“Нийтийн тээврийн салбарт мафиуд эзэн суусан тул Улаанбаатар хотын захирагч Х.Нямбаатар хууль хүчнийхэнтэй хамтраад цэвэрлэж, хариуцлага хүлээлгэх хэрэгтэй” гэх байр суурь илэрхийлж байсан Д.Сумъяабазар нээлттэй сонсголд ирсэнгүй.

Төрийн ордонд өнөөдөр /2024.05.21/ ногоон автобусны худалдан авалтыг судлах Түр хорооны сонсгол эхлээд байгаа юм.  Тэрбээр энэ асуудлаар өмнө нь байр сууриа илэрхийлэхдээ сонсголд гэрчээр оролцоно гэдгээ мэдэгдсэн ч ирээгүй нь  УИХ-ын сонгуульд нэр дэвшиж чадахгүй болсноос болов уу гэж таамаглах хэсэг ч байна.

Урьд шөнө МАН Бага хурлаа хийж, 2024 оны УИХ-ын сонгуульд өрсөлдөх нэр дэвшигч нараа тодруулсан. Нийт 126 нэр дэвшигч намын жагсаалт болон тойрогт өрсөлдөхөөр Бага хурлаараа баталгаажуулсан. Гэвч энэ удаагийн УИХ-ын сонгуульд өрсөлдөх нэр дэвшигч нарын нэрс дотор экс хотын дарга Д.Сумъяабазар багтаагүй. Мөн хэдхэн хоногийн өмнө тэрбээр Нийслэлийн МАН-ын хорооны даргаас чөлөөлөгдөж, албаа Х.Нямбаатарт шилжүүлж өгсөн.

Түүнийг олон нийт сонсгол дээр  ногоон автобусны асуудлаар “бөмбөг тэсэлж”, нийтийн тээвэр дэх мафиудын нэрсийг зарлах болов уу гэж хүлээж байсан ч үдээс өмнөх хуралдаанд оролцсонгүй.

Г.ХОРОЛ