ХҮН намаас нэгдүгээр тойрог буюу Архангай, Өвөрхөнгай, Баянхонгор аймагт ХҮН намын нарийн бичгийн дарга, загвар өмсөгч О.Билгүүн нэр дэвшинэ гэдгийг зарласан. Загвар өмсөгч О.Билгүүн нь сүүлд “Яг түүн шиг” шоунд амжилттай оролцсон.

Тэрбээр Азийн топ модель шалгаруулах олон улсын уралдааны гран при шагналт, “Монгол модель” агентлагийн загвар өмсөгч, “Гэрэлт гудамж” төслийн үүсгэн байгуулагч,төслийн удирдагч, VR хамтлагийн гишүүн юм. Харин энэ удаа УИХ-ын сонгуульд нэр дэвшиж, улс төрд хүч үзэхээр шийджээ.

ШАРКУУДЫН ЗАЛГАМЖ ХАЛАА Ч.АНАР БОЛОН Д.ЭНХТҮВШИН

МАН-ын Удирдах зөвлөлөөс санал болгосон жагсаалтад шарк буюу МҮХАҮТ-ын ерөнхийлөгч Д.Энхтүвшин, "Ондо"-гийн захирал Ч.Анар нар яригдаж байгаа нь олны анхаарлыг татаж байна. УИХ-ын сонгуульд шаркуудын төлөөлөл нэр дэвшдэг уламжлал тогтох нь ээ. Өмнө нь шарк Г.Амартүвшин УИХ-ын сонгуульд нэр дэвшиж, улстөрч болсон байдаг. Шарк Д.Энхтүвшингийн хувьд Дорнодод 10 жилээ төгсөөд хамгийн эрэлттэй мэргэжил хэмээн МУИС-ийн Эдийн засгийн сургуулийн менежментийн ангид элсэн орж, төгссөн. Санхүү, менежмент гэсэн хос мэргэжлээр төгссөн тэрбээр 1997 онд MCS группт санхүүгийн шинжээчээр анх ажилд орж, тус группийнхээ дэд ерөнхийлөгч болтлоо өсөн дэвжсэн нэгэн гэгддэг.

Харин шарк Ч.Анар нь "Анд Глобал", "MLab" компаниудын үүсгэн байгуулагч бөгөөд зарим хүмүүс "Анд Глобал"-ын харьяа компани LendMN-ээр мэдэх нь бий.

СЭТГҮҮЛЧ Ч.ЛОДОЙСАМБУУ, Л.МӨНХБАЯСГАЛАН НАР НЭГ НАМААС НЭР ДЭВШИЖ БАЙНА

УИХ-ын энэ удаагийн сонгуульд нэр дэвшигч дунд цөөнгүй сэтгүүлч бий. Тэдний нэг бол сэтгүүлч Ч.Лодойсамбуу. Тэрбээр Ардчилсан намаас нийслэлийн Хан-Уул дүүрэгт нэр дэвшихээр яригдаж буй. Харин сэтгүүлч Л.Мөнхбаясгалан Ардчилсан намаас Говийн бүсэд нэр дэвшихээр болсон. Нэр дэвших эрхээ аваад буй Л.Мөнхбаясгалан энэ талаар “Тэдэнд мөнгө байна. Бидэнд өр л байна. Харин бидэнд ядуурлаас өөр алдах зүйл байхгүй. Энэ бол Монгол төрийн сонгууль учраас шударга өрсөлдье” гэсэн юм.

Харин Ч.Лодойсамбуу "Би жилийн өмнө АНУ-руу сурахаар явсан. Өнгөрсөн жил надад нэр дэвшээч ээ гэх санал их ирсэн. Тухайн үед надад тийм шаардлага байхгүй гэдгээ илэрхийлсэн. Гэтэл МАН-ын үед сэтгүүлчээр ажиллах аргагүй болж байна. 126 гишүүнтэй болчихоор залуучуудад зай гарч байна. Нөгөө талдаа Сонгуулийн тухай хуулиар зардал мөнгийг хуульчилж өгөхөөр өрсөлдөхөд их төвөгтэй байна. Тэр нь надад ч бас мэдрэгдэж байна. Сонгуулийн штаб, ухуулах байр, сурталчилгааны зардлыг нам өөрөө зохицуулдаг болсон. Энэ нь олонд илүүтэй танигдсан хүмүүст давуу тал болж байна. Тэгэхээр залуучуудад боломж үүссэн. Гэхдээ нөгөө талдаа энэ их мөнгөний эсрэг мөнгө босгоно гэдэг бас чанга.

Жагсаалт бол намын нүүр царай, гарчиг. Гэхдээ намуудын бодит байдал нь зөвхөн нүүр царайгаа бодож жагсаалтаар оруулахад үнэхээр хэцүү. АН таван нам нийлж байгуулагдсан. Одоо хэрэлдээд доош ороод байгаа юм биш. Ерөөсөө л олон намын нэгдэл. Тиймээс эсрэг, тэсрэг байр сууриуд байнга гардаг. Тиймээс нийлээд сонгуульдаа амжилттай оролцох шаардлагатай" гэдэг байр сууриа илэрхийлсэн.

ХХААХҮЯ-НЫ ГАЗРЫН ДАРГА АСАН Л.ЧОЙ-ИШ ҮНДЭСНИЙ ЭВСЛЭЭС НЭР ДЭВШИЖ БАЙНА

ХХААХҮЯ-ны Мал аж ахуйн бодлогын хэрэгжилтийн зохицуулах газрын дарга асан Л.Чой-Иш Үндэсний эвслээс Төвийн бүсэд нэр дэвшиж байна. Тэрбээр хөдөө аж ахуйн салбарт 23 дахь жилдээ ажиллаж байгаа бөгөөд хөдөө аж ахуйн салбарын доктор цолтой нэгэн. Тэрбээр өнгөрсөн 2023 онд албан тушаалаа урвуулан ашиглаж, бусдад давуу байдал олгосон үйлдлээр хуулийн байгууллагаар шалгуулж байсан юм. Хэргийг тодруулбал, Л.Чой-Иш, М.Энх-Амар нар улсын төсвийн санхүүжилтээр ХХААХЯ-наас 2017, 2018 онд хэрэгжүүлсэн өвөлжилт, хаваржилтыг хүндрэлгүй давах арга хэмжээний хүрээнд өвс, тэжээл импортлох болон дотооддоо үйлдвэрлэн, малчид, фермерүүдэд нийлүүлэх аж ахуйн нэгжийг сонгон шалгаруулах үйл ажиллагаанд танил талаа шалгаруулсан хэрэгт холбогдсон.

Гутлын үйлдвэрлэл, худалдаа, аялал жуулчлал, гадаад худалдааны чиглэлээр үйл ажиллагаа явуулдаг “Чансаа хан хөхий холдинг” ХХК-ийн захирал, найз Н.Болорчулууны аж ахуйн нэгжийг дээрх сонгон шалгаруулалтад шалгаруулах зорилгоор Л.Чой-Иш тендер шалгаруулах ажлын хэсгийн ахлагч М.Энх-Амарт нөлөөлсөн байж болзошгүй гэх мэдээллийг хуулийн байгууллагаас өгч байв.

АХМАД ҮЕИЙН ТӨЛӨӨЛӨЛ Д.РЭГДЭЛ

МАН-ын Удирдах зөвлөлөөс санал болгосон жагсаалтад ШУА-ийн Тэргүүн дэд ерөнхийлөгч, академич Д.Рэгдэл яригдаж буй. Тэрбээр ахмад настны төлөөллөөс гадна эрдэмтэн судлаачдын төлөөллөөс нэр дэвшиж байгаа аж. Академич Д.Рэгдэл нь 1976 онд ЗХУ-ын Харьковын их сургуулийг биохимич мэргэжлээр төгсч, 1985 онд Берлиний Гумболдтын их сургуульд доктор цол, 2001 онд “Липоксигеназууд, нийтлэг шинж, өвөрмөц онцлог” сэдвээр химийн шинжлэх ухааны докторын зэрэг тус тус хамгаалсан байна.

Мөн 2002 онд Монгол Улсын Шинжлэх ухааны академийн гишүүнээр сонгогдож, ШУА-ийн Хими болон Физикийн хүрээлэнд эрдэм шинжилгээний ажилтан, Хими, хими технологийн хүрээлэнд лабораторийн эрхлэгч, эрдэмтэн нарийн бичгийн даргаар ажиллаж байгаад 2001-2009 онд ШУА-ийн эрдэмтэн нарийн бичгийн дарга, 2009 оноос ШУА-ийн тэргүүн дэд ерөнхийлөгчөөр сонгогдон ажиллаж байсан аж.