Тэйлор Свифтийн тоглолтыг үзсэн хамгийн залуу үзэгч

Дуучин Тэйлор Свифтийн "The Eras Tour" тоглолтыг үзсэн нэг нас хүрээгүй бололтой нялх хүүхэд цахим сүлжээг шуугиулж байна. Тодруулбал, өнгөрсөн долоо хоногийн Баасан гаригт Парист болсон тоглолтод нэгэн үзэгч нялх хүүхдээ дагуулж очоод, бужигнасан олны дунд шалан дээр хэвтүүлсэн байжээ.

"Х" платформд нийтлэгдээд удалгүй устсан зургийг харахад хүүхэд "La Défense Arena"-ийн шалан дээр чимээ шуугиан тусгаарлагч чихэвч зүүгээд хэвтэж байв. Асран хамгаалагч нь болов уу гэмээр насанд хүрсэн хүн хүүхдийн хажууд зогсож байгаа харагдана. Анхны бичлэг "Х"-ээс удалгүй устсан ч өөр хүмүүс мөн ижил зураг хуваалцаж эхэлжээ. Зургууд цахим ертөнцөд асар хурдтай тархаж, хүмүүс уурлаж бухимдсан байна.

"La Défense Arena" нь 45 мянган хүний багтаамжтай. Цэнгэлдэх хүрээлэнгийн хэвлэлийн төлөөлөгч хэлэхдээ "Насанд хүрээгүй хүүхдийг насанд хүрсэн хүн заавал харгалзаж явах ёстой гэх цэнгэлдэх хүрээлэнгийн борлуулалтын ерөнхий нөхцөл байдаг. Тухайн үзэгчид өөр суудал санал болгосон боловч татгалзсан" гэжээ. Харин цэнгэлдэх хүрээлэнгийн албан ёсны цахим хуудсанд бичсэнээр тэнд дөрвөөс доош насны хүүхдийг дагуулж орохыг зөвлөдөггүй аж.