Хамас бүлэгт барьцаалагдсан Израилийн Наама Левигийн ах, гэр бүлийнхэн нь түүний эгч болон бусад барьцаалагдсан эмэгтэйчүүдийг хулгайлсан шинэ аймшигтай бичлэгийг нийтэлжээ. Бичлэгийг үзээд дэлхийн удирдагчид барьцааны хүмүүсийг суллах тохиролцоонд хүрэх хэрэгтэйг сануулав. Наама болон өөр зургаан залуу эмэгтэйг аравдугаар сарын 7-нд Нахал Оз цэргийн баазаас Хамас зэвсэгт этгээдүүд авч явсан. Тэднийг авч явж буй бичлэг хашааны хяналтын камерт үлджээ.

 Хамас бүлэглэлийн бичлэгт 19 настай Наама өмд нь цустай, гарыг нь уясан, шагайгаа зүссэн байдалтай зогсч байв. Мөн өсвөр насныхныг хүлж, алж байсан нь бичигдсэн аж.

Наамагийн ах Амит дүүгээ суллуулахаар Лондонд очсон. Тэрбээр хэлэхдээ, "Газын зурваст гал зогсоох, барьцааны хүмүүсийг суллах хэлэлцээрийг баталгаажуулах зорилгоор Израиль, Хамас хоёрын хооронд хийсэн шууд бус яриа хэлэлцээ үр дүнгүй байна.  Энэ видео нь бүх талуудыг ширээний ард суулгаж, шийдвэрлэх ёстой хүмүүнлэгийн асуудал гэдгийг ойлгоход тусална гэж бид найдаж байна. Энэ бол тэднийг аврах сүүлчийн боломж байж магадгүй" гэв.

Нахал Оз дээр хулгайлагдсан долоон эмэгтэйн нэг Ноа Марсиано Газад алагджээ. Арваннэгдүгээр сард Газа хотын аль-Шифа эмнэлгийн ойролцоох барилгаас түүний цогцсыг олсон гэж Израилийн арми мэдэгдэв. Өөр нэг олзлогдсон хүн болох Ори Мегидишийг аравдугаар сарын сүүлээр, Газын зурваст явуулсан ажиллагааны үеэр Израилийн цэргүүд аварсан юм.

Бусад 18 настай Лири Албаг, 19 настай Карина Ариев, 19 настай Даниэла Гилбоа, 19 настай Агам Бергер нар Наамагийн хамт хоригдож байгаа юм. Тэд 229 хоног барьцаалагдсан байна. Наама цус болсон өмд өмссөн бичлэгийг үзээд, бусад барьцаалагдсан хүмүүсийн мэдүүлгийг сонсоод ар гэрийнхэн нь бэлгийн хүчирхийлэлд өртөх вий гэж айж байна. Израилийн Ерөнхий сайд Беньямин Нетаньяху уг бичлэгийг үзээд цочирдсон бөгөөд барьцаалагдсан хүмүүсийг гэрт нь  авчрахын тулд бүхнийг хийнэ гэж амласан байна.
"Хамасын алан хядагчдын харгислал дахин хэзээ ч давтагдахгүйн тулд тэднийг устгах хүртэл бүх хүчээ дайчлан тэмцэх миний шийдэмгий байдлыг улам бататгаж байна" гэж тэрбээр мэдэгджээ.

Эх сурвалж:BBC