Дэлхийн хамгийн залуу эрэгтэй зураачаар Гана улсын иргэн нэг нас таван сартай Эйс-Лиам Нана Сэм Анкрах хүүг албан ёсоор нэрлэж байна. Хүүгийн ээж Шантелл Куукуа Эган түүний авъяасыг дөнгөж зургаан сартайд нь олж илрүүлжээ.

Тэрбээр хүүгийнхээ тухай ярихдаа "Ямар ямар өнгө хоорондоо зохицдогийг тэр хэдийнэ мэддэг болсон. Хүүгийнхээ авъяасаар бахархаж байна. Тэр урлагийн ертөнцийг шуугиулна гэдэгт найдаж байна" гэжээ.

Гиннесийн номд амжилтаа бүртгүүлэхээр ээж, хүү хоёр таван сар хүлээсний эцэст өнгөрсөн Даваа гаригт албан ёсоор баталгаажуулж чадсан байна. Албан ёсоор амжилтаа бүртгүүлэхийн тулд үзэсгэлэн нээж, бүтээлээ борлуулах шаардлагатай байжээ. Хүүгийн бүтээлийг өнгөрсөн оны арванхоёрдугаар сараас эхлээд энэ оны нэгдүгээр сарыг хүртэл хугацаанд Гана улсын нийслэл Аккра хотын Шинжлэх ухаан, технологийн музейд дэлгэсэн юм. Хүү карьераа эхлүүлснээсээ хойш нийт 15 уран зураг заржээ. Харин үзэсгэлэнд тавигдсан 10 ширхэг бүтээлийн ес нь зарагдсан байна. Удахгүй хүүгийн уран бүтээлээр дуудлага худалдаа зохион байгуулахаар төлөвлөж байна.

"Тэр тод өнгөнд маш сонирхолтой. Түүний анхны шилдэг бүтээлийг Мөлхөлт гэж нэрлэх нь зүйтэй байх" гэж ээж нь ярьжээ.

Эйс-Лиам хүү уран зургийн ертөнцөд санамсаргүй байдлаар хөл тавьжээ. Түүний ээж мөн уран зураг зурдаг. Тэрбээр 2023 оны "Ертөнцийн мисс" тэмцээнд зориулсан уран бүтээл дээр ажиллаад завгүй байх үедээ хүүгээ сатааруулахын тулд будгаар тоглуулсан байна. Ээж нь зотон даавууг шалан дээр дэлгэж, дээр нь будаг түрхээд түүнд тоглохыг зөвшөөрснөөр энэ бүхэн анх эхэлжээ.