Хүүхдүүд 20 км зам туулж, сургуульдаа явсаар байх уу?

Нийслэлийн Сонгинохайрхан дүүргийн 32 дугаар хороонд амьдардаг хүүхдүүд 10-20 км зам туулж, сургууль, цэцэрлэгтээ очдог талаар News.mn сайт 2024 оны дөрөвдүгээр сарын 1-нд сурвалжилж байсан. Тухайн үед хотын дарга Х.Нямбаатар, Сонгинохайрхан дүүргийн Засаг дарга Н.Алтаншагай тэргүүтэй нийслэлийн удирдлагууд тус хороонд ажиллаж, шинээр тавих хоёр км авто замын ажлын тендерийг ирэх долоо хоногт багтаан зарлахаар төлөвлөж байгаагаа мэдэгдэж байв. Гэтэл хоёр сарын хугацаа өнгөрсөн хэдий ч зам тавих ажил огт урагшлаагүй гэдгийг оршин суугчдын зүгээс хэлж байна.

Хурганы сангийн аж ахуйг Эмээлт чиглэлийн авто замтай холбох ажлын тендерийг гурван жилийн өмнө зарласан байдаг. Уг тендерт “Энигма констракшн” шалгарсан бөгөөд зардал өссөн гэх шалтгаанаар замын ажлыг эхлүүлээгүй юм.

Тиймээс нийслэлийн удирдлагууд 2023 онд тендерийн гэрээг цуцална гэж мэдээлсэн ч бахь байдгаараа, шавар шавхай нь улаан тоос болжээ.

Хорооны иргэдийн хувьд нэн яаралтай шийдвэрлүүлэх асуудал нь авто зам. Улаанбаатар хотод орж ирэхийн тулд оршин суугчид Шанд-Хурган чиглэлийн автобусаар зорчдог ч хавар, болон зуны бороотой өдрүүдэд шаварт сууснаас зорчих тээврийн хэрэгсэлгүй болдог гэдгийг иргэд хэлж байв.

Оршин суугчийн тайлбарлаж байгаагаар 2.6 км авто зам тавьж, Эмээлт чиглэлийн авто замтай холбоход тээврийн хэрэгсэл шаварт суух асуудал гарахгүй. Дээрх 2.6 км авто замыг 2019 оноос эхлэн барихаар зураг төслийг гаргасан гэдэг ч шийдэгдэлгүй өнөөдрийг хүргээд байгааг учирлаж байгаа юм.

СХД-ийн 32 дугаар хорооны нийгмийн ажилтан Ч.Ганболд өмнө нь мэдээлэл өгөхдөө "Манай хороонд шинээр барьж байгаа сургуулийн барилга ашиглалтад оролгүй олон жил болж байна. Энэ жилээс санхүүжилтыг нь дахин тусгаж, барилгын ажлыг бүрэн дуусгана гэдэг мэдээлэл байгаа. Барилгын ажил нь эхлэх байх. Оршин суугчдын зүгээс хол зам туулж, сургууль цэцэрлэгийн хүүхдүүдээ зөөж байна гэж гомдол ирүүлдэг.

Хорооны нутаг дэвсгэрт 5600 гаруй иргэн амьдардаг. Эдгээрээс түр оршин суугч 1000 гаруй байдаг. Сургууль, цэцэрлэгт 100 гаруй хүүхэд энэ онд суралцаж байна.

Хорооны харьяаллын хоёр цэцэрлэгт багачууд суралцдаг бол сурагчид Баянгол дүүргийн харьяа 19 дүгээр сургуульд суралцдаг. Шинээр зам тавих "Энигма" компанийн талаар мэдээлэлгүй байна" гэдгийг хэлж байв.