ОХУ-ын арми Баасан гаригт Украины зүүн хойд зүгт хуурай замын шинэ довтолгоо эхлүүлжээ. Энэ нь хэдэн сарын турш хүлээж байсан томоохон шинэ дайралт гэж Украин мэдэгдлээ. ОХУ хуягт техник, их буугаар хамгаалалтыг сэтлэх оролдлого хийсэн тул украинчууд Харьковын бүс нутаг рүү нөөц ангиудыг яаралтай оруулж эхэлжээ.

Яамны мэдэгдэлд дурдсанаар "Эхний довтолгоог няцаасан ч өөр эрчимтэй тулаанууд үргэлжилсээр байна. Украины зэвсэгт хүчин байр сууриа хадгалсаар байна, нэг ч метр алдаагүй" гэжээ.

Харин ерөнхийлөгч Зеленский хэлэхдээ "ОХУ энэ чиглэлд сөрөг довтолгооны шинэ давалгаа эхлүүлээ. Украины арми Оросын довтолгоонд бэлтгэгдсэн тул тэднийг галаар угтахад бэлэн байна" гэв.

ОХУ энэ довтолгоогоороо Харьковын эргэн тойрон дахь газар нутгийг эзлэн авах томоохон хүчин чармайлт гаргаж байж болзошгүй. Украины Батлан хамгаалах яамнаас мэдээлснээр, ОХУ Харьков хотоос зүүн хойд зүгт 56 км зайд орших Вовчанск чиглэлд агаарын цохилт өгчээ. Вовчанск нь ОХУ-тай хиллэдэг хот юм.

Барууны цэргийн шинжээчид энэ дайралтыг томоохон довтолгоо гэхээсээ илүү эрэн сурвалжлах дайралт гэж үзжээ. Өөрөөр хэлбэл, одоо дөнгөж довтолгооны эхэн үе, цаашид чиглэл өөрчлөгдөж магадгүй гэсэн үг юм. Энэ нь өөр томоохон хэмжээний халдлагын бэлтгэл байж ч магадгүй аж. Эсвэл Украины цэргүүдийг Харьков чиглэлд татаж байгаад өөрсдөө өөр талаас довтлох санаатай байж магадгүйг Лондонд төвтэй "RUSI" судалгааны төв анхааруулжээ.

ОХУ-ыг энэ бүсэд 50 мянга орчим цэрэг цуглуулсан гэж үнэлжээ.

Эх сурвалж: NBC