Тэрбээр "Намайг татвар төлөхөөс зайлсхийсэн, шүүхийн нэр төрд халдсан, төрийн нууц мэдээлэл хадгалсан гэдэг эрүүгийн дөрвөн зүйл ангиар яллахаар прокурорын байгууллагаас шүүхэд шилжүүлсэн. Олон асуудлыг эргэн тодруулъя. Мөрдөн байцаах явцад маш олон эргэлзээтэй асуудал үлдсэн. Би холбогдсоноо ч ойлгохгүй байгаа нэг хэрэг байгаа. Тэр нь Эрүүгийн хуулийн 19.11 дүгээр зүйл буюу төрийн нууц мэдээллийг хадгалсан гэсэн. Төрийн нууц мэдээллийг хадгалсан хүн байгаа бол задруулсан хүн бас байх ёстой. Тэр нь Эрүүгийн хуулийн 19.12 дугаар зүйл буюу төрийн нууцыг задруулах талаар заасан байдаг. Хэн гэдэг хүн надад төрийн ямар нууцыг өгсөн бэ. Төрийн нууц нь юу юм бэ. Тэр нууц нь миний гэр, машинаас, ажлын ширээнээс илрээгүй байхад яагаад холбогдуулж шалгасан юм бэ. Энэ мэтчилэн маш олон асуудлыг тодруулж өгөөч ээ.

Ямар хэрэг дээр сэтгүүлчийг буруутгаж байгааг олон нийт мэдэх хэрэгтэй. Би шантааж хийсэн юм уу, үгүй юу. Өнгөрсөн 10 жилийн хугацаанд намайг юу хийснийг шалгасан. Бүх дансны гүйлгээ, орлого зарлага, эд хөрөнгийг маань өдөр шөнөгүй хоёр сар цагдаагийн байгууллага өргөн бүрэлдэхүүнтэй шалгасан. Надад нуугаад байх юм алга. Ямар асуудал дээр буруутгаад байна вэ. Намайг витамин зараад татвараас бултсан гэж үзэж байгаа бол ийм зүйл ангиар буруутгаж байна гэх ёстой. Би хариуцлага хүлээх ёстой бол хүлээнэ. Шалдар булдар зүйл ангиар яллавал хүлээн зөвшөөрөхгүй" гэсэн юм.