Нийслэлийн Засаг даргын нэгдүгээр орлогч П.Сайнзоригоос дараах тодруулгыг хийлээ.

-Зам засварын ажил эхэллээ. Улаанбаатар хотын хэмжээнд хэчнээн газар авто зам шинэчлэх, үерийн далан шуудуу татах ажил хийгдэж байна вэ. Хэд орчим төгрөгийн төсөв төлөвлөсөн бэ? 

-Улаанбаатар хотын хэмжээнд өнөөдрийн байдлаар 17 байршилд 19.5 км замыг шинэчлэх ажил хийгдэж байна. Зам засварын ажлыг иргэдэд хүндрэл учруулагүй байх зорилгоор шөнийн цагаар хийхээр төлөвлөөд ажиллаж байгаа.  Мөн хаасан замыг аль болох богино хугацаанд засварлаж дуусахаар төлөвлөөд явж байна.

Тухайлбал, Халдвартын эцсээс Наран туул зах хүртэлх авто зам, Вокзалаас ТБД андууд гэх зэргээр замын ажлууд явж байна. Жижиг нөхөөс мөн хийж байна.

Авто зам ашигласны төлбөрийн мөнгө Улаанбаатар хотын замыг засварлахад хүрэлцэхгүй байгаа.  Тийм учраас 150 тэрбум төгрөгөөр бонд гаргаж зам засвар хийхээр төлөвлөсөн.Энэ нь  эргээд зам тээврийн ослоос урьдчилан сэргийлэх, замаас болж ирэдийн машин эвдэрч байж болзошгүй. Энэнээс урьдчилан сэргийлэхэд ч ач холбогдолтой болох байх. Үерээс хамгаалах зорилгоор голын гольдрол дагуу баригдсан барилгыг буулгаж байна. Далан шуудууг хүчитгэн барих ажил хийж байна. Өнгөрсөн жил “Шунхлай” компанийн шатахуун түгээх станцыг буулгасан, мөн SOutlet-ыг буулгасан. Энэ жил голын гольдрол руу түрж орсон “Авлига” хорооллын хоёр блокийг нураана гэсэн төлөвлөгөөтэй ажиллаж байна.

-Замын стандарт чанарт хэр анхаарч байна вэ. Шинээ зам тавилаа ч үерийн суваг шуудуу хийгээгүйгээс эргээд л эвдэрдэг?

-Ус тогтдог байршлуудыг Усны барилга геодези зураг зүйн газар гаргасан. Шинээр барьж байгаа авто зам бүрийг ус зайлуулах суваг, шуудуутай барьж байгаа. Тухайлбал, Дарь-Эхийн зам дээр маш их хэмжээний ус тогтдог байсан тул ус зайлуулах шугам тавилаа. Наадмаа хийдэг Төв цэнгэлдэхийн гадаах талбайд ус тогтдог тул шуудуу татаж байна.

Чанар стандартын дагуу зохих хяналтаа тавиад явж байгаа. Нэг зүйлийг анхааруулахад шинээр зам тавьсны дараа зам дээр будагч бодисоор тэмдэг тэмдэглэгээ хийсгээд илүүдэл бодис нь урссаныг зарим хүмүүс мэдэхгүйгээсээ  “Чанаргүй зам тавилаа” гэхчлэн буруу ташаа мэдээлэл цацаж байна.  Мэргэжлийн байгууллагууд барьж байгаа авто зам бүр дээр хяналтаа тавиад явж байна.