Энэтхэгийн Мумбай хотод хүчтэй шуурганы үеэр аварга том сурталчилгааны самбар нуржээ. Улмаар найман хүн амиа алдаж, 60 орчим хүн шархадсан гэж эрх баригчид мэдэгдэв. Цагдаагийн газрын мэдээлснээр 70х50 метр хэмжээтэй том сурталчилгааны самбар чанх доор байрлах байшингууд, шатахуун түгээх станц дээр унасан. Аврах ажиллагаа Даваа гаригаас хойш үргэлжилж байгаа ба 20-30 хүн дарагдсан байх магадлалтай.

Бриханмумбай корпораци  албан ёсны сайт дээрээ "Хурдан салхи сурталчилгааны самбар нурахад хүргэсэн. Аврах ажиллагаанд цагдаа, гал түймэр, үндэсний гамшгаас хамгаалах баг зэрэг хэд хэдэн байгууллагууд оролцож байна" гэв. Махараштра мужийн дэд сайд Девендра Фаднавис болсон ослын талаар өндөр түвшний мөрдөн байцаалт явуулах тушаал өгсөн байна. Мужийн засгийн газар ослоор амь үрэгдэж, шархадсан хүмүүсийн ар гэрийнхэнд 500 мянган рупи буюу 4767 фунт стерлингийн санхүүгийн тусламж үзүүлнэ.

Даваа гаригт болсон хүчтэй шуурганы үеэр Мумбай хотын олон улсын нисэх онгоцны буудал нислэгүүдээ түр хугацаагаар зогсоосон. Дор хаяж 15 онгоцны чиглэл өөрчлөгдсөн гэж орон нутгийн хэвлэлүүд мэдээлж байна. Энэтхэгийн хэд хэдэн хот, мужуудад зургадугаар сараас есдүгээр сарын хооронд муссоны улирал таардаг. Энэ үеэр хүчтэй шуурга, аадар орж үерийн гамшиг болох төлөвтэй байдаг аж.

Эх сурвалж: BBC