“Хилийн чанад дахь монголчуудын зөвлөл” ТББ, “Цахим өртөө холбоо” ТББ, Гадаадад төгсөгчдийн нэгдсэн зөвлөлийн төлөөлөл өнөөдөр /2024.05.13/УИХ-ын сонгуулийн тухай хууль гадаадад суугаа 200 гаруй мянган иргэдийн сонгох эрхийг зөрчиж байгаа талаар мэдээлэл хийлээ. Тодруулбал, 2024 оны тавдугаар сарын 10-нд "Хилийн чанад дахь Монголчуудын зөвлөл" ТББ, "Цахим өртөө холбоо" ТББ, Гадаадад төгсөгчдийн нэгдсэн зөвлөлийн төлөөлөл болсон зургаан иргэн УИХ-ын сонгуулийн тухай хуулийн тодорхой заалт нь гадаад улсад суугаа 200 гаруй мянган монголчуудын Монгол Улсын Үндсэн хуулийг баталгаатай эдлэх үндсэн эрх болох "тэгш сонгох" эрхийг зөрчиж буй асуудлаар Үндсэн хуулийн Цэц /ҮХЦ/-д гомдол гаргажээ.

“Хилийн чанад дахь Монголчуудын зөвлөл” ТББ-ийн гишүүн Б.Мөнхдөл:

-Анх бид 2024 оны нэгдүгээр сарын 24-ны өдөр УИХ-аас 2023 оны зургадугаар сарын 16-ны өдөр баталсан, УИХ-ын сонгуулийн тухай хуульд нэмэлт өөрчлөлт оруулах тухай хуулийн 1 дүгээр зүйлийн 34 дэх заалтаар 661 дүгээр зүйлийг нэмсэн бөгөөд уг зүйлийн 661.6 дахь заалтад "Гадаад улсад байгаа сонгуулийн эрх бүхий иргэн энэ хуулийн 59.4.2.-т заасан хэсэгт саналаа өгнө” гэх саналын хуудасны зөвхөн "УИХ-ын 48 гишүүнийг хувь тэнцүүлэн төлөөлөх /пропорционал/ аргаар" сонгох "…нам, эвсэлд өгсөн саналыг тэмдэглэх" хэсэгт саналаа өгөхөөр хуульчилсан нь Үндсэн хууль зөрчсөн гэж үзэж ҮХЦ-д мэдээлэл гаргасан. Уг мэдээллийг ҮХЦ-ийн гишүүн Э.Энхтуяа "Маргаан хянан шийдвэрлэх ажиллагаа үүсгэхээс татгалзсан тухай" 2024 оны гуравдугаар сарын 5-ны 20 дугаар тогтоол гарган шийдвэрлэсэн тухай мэдээллийг бид гуравдугаар сарын 12-нд өөрсдөө лавласны үндсэн дээр мэдсэн ба тогтоолын албан бичгийг гуравдугаар сарын 13-нд биечлэн хүлээн авсан юм. Тус тогтоолыг бид үндэслэлгүй гэж үзэж ҮХЦ-д гомдол гаргаж байна гэв.