МАН-аас баруун бүс рүү буюу Ховд, Завхан, Говь-Алтай, Увс аймаг руу илгээх 10 нэр дэвшигчээ тодрууллаа. Эрх баригч намаас тус намын генсек Д.Амарбаясгалан, Монгол Улсын Ерөнхийлөгчийн Хөдөө аж ахуй, хөдөөгийн хөгжил хариуцсан зөвлөх З.Мэндсайхан, Эрүүл мэндийн сайд асан, дэд сайд С.Энхболд, УИХ-ын гишүүн Ц.Цэрэнпунцаг, Б.Баярсайхан, С.Бямбацогт, Ч.Хүрэлбаатар, Б.Чойжилсүрэн, Ховд аймгийн Засаг дарга Э.Болормаа, Татварын ерөнхий газрын дарга асан Б.Заяабал нарыг баруун бүс рүү илгээх мандат олголоо.

Тэгвэл тэр дунд өнгөрсөн жил парламентад суугаагүй буюу “шинэ” дэвшигч дөрөв байгаа нь Монгол Улсын Ерөнхийлөгчийн Хөдөө аж ахуй, хөдөөгийн хөгжил хариуцсан зөвлөх З.Мэндсайхан, Эрүүл мэндийн сайд асан, дэд сайд С.Энхболд, Ховд аймгийн Засаг дарга Э.Болормаа, Татварын ерөнхий газрын дарга асан Б.Заяабал нар юм.

Тэдэнд ямар онцлог, давуу тал байгааг товчхон танилцуулья.

“ЦАГААН АЛТ”-НЫ ЭЗЭН З.МЭНДСАЙХАН

Монгол Улсын Ерөнхийлөгчийн Хөдөө аж ахуй, хөдөөгийн хөгжил хариуцсан зөвлөх З.Мэндсайхан. Эдийн засагч мэргэжилтэй З.Мэндсайханыг төрийн мэргэшсэн хүн гэж тодорхойлж болно. Түүний хувьд өмнө нь Сангийн яаманд газрын дарга, Эрчим хүчний яамны Төрийн нарийн бичгийн дарга, Төрийн өмчийн хорооны дарга, Хөдөө аж ахуйн сайд, Ерөнхий сайдын зөвлөх, Ерөнхийлөгчийн зөвлөх гээд төрд  хариуцлагатай албан тушаал хашиж иржээ. Түүнийг Хүнс, хөдөө аж ахуй, хөнгөн үйлдвэрийн сайдаар ажиллаж байх хугацаандаа салбарын олон асуудлыг зөв чиглүүлэх, менежментийн шинэчлэл хийхэд онцгойлон анхаарсан гэдэг.  Сайдын ажлаа өгсний дараа Монгол Улсын Ерөнхийлөгчийн зөвлөхөөр ажиллаж, хөдөө аж ахуй, газар тариалангийн салбарт бодитой өөрчлөлт хийхэд хууль эрх зүй болоод бодлогын шийдвэр гаргахад нь Ерөнхийлөгчид зөвлөж буй. Тиймээс ч өнгөрсөн хугацаанд хөдөө орон нутагт үндэсний хэмжээнд хэрэгжүүлэх хөдөө аж ахуйн салбарын гажуудлыг засч, залруулах, өөрчлөхөд гар бие оролцож,  үндэсний хэмжээний "Цагаан алт" хөтөлбөрийг малчдад таниулах, ойлгуулахаар амаа чилтэл ярьж, малчдын саналыг сонсч явсан. Малчдад чиглэсэн “Цагаан алт” хөтөлбөрийн хүрээнд арьс шир хогийн цэг рүү биш үйлдвэрт, экспортод гарч өртөг шингэсэн бүтээгдэхүүн үйлдвэрлэх зорилготой.  "Цагаан алт" хөтөлбөр хэрэгжсэнээр баруун бүс нутагт хөнгөн үйлдвэрийн салбар хөгжих суурь тавигдана гэж үзэж буйг хөдөө аж ахуйн салбарынхан хэлж байгаа.  Ерөнхийлөгчийн манлайлал дор хөдөө аж ахуйн салбарын гажуудлыг засаж залруулах өөрчлөх ажлыг бодлогын хэмжээнд “Цагаан алт” хөтөлбөрийн хүрээнд хэрэгжүүлэхээр хуулийн төсөл боловсруулж бэлэн болгож, иргэдийн саналыг тусгахаар ажиллаж байгаа аж. Хуулийг энэ хаврын УИХ-ын чуулганд өргөн барих юм.

“ХОВД”-ЫН Э.БОЛОРМАА

Харин Ховд аймгийн Засаг дарга Э.Болормаа орон нутгийн хөгжил, хөдөөгийн сэргэлтийг голчлон ярьж яваа. Тэрбээр Ерөнхий сайд Л.Оюун-Эрдэнэ Засгийн газрын хэрэг эрхлэх газрын даргаар ажиллаж байхад Э.Болормаа Засаглалын шинэчлэл хариуцсан зөвлөхөөр ажиллаж байв. 2021 оны нэгдүгээр сараас Монгол Улсын Ерөнхий сайд Л.Оюун-Эрдэнийн Эдийн засаг, хөгжлийн бодлого хариуцсан зөвлөхөөр томилогдон ажилласан. Тэр Шинэ сэргэлтийн бодлогыг боловсруулахад оролцсон. Энэ ч хүрээнд Ховд аймагт хэрэгжүүлэх томоохон төслүүдэд ахиц гаргах зорилгтойгоор Ерөнхий сайд болон МАН-ын улс төрийн дэмжлэгийг авч, Ховд аймгийн Засаг даргад нэр дэвшиж сонгогдон ажиллаж байгаа. Эдийн засагч, олон улсын харилцаа мэргэжилтэй. Дэлхийн банк, Ногоон уур амьсгалын сан, Азийн дэд бүтцийн хөрөнгө оруулалтын банк зэрэг олон улсын байгууллагад ажиллаж байсан туршлагатай.

ЭРҮҮЛ МЭНДИЙН САЛБАРЫГ "ЭМЧЛЭХ" С.ЭНХБОЛД

Эрүүл мэндийн салбар цар тахлын хүнд хэцүү цаг үед зөв менежментээр давж гарахад Эрүүл мэндийн сайд С.Энхболдын үүрэг их. Л.Оюун-Эрдэнийн Засгийн газар, тэр дундаа Эрүүл мэндийн сайд С.Энхболд цар тахлын жилүүдэд хүн амынхаа эрүүл мэндийн манаанд салбарынхантай, Засгийн газартайгаа нүүр тулсан, хүнд цаг үеийн амжилттай давсан. Энэ хүрээнд хүн амыг вакцинжуулах, эрүүл мэндийн урьдчилан сэргийлэх үзлэг оношлогоог орон даяар хийхэд чухал үүрэг оролцоотой ажилласан хүмүүсийн нэг. Мөн тэрбээр Эрүүл мэндийн сайдаар ажиллаж байх хугацаандаа шинээр зургаан төрлийн өвчнийг Монголд эмчилдэг болгож, орон нутгийн эмнэлгүүдийн хүчин чадлыг сайжруулах, зөвхөн Улаанбаатарт хийдэг хагалгааг орон нутгийн эмч нар хийх зэргээр эрүүл мэндийн салбарт менежментийн өөрчлөлтүүдийг хийсэн байна. Ялангуяа гадаадад өндөр үнээр хийдэг байсан зургаан төрлийн өвчнийг Монголдоо эмчилдэг болгож чадсан нь олон мянган иргэдийн олон тэрбумын бодит зардлыг хэмнэж чадсан гэж салбарынхан нь үнэлдэг. С.Энхболд сайн, мэргэжлийн эмч хэмээн салбартаа танигдаж чадсан бол Эрүүл мэндийн сайдаар ажиллаж байх хугацаандаа мөн сайн менежер гэдгээ ч харуулсан учраас намын дарга, Ерөнхий сайд Л.Оюун-Эрдэнэ салбарт нь дэд сайдаар үлдээсэн гэж улс төрийн хүрээнийхэн ярилцдаг.

С.Энхболдын хувьд удам дамжсан эмч. Анагаах ухааны их сургуулийг дүрс оношлогооны их эмч мэргэжлээр төгсч, Улсын нэгдүгээр эмнэлгээс ажлын гараагаа эхлүүлж, Харвардын Анагаах ухааны их сургуульд мэргэжил дээшлүүлсэн, докторантын зэрэгтэй.  Эрүүл мэндийн салбарт тасралтгүй 10 гаруй жил ажиллаж, 2007 онд Улсын Нэгдүгээр Төв эмнэлгийн дүрс оношилгооны төвийн даргаар, 2019 онод  Улсын Хоёрдугаар Төв эмнэлгийн Ерөнхий захирал, Улсын Нэгдүгээр төв эмнэлэгт Дүрс оношилгооны төвийн дарга, Эрүүл мэндийн сайдаар ажиллажээ.

“ТАТВАР”-ЫН Б.ЗАЯАБАЛ

Б.Заяабал Татварын ерөнхий газрын даргаар ажиллаж байхдаа нэлээн үр дүнтэй, бодит хэмнэлт гаргаж чадсан гэдэг. Тухайлбал, татварын албаны цахим шилжилт, шинэчлэлд татвар төлөгч талдаа бүртгүүлэх, тайлагнах, төлөх ажиллагааг цахимжуулснаар жилдээ нэг орчим тэрбум төгрөгийн зардал хэмнэжээ. Тэрбээр МУИС-ийн Эдийн засгийн сургууль, МУИС-ийн Хууль зүйн сургууль, АНУ-д боловсрол эзэмшсэн гэдэг утгаараа эдийн засаг талаасаа ярьдаг. УИХ-ын гишүүний туслах, Өрхийн Амьжиргааг дэжих хөтөлбөрийн төслийн ажилтан, Түлш эрчим хүчний яамны хэлтсийн дарга, Эрдэс баялаг, эрчим хүчний яамны газрын дарга, Төрийн өмчийн хорооны газрын дарга, Төрийн өмчийн хорооны дарга, Санхүүгийн зөвлөх, УИХ-ын гишүүний зөвлөх, Татварын Ерөнхий Газрын дэд дарга, Татварын Ерөнхий Газрын даргаар ажиллаж байсан.