Монголын цахим спортын холбооны ерөнхий нарийн бичгийн дарга А.Амаржаргалтай ярилцлаа. Тус холбооны зүгээс Улаанбаатар хотноо 100 мянган ам.долларын шагналын сантай "CS2"-ийн "Nomadic Masters" тэмцээнийг зохион байгуулж байгаа бөгөөд өнөөдөр/2024.05.28/ эхний шатны тоглолтууд нь эхэлж байна. 

-"Nomadic Masters" гэж ямар тэмцээн бэ?

-"Nomadic Masters" бол гуравдахь удаа зохион байгуулагдаж байгаа тэмцээн. Анх 2021 онд "dota2" төрлөөр зохион байгуулагдаж байсан. Угтаа олон улсын тэмцээн зохион байгуулах зорилготой байсан хэдий ч цаг үеийн нөхцөл байдлаас шалтгаалаад бид нар чадаагүй. 2022 онд бол Степпе Аренад Тайландын "NKT"-тай баг Монголын тухайн үеийн "IHC Esports" багтай финалд шалгарч, ялсан нь Европ руу явах эрхтэй тэмцээн зохион байгуулж байсан. Харин энэ удаад бид нар 100 мянган ам.долларын шагналын сантай тэмцээн зохион байгуулж байна.

-Яагаад Номадик Мастерс гэж нэрлэв?

-Спортод өнөөдрийн байдлаар "Nomadic Games", "Nomadic Sports" гэдгийг Киргизстанууд эзэмшиж байна. Бид нар тэгвэл урьдчилаад нүүдэлчин хүмүүс учир энэ нэршлийг эзэмшихийг хүссэн. Энэ тэмцээний зорилго нь Ази, Европыг холбох, ази тамирчдыг Европт тоглох гүүр нь болох, Европын багууд Азид ирж тоглодоггүй энэ нөхцөл байдлыг л өөрчлөх зорилготой. 

-Энэ жилийн "Nomadic Masters" өнгөрсөн жилүүдийнхээс юугаараа онцлог?

-Ер нь бол маш олон онцлогууд байна. Өнгөрсөн жилүүдэд шагналын сан маш бага байсан. Гэтэл энэ жил 100 мянган ам.долларын шагналын сантай. Гадаадаас таван баг ирж байгаагийн дөрөв нь Европоос ирж байна. Ийм л онцлог тэмцээн. "ESL"-ээс гадуурх 100 мянган ам.долларын шагналын сантай тэмцээн зохион байгуулж буй 2018 оноос хойшхи анхны тохиолдол. 

-Оролцох багуудын ямар шалгуураар сонгож, урьсан бэ?

–Эхний ээлжинд бол Хятадын одоогийн номер нэг баг "Lynn Vision"-ийг урьсан. Дараа нь Европоос "OG Esports" багийг харилцаа холбоотой, сайн найзын харилцаатай байдаг учраас урьсан. Бусад багууд ч ийм хэмжээний тэмцээн болох гэж байгаа учир орох сонирхолтойгоо илэрхийлсэн. "Gaimin Gladiators" бол "MongolZ"-ийг Мэйжорт хожсон хуучны "Ecstatic" баг. "Bleed" гээд маш гоё гарч ирж байгаа баг. Мөн дотоодын шилдэг багууд байна. 

Зохион байгуулалтын талаар ярилцъя. Хаана хэзээ, хэдэн өдөр зохион байгуулагдах вэ?

-Баг тамирчид бүгдээрээ Улаанбаатарт ирчихсэн. Бүгдээрээ зураг авалтад оролцож байна. Тэмцээний эхний гурван өдөр "MESA"-ийн лан студид болно. Эхний шатны гурван өдрийн дараа нэг хоног өнжөөд зургадугаар сарын 1-2-ны өдрүүдэд Степпе Аренад үзэгчтэйгээр зохион байгуулагдах хуваарьтай байгаа. Бид нарын хувьд энэ удаад өөрсдийгөө Азийн түвшинд яаж продакшн хийж болохыг, яаж шоу хийж болохыг харуулахыг зорьж байгаа. 

-Үзэгдэдэээ ямар амлалт өгч чадах вэ?

-Та бүхэн "OG" эсвэл "Gaiming Gladiators" ч юм уу, Мэйжорт "MongolZ"-ийн тоглолтыг үзэхийг хүсвэл ямар зардал гарах билээ. Энэ бүгдийг хэмнээд Шанхайд Мэйжор үзэж байгаа мэт, "Blast"-ийн тэмцээн үзэж байгаа мэт уур амьсгал, мэдрэмжийг та бүгдэд өгнө гэдгийг нүүр бардам хэлнэ. Учир нь энд маш олон хүн ажиллаж байна. Одоогоор 150 гаруй хүн ажиллаж байна. Англи тайлбарлагчид Монголд ирсэн. Мөн хятад, франц хэл дээр тайлбартай. Олон хүний оролцоотой бүтэж байгаа учир өмнөх алдаанууд засч, ололтуудаа сайжруулаад бататгаад явж байгаа гэж итгэж байна.

–Өрсөлдөөн ямар байх вэ? Таамаг байна уу?

–Монголд зохион байгуулж байгаа гэдэг утгаараа Монгол багууд финалд гараасай. Бусдаар бол одоо тэмцээн зохион байгуулагч багийн хувьд энийг түрүүлээсэй ингээсэй гэж ерөөсөө хүсэх өөр сонирхол байхгүй. Мэдээж гоё, гоё тоглолтууд гараасай.. Бүх тоглолтууд хотууд гурван үе гараасай. Финал нь одоо таван үе гараасай л гэж тэмцээн зохион байгуулагч нарын хувьд бол хүсэж байгаа. Дээрээс нь бид нарт олон гэнэтийн бэлэгүүд байгаа. Олны танил оддын тоглолт гэж хэсэг бий. Маш сонирхолтой формат бэлдсэн. Энэ мэтчилэн төлөвлөж байгаа ажлууд байгаа. Та бүхнийг хүрэлцэн ирээд нүдээрээ хараасай гэж хүсч байна. 

-Монголын "CS2"-ийн өрсөлдөөн хэр хурдацтай хөгжиж байна вэ?

-Одоо бол "MongolZ" дэлхийн топ багуудын нэг болсон байна. Дэлхийн чансааны 12 дугаарт явж байна. Энэ тэмцээний зорилго бол дараагийн "MongolZ"-ийг гаргаж ирэх. Нэг баг дэлхийн топ арван багийн нэг байх биш. Хоёр баг дэлхийн топ 20 багт багтдаг болох л зорилготой. Одоо манай тэмцээнд "ATOX", "Chingis Warriors" багууд байна. Бэлтгэлийн хүрээнд Европ багуудтай зөндөө л тоглож байгаа. Яг тэмцээний хүрээнд Европ багуудтай тоглоогүй л явж байна. Тамирчид нь тоглож байсан ч яг багаараа тэмцээнд тоглож үзээгүй явна. "MongolZ" бол дэлхийг тойроод шилдгүүдтэй тоглож байна. Бид нар энэ боломжийг бусад багуудад олгохын тул энэ тэмцээнийг зохион байгуулж байна. Тэмцээний үр шим жил, жил хагасын дараа гараад хоёр монгол баг дэлхийн топ арван багт багтахыг үгүйсгэхгүй. Тийм л зорилготй байна. 

–Монголын зах зээл хэр том бэ?

-Монголын зах зээл 100 мянган долларын шагналын сантай, хоёр өдөр аренад тэмцээн зохион байгуулах боломжтой цаг үе дээрээ ирчихсэн байна. Бид нар яг энэ боломжийг ашиглаж байгаа. Бид нар партнерууд, коммунитидаа энэ бол зөвхөн трейлер гэдгийг хэлж байгаа. Энэ 100 мянган ам.долларын шагналын сантай тэмцээнээр бидний ажил хязгаарлагдахгүй. Цаашид ямар боломжууд байна, тэднийг эрэлхийлэх болно. "OG", "Bleed"-ээс гадна ямар хүчтэй багууд Монголд ирж болох нөхцлийг бүрдүүлнэ. 

-MESA-ийн хувьд энэ удаагийн Nomadic Masters тэмцээн хэр сорилт болж байна вэ? Эсвэл боломж гэж харж байна уу?

-Яг ний нуугүй хэлэхэд өмнө нь "Asian RMR" тэмцээнийг зохион байгуулахдаа их алдсан. Туршлагагүй, чадахгүй юмнууд зөндөө байсан. Тэр тэмцээнээс үлдсэн өв маш том туршлага болсон. Манай хүмүүс туршлагажсан. Энэ тэмцээн дээр студи түвшинд ямар ч асуудалгүй. Харин арена дээр нэг л өдөр ажиллах боломжтой. Энд хоёр км орчим дүрсний кабель татаж байгаа бол арена дээр бараг гурван км дүрсний кабель татна. Дууны кабель, лангийн кабель нь зэрэгцээ явна. Зөвхөн кабель л гэхэд 8-9 км татна. Энэ өөрөө маш том сорил. Энд байгаа студиэ нэгхэн хоногийн дотор аренад байгуулна. Үүнийгээ төлөвлөөд болно гэж итгэж байгаа.

-MESA энэ онд өөр ямар ажлуудыг төлөвлөсөн бэ?

-Намар энэ тэмцээнийхээ "Fall" тэмцээнийг хийнэ. Удахгүй гоё зарлалууд гарна. Хуваалцаж чадахгүй гоё ажлууд бий. Бидний зорьж байгаа ажил гэвэл намар 100 мянган ам.долларын шагналын сантай энэ тэмцээнийхээ дараагийн тэмцээнийг хийнэ. Гадаадаас багууд ирнэ. Энэ удаад Азийн сонгон шалгаруулалт хийгээгүй нэг багийг урьсан. Дараагийнх дээр магадгүй сонгон шалгаруулалт хийнэ. Австралиас баг авчирна. Сая дэлхийн том тэмцээн давхцаад монголчуудын дэмждэг "FlyQuest" буюу хуучны "Grayhound" баг оролцох боломжгүй байлаа. Дараагийн тэмцээн дээр харах боломжтой.

-Үзэгчдэдээ хандаж юу гэж уриалах вэ?

-Биднийг дэмжиж, тэмцээнээ ирж үзээрэй. Найзууддаа, ажлынхандаа уриалаарай. Энэ бол Монголын цахим спортод хийж буй хамгийн том хөрөнгө оруулалтын нэг. Монголчууд Копенхаген, Шанхайд болж буй тэмцээнтэй ижил хэмжээнийг тэмцээнийг хүлээн авах боломжтой үзэгчид нь, зохион байгуулагчид нь байгаа гэдгийг дэлхий дахинд харуулмаар байна. Тиймээс англи тайлбарлагчид, хятад шууд дамжуулалтын хамтран ажиллагчид, франц, португаль хэл дээр явж байна.