Олон нийтийн сүлжээнд гадаад улсын хоёр иргэн Төв шуудангийн орчимд бие засч байна гэх бичлэг цацагдсан. Цагдаагийн байгууллага энэ мэдээллийн дагуу шалгалтын ажиллагааг явуулж байгаа гэв. Одоогийн байдлаар хоёр этгээдийн сууж явсан тээврийн хэрэгслийг тогтоон, үргэлжлүүлэн шалгаж байгаа гэнэ.
Тодруулбал, энэ оны тавдугаар сарын 10-ны өдрийн 21.00 цаг орчимд Чингэлтэй дүүргийн нэгдүгээр хорооны нутаг дэвсгэр буюу Цахим хөгжлийн яамны зүүн талд гурван эрэгтэй олон нийтийн гудамж, талбайд бие засч байгаа бичлэг олон нийтийн цахим сүлжээнд нийтлэгдсэн.
Мэдээллийн дагуу Чингэлтэй дүүргийн цагдаагийн газраас уг асуудлыг гомдол, мэдээллийн бүртгэлд авч, шалгалтын ажиллагааг явуулж байна. Шалгалтын явцад гадаад улсын гурван иргэн нь согтууруулах ундааны зүйл хэрэглэсэн үедээ дээрх зөрчлийг үйлдсэн болохыг тогтоогдож, холбогдох хуулийн дагуу зөрчил шалган шийдвэрлэх ажиллагааг үргэлжлүүлэн явуулж байгааг цагдаагийн байгууллагаас мэдээллээ. Эрүүл ахуйн тухай хуулийн 20 дугаар зүйлийн 20.1.8-д зааснаар “Нийтийн эзэмшлийн болон үйлчилгээний газар, орон сууцны орчныг нус, шүлс, цэр, тамхины иш, гэрийн тэжээвэр амьтны ялгадсаар бохирдуулах, зориулалтын бус газарт бие засах, хог хаягдлыг ил задгай хаях, шатаах”-ыг хориглодог. Эдгээрийг зөрчсөн тохиолдолд Зөрчлийн тухай хуулийн дагуу иргэнийг 10-50 мянган төгрөгөөр, хуулийн этгээдийг 500 мянга хүртэлх төгрөгөөр торгох хуулийн зохицуулалттай.
Холбоотой мэдээ