Газын зурвасын дайн найм дахь сардаа орж байгаа ч мөргөлдөөнийг нэг тийш эцэслэх болоогүй бололтой. Израилийн арми Хамасын 13 мянган дайчныг устгасан гэж мэдэгдсэн. Хэрэв энэ тоо зөв бол шархадсан, байлдах чадвараа алдсан дайчдын тоо үүнээс хоёр, гурав дахин их байна гэж таамаглав. Хамасын 30 мянга орчим дайчин Газын зурваст байсан гэж дайнаас өмнө тооцоолж байсан.

Ерөнхий сайд Беньямин Нетаньяху Рафах хот дахь сүүлчийн батальонуудыг зайлуулахаар төлөвлөсөн. Нетаньяху ийм алхам хийснээр Хамасын Израильд заналхийлэх чадварыг таслан зогсоох магадлалтай гэж үзэж байгаа нь зөв ч байж магадгүй юм.

Гэхдээ дээрх тооцоолол үнэн зөв гэхэд эргэлзээтэй. Израилийн Батлан хамгаалах хүчин өөрсдийн устгасан дайчдын тоог хэрхэн тооцдог нь тодорхойгүй. Газын зурвас дахь эмх замбараагүй нөхцөл байдлыг харгалзан үзвэл амиа алдсан палестинчуудын тоотой ойролцоогоор гаргасан байж магадгүй юм. Өөрөөр хэлбэл, Газын зурваст 35 мянган палестин хүн амиа алдсаны хэд нь 18-40 насны эрчүүд байсан бэ гэдгийг үндэслэн тооцоогоо гаргасан гэж таамаглав.

Хэрвээ бусад дайчин нь Нетаньяхугийн хэлснээр Рафахын доорх хонгилд нуугдаж байгаа бол тэд хонгилын сүлжээгээр дамжин хойд зүг рүү шилжих магадлалтай. Хонгилын сүлжээгээр Хамасын дайчид байрлал сэлгэсэн зарим тохиолдол бий. Гэхдээ энд онцлууштай нь тэдгээр дайчид Израилийн армийн сарын өмнө цэвэрлэсэн хэсгүүдэд дахин цугларч, бүлэглэсэн гэж Израилийн хэвлэлүүд мэдээлж байна. Израилийн арми сарын өмнө Газын зурвасын төв болон хойд хэсэгт цэвэрлэгээ хийсэн гэж мэдээлсэн билээ.

Израилийн арми халдлагыг анхлан зохион байгуулсан Хамасын үндсэн хоёр удирдагч Яхья Синвар, Мохаммед Дейф нарыг илрүүлж, устгаж чадаагүй байна. Түүнчлэн Хамасын барьцаанд байгаа бусад иргэнийг одоо ч аварч чадаагүй байсаар. Хамасын барьцаалсан 240 орчим хүнээс хэлэлцээний үр дүнд 100 гаруйг нь сулласан бол цэргийн ажиллагаагаар ердөө гурван хүн л суллажээ.

Рафах руу үргэлжлүүлэн довтлоно гэсэн шийдвэрийн дараа АНУ-ын ерөнхийлөгч Жо Байден Израильд хүнд даацын сум нийлүүлэхээ зогсоосон. Гэсэн хэдий ч энэ нь бэлгэдлийн чанартай үйлдэл аж. Байден Израильтай нэг тэрбум ам.долларын зэвсгийн шинэ хэлэлцээ хийхээр төлөвлөөд буй билээ.

ХАМАСЫН ШАЛТГААН БА НЕТАНЬЯХУГИЙН ДАРАМТ

Хамас бүлэглэл дайн өдөөсөн гэнэтийн дайралтынхаа шалтгааныг тайлбарлаагүй ч олон улсын ажиглагч, шинжээчид дараах үндэслэлүүдийг гаргаж ирсэн юм. Нэгдүгээрт, Саудын Араб улс Израильтай энхийн гэрээ байгуулахын ирмэг дээр байсан тул ийм эгзэгтэй цаг үед Палестины асуудлыг Ойрхи Дорнодын хэлэлцэх асуудлын жагсаалтад оруулах. Хоёрдугаарт, дэлхийн хамгийн том задгай шорон гэгддэг Газын аймшигтай нөхцөл байдалд олон улсын анхаарлыг хандуулах.

Дээрх шалтгаануудын улмаас Хамас бүлэглэл Израильд урхи тавьж, Израиль түүнд нь орсон гэж үзэж байна. Эцэстээ талууд хэт их хүч хэрэглэснээр олон улсын шүүмжлэлд өртөв.

Өнөөгийн нөхцөл байдлыг харгалзан үзвэл, Нетаньяху зорилгодоо хүрэхэд хол байна. Олон улсын шүүмжлэл, байр суурь улам л хатуу болж байгаа тул Нетаньяху хаа хүрэх нь сонирхолтой байна. Тэр гурван талын дарамттай тулгараад байна.

Нэгдүгээрт, тэр Израилийн түүхэн дэх хамгийн барууны үзэлтэй засгийн газрыг тэргүүлж байна. Хэрвээ Нетаньяху гал зогсоохыг зөвшөөрвөл түүний эвслийн түншүүд, ялангуяа Сангийн сайд Безалел Смотрих, Аюулгүй байдлын сайд Итамар Бен-Гвир нар засгийн газраас гарч, шинэ сонгууль явуулах нь тодорхой болсон. Израилийн иргэдийн 71 хувь нь Нетаньяхуг огцрохыг хүсч буй. Саяхан явуулсан санал асуулгыг харахад Нетаньяху удахгүй болох сонгуульд ялагдах нь гарцаагүй болжээ.

Хоёрдугаарт, Хамасын барьцаанд байгаа хүмүүсийг сулласны хариуд гал зогсоох хэлэлцээг хүлээн авахыг Израилийн тагнуулын албаныхан шаардаж байна.

Гуравдугаарт, АНУ-ын ерөнхийлөгчийн сонгууль хаяанд ирсэн учир Нетаньяхугийн гол холбоотон Жо Байден дайныг аль болох хурдан дуусгахыг хүсч байна. Учир нь дайн үргэлжилсээр байвал дэвшилтэт үзэлтнүүд болон Арабын америкчууд саналаа өгөхгүй байх эрсдэлтэйг Байден мэдэж байгаа. Энэ сарын эхээр зэвсгийн нийлүүлэлтийг зогсоосон нь Байденаас Нетаньяхуд илгээсэн олон дохионы нэг байлаа. Тэр тэвчээр нь алдарч буйг илэрхийлж байна.

Гал зогсоох тохиролцоонд хүрсэн ч Нетаньяхугийн засгийн газар дараагийн төлөвлөгөөгөө гаргаагүй байна. Тодорхой төлөвлөгөө дутмаг байгаа нь Газын хойд хэсэгт бүлэглэл, овог аймаг, гэмт хэрэгтнүүдээр дүүрсэн аюултай орон зайг бий болгож байгаа ажээ.

Эх сурвалж: THE CONVERSATION