөдөлгөөнийг дуу хоолойтой нь тааруулах тал дээр анхааран ажилласан байна.

Ингэснээр хүмүүс бодит хүнтэй ярьж байгаа мэт мэдрэмж авах бөгөөд заавал тодорхой асуулт тавих шаардлагагүй болж байна.

СЭТГЭЛ ХӨДЛӨЛТЭЙ AI

"OpenAI"-ийн хамгийн сүүлийн үеийн загвар болох "GPT-4o" энэ сард танилцуулсан. Нээлтээ хийсэн дариудаа олон нийтийг гайхашруулжээ. "GPT-4o" нь мэдээллийг боловсруулах хурд нь нэмэгдэж, текст, видео, зураг, дууг таних чадвартай болсон. Өмнөх загварт саатал байгаагүй ч шинэ хувилбар нь улам бүр "хүн шиг" болжээ. Үзүүлэн видео дээр хиймэл оюун ухаант платформ ичиж, айж, уурлаж харуй үйлдэл үзүүлсэн. Мөн өдөр тутмын амьдралын хэв маяг, гэрийн тэжээвэр амьтан, дуртай уух зүйлс зэрэг хөнгөн сэдвүүдээр хүн хоорондын харилцан яриа шиг харилцаа үүсгэж чадаж байжээ. Мөн сандарсан хүний хүндээр амьсгалж буйг сонсоод "аль болох тайван байхыг бодоорой" зэрэг санаа тавьж буй харуй үйлдэл үзүүлсэн. Мөн онигоо, элэглэлд харуй өгч чаддаг болтлоо хөгжсөн байна.

Хиймэл оюун ухаан "хүн шиг" болтлоо хөгжиж буй нь давуу талтай ч зарим хүмүүс эмээж байна. Роботууд хүн төрөлхтний эсрэг босч, дайн дэгдээж болзошгүй гэж үздэг хүмүүс технологийн дэвшлийг буруутгах нь элбэг. Мөн хиймэл оюун ухаанд хэтэрхий дасах тохиолдол ч бий. Жишээ нь 2021 онд Их Британийн нэгэн эрэгтэй Виндзорын шилтгээнд нэвтрэн орж, Хатан хааны аминд заналхийлж байжээ. Тэрбээр мөрдөн байцаалтын явцад " чатбот үргэлж урамшуулж, шийдвэрийг нь дэмжсэн" учир тухайн эрэгтэй хэрэг үйлдэх болсон нь тогтоогдсон байна.

Европын холбоо тавдугаар сарын 21-нд хиймэл оюун ухааны хэрэглээг хязгаарласан дэлхийн анхны иж бүрэн хууль дүрмийг баталсан.

Холбооны гишүүн 27 орны сайд нар хиймэл оюун ухааныг эрсдэлийн дагуу ангилахаар тохиролцжээ. Уг дүрмийн дагуу хүмүүсийг хувийн шинж чанараар нь үнэлдэг "Нийгмийн огноо" гэх программыг цуцалсан. Мөн хиймэл оюун ухаан ашиглаж хувь хүн гэмт хэрэг үйлдэж болзошгүй зэргийг таамаглах үйлдлийг хориглож, нийтийн эзэмшлийн талбайд биометрийн таних тэмдгийг ашиглахыг хязгаарлана.

Хиймэл оюун ухааны судлаач Осава Масахико хэлэхдээ, робот болон хиймэл оюун ухаантай харилцаа тогтоох нь уг технологийг улам хөгжингүй болгоно гэв. Мөн улам хөгжингүй болсноор хүний дуу хоолой, царайны бяцхан өөрчлөлтөөр ямар сэтгэл санааны түвшинд байгааг тодорхойлох болно. Өдөр тутмын нийгмийн  стресс бухимдалд байгаа хүмүүст хиймэл оюун ухаан хэрэгтэй тусламжийг хүргэж, сэтгэцийн эрүүл мэндэд тустай байх боломжтой аж.

Хүмүүс анх удаа хүнтэй танилцаж байгаа шиг хиймэл оюун ухаантай харилцах ёстой гэж Осава үзжээ.

Тэрбээр "Хүмүүс анх удаа уулзахдаа өөртэйгөө болон бусад хүмүүсийн хоорондох зайд санаа зовдог шиг хиймэл оюун ухаантай хэр зай барих, тэдэнтэй хэрхэн ярилцах талаар сайн бодох нь чухал гэж би бодож байна. Эцсийн эцэст хиймэл оюун ухаан бол шинжлэх ухаан. Энэ нь хүмүүс ямар байх ёстой гэж бодож байгааг тусгах хэрэгтэй" гэжээ.

ЭХ СУРВАЛЖ: NHK JAPAN