Парисын олимпийн 3х3 сагсан бөмбөгийн эрх олгох сүүлийн тэмцээн Унгарын Дебрецен хотод болж өндөрлөлөө. Сүүлийн боломжоо эрэлхийлсэн дэлхийн шилдэг багууд Унгарт бүхнээ шавхаж, эцсээ үзэв. Монголын эрэгтэй болон эмэгтэй шигшээ багууд ч торгон жолоо өргөж, Парис руу "шунасан". Харамсалтай нь, зорьсондоо хүрэхэд тун ойртсон ч ганцхан болчимгүй үйлдэл бүхнийг булшиллаа.

Өмнөх хоёр эрх олгох тэмцээнд Монголын эрэгтэй шигшээ багийн тохироо бүрдэж чадаагүй. Эхний тэмцээнд Э.Дөлгөөн бэртлийн улмаас оролцоогүй бол удаах тэмцээнд аргагүй хүчин мөхөстсөн. Харин энэ удаад боломжоо өөрсдөө хийсгэчихэв.

Эмэгтэй шигшээ баг хэсэгтээ Египетийг хожсон ч Испани, Японд хожигдсоноор тэмцээнээ өндөрлүүлсэн.

Монголын эрэгтэй шигшээ баг хэсэгтээ дийлдсэнгүй. Ингэхдээ бүр эхлээд хатуу тоглолттой, хүчирхэг өрсөлдөгч Польшийг, дараа нь Тибо Вервур, Деннис Донкор зэрэг шилдгүүдтэй Бельгийг, эцэст нь хоёр ч тэмцээн дараалан хожигдоод байсан Японоосоо хариугаа авч, 3-0 гэсэн амжилттай хасагдах шатанд шалгарсан.

Хасагдах шатанд Израильтай учраа таарлаа. Хэдий энэ тоглолтод Монголын шигшээ баг хожсон ч тус хожил дэндүү өндөр үнэтэй басхүү хатуухан сургамжтай ирсэн. Тоглолтын хэмнэл бүхэлдээ Монголын талд эргэчихсэн, 12-9 гээд онооны илүүтэй явж байх үед А.Ананд эсрэг багийн өгөөшийг үмхэчихсэн хэрэг. Израилийн 25 дугаарай тамирчин А.Ананд дээр алдаа хийж, түүнийг шатаах гэж оролдов. Харамсалтай нь, А.Ананд өөрийгөө барьж дийлэлгүй, өрсөлдөгчөө мөргөөд унагаачихсан. Яг л 2006 оны хөлбөмбөгийн дэлхийн аваргын финалд Зидан Матерацциг мөргөсөн шиг л үйл явдал давтагдлаа.

Шүүгчид бичлэг ухрааж үзээд хоёр тамирчинд харилцан техникийн алдаа үлээсэн ч А.Анандыг талбайгаас хөөсөн.

Ийнхүү гурвуулаа үлдсэн Э.Дөлгөөн, Д.Дэлгэрням, О.Энхбаатар нар нягт нямбай тоглож, Израилийг буулган авч, хагас шигшээд шалгарсан. Бүгд л А.Анандыг дараагийн тоглолтуудад оролцоно гэж бодсон ч зохион байгуулагчдын зүгээс А.Анандын тэмцээний турш тоглох эрхийг нь хасч, банджээ.

Ийнхүү хүн дутуу дахин хоёр тун чухал тоглолтыг хийх хэрэгтэй болов.

Монголын хагас шигшээ шатны өрсөлдөгч Франц. Хоёр баг өмнөх Японы тэмцээнд учраа таарахад Монголын шигшээ хожсон түүхтэй. Гэвч энэ удаад А.Анандгүй, хүн дутуу. Хүн дутуу ч Дебрецен хотод чуулсан монголчуудынхаа ачаар хүн илүү мэт тоглож, тоглолтын төгсгөлд 19-15 гэж тэргүүлсэн. Ердөө хоёрхон оноо авахад л олимпийн эрх байлаа. Гэвч Францын шигшээ хэцүү байдлаас эргэн ирж, Тимоти Вержиагийн хожлын шидэлтээр 21-20 гэсэн харьцаатай хожиж, эх орондоо болох олимпийн наадамд оролцохоо эрхээ авсан юм.

Монголын шигшээ хожигдсон ч сүүлийн гурав дахь эрхийн төлөө Польшийн шигшээтэй нэмэлт тоглолтыг хийх байв. Хэсэгт учраа таарахад 21-14 гэсэн харьцаатай Монгол хожсон. Гэхдээ энэ удаад бүх зүйл өөр.

3х3 сагсан бөмбөгт хүн дутуу атлаа хоёр дараалан бараг амралтгүй шахуу тоглоно гэдэг шандас сорьсон ажил. Гэхдээ олимпийн эрх нүдэнд харагдаж, гарт баригдах дөхсөн үед ядралт бол юу биш нь харагдав. Польшийн эсрэг тоглолтын эхнээс л онооны тэргүүллийг авч, чансаа илүү баг гэдгээ харуулсан, мэдрүүлсэн. Бүтэн тоглолтын турш Монголын шигшээ оноо илүү явсан ч төгсгөлд Польшийн шигшээ оноог тэнцүүлж, амь гарч чадсан. Нэмэлт цагийн эхний довтолгоог Польшийн шигшээ хийж, Замойски ямар ч эргэлзээгүй алсын зайн шидэлтийг гүйцэтгэж, амжилттай болголоо. Тус тоглолтыг үзсэн монгол хүн бүрийн зүрхийг зүссэн, харуусал, гомдлыг тээсэн шидэлт байсан юм.

Үзэгчдийн суудал дунд А.Ананд үнэхээр харууссан, өөрийгөө зүхсэн харагдсан. Түүний ганцхан удаагийн болчимгүй үйлдэл олимпийн эрхийн үнэтэй байлаа. Хэрэв тэр байсан бол Францыг үгүй юм гэхэд Польшийг хожих байсан нь гарцаагүй. А.Ананд энэ тэмцээний турш ямар гайхалтай байсныг дэлхий даяараа харсан, биширсэн. Гэвч хамгийн хэрэгтэй үед багтайгаа хамт талбайд байж чадсангүй.

А.Ананд, О.Энхбаатар нарт дахин олимпийн эрхийн төлөө өрсөлдөх, бүр олимпод ч орох боломж байгаа. Хамгийн сэтгэл өвтгөсөн, зүрх шархлуулсан зүйл нь Э.Дөлгөөн, Д.Дэлгэрням нар олимпод оролцох эрхтэй хүмүүс байсан юм. Тэд Монголд 3х3 сагсан бөмбөг хөгжихөд элч төлөөлөгч, даль жигүүр нь байж, дэлхийд Монголын сагсан бөмбөгийг таниулсан гавьяатай хүмүүс. Монголын олон мянган хөгжөөн дэмжигчид тэдний өмнөөс нь шархалж байгаа нь гарцаагүй.

Э.Дөлгөөн, Д.Дэлгэрням хоёр олимпийн дэвжээнд дэвж, нэрээ, эх орноо дуудуулах дэндүү эрхтэй хүмүүс.

Монголын энэ шигшээ баг олимпод орсон бол медальд ч ойрхон байв. Тун харамсалтай.

ПАРИСЫН ОЛИМПИЙН 3Х3 САГСАН БӨМБӨГТ ДАРААХ УЛСУУД ОРОЛЦОНО

Эрэгтэй:

• Серби /дэлхийн чансааг тэргүүлсэн/
• АНУ /дэлхийн чансааг тэргүүлсэн/
• Хятад /дэлхийн чансааг тэргүүлсэн/
• Латви /эрхийн эхний тэмцээнд түрүүлсэн/
• Нидерланд /эрхийн хоёр дахь тэмцээнд түрүүлсэн/
• Франц /эрхийн гурав дахь тэмцээнд хоёрдугаар байр/
• Литви /эрхийн гурав дахь тэмцээнд нэгдүгээр байр/
• Польш /эрхийн гурав дахь тэмцээнд гуравдугаар байр/

Эмэгтэй:

• Франц /Зохион байгуулагч орон/
• Хятад /Дэлхийн чансааг тэргүүлсэн/
• АНУ /Дэлхийн чансааг тэргүүлсэн/
• Азербайжан /эрхийн эхний тэмцээнд түрүүлсэн/
• Австрали /эрхийн хоёр дахь тэмцээнд түрүүлсэн/
• Герман /эрхийн гурав дахь тэмцээнд нэгдүгээр байр/
• Испани /эрхийн гурав дахь тэмцээнд хоёрдугаар байр/
• Канад /эрхийн гурав дахь тэмцээнд гуравдугаар байр/