МАНАН бүлэглэлтэй тэмцэх зорилгоор Шинэ намыг байгуулснаа зарлаж, улс төр хийж явсан, УИХ-ын гишүүн асан Ж.Батзандан саяхан Ардчилсан намд эргэн ирж байгаагаа зарласан бол Шинэ намынхан Ж.Батзандангаар дутахгүй гэдгээ өнөөдөр /2024.05.09/мэдэгдлээ.

Шинэ намын дарга Ц.Гантулга “МАНАН-гийн эсрэг гэж яваад МАНАН-тай буцаж нийлж байгаа хүмүүстэй агаар хуваалцах боломжгүй” гэж мэдэгдсэн юм.

Харин Шинэ намын дэд дарга Д.Жаргалсайхан “Сүүлийн 34 жилийн хугацаанд МАНАН гэдэг улс төрийн хүчин монголчуудын амьдралыг яаж сүйрүүлж байгааг монгол хүн болгон мэдэж байгаа. Монгол Улсын өр ширийг хар, 34 тэрбум ам.доллар болсон. Баян ядуугийн эрс ялгаа гарсан. 300 айл эдийн засгийн ашиг шимийг хүртэж, нийт эдийн засгийн 90 хувийг монопольдож байна.

Шинэ нам нь мафижсан мафийг зайлуулъя гэж тухайн үеийн шударга тав,  одоогийн хулхи тав/Ерөнхий сайд Л.Оюун-Эрдэнэ, УИХ-ын гишүүн асан Т.Аюурсайхан, Ж.Батзандан,  Улаанбаатар хотын захирагч Х.Нямбаатар, Элчин сайд Л.Болд/- ыг дэмжиж ажилласан. Улс орондоо хөгжлийн шинэ зам нээж, шинэ үзэл санааг түгээх гэж 2019 онд энэ намыг байгуулсан. Ж.Батзандан дэмжиж ажиллаж байсан хэдий ч үзэл санаанаасаа урваж байна, итгэл үнэмшлээсээ урваж байна, анд нөхдөөсөө урваж байна. Ийм хүн ард түмний төлөө ажиллаж чадахгүй, ард түмнээсээ урвах болно.

Бид бүгдийн дэвшүүлсэн үзэл санааг залуус мянга, мянгаараа дэмжиж байна. Бодлогоор төрөө байгуулах цаг болсон. Нам дамжсан урвагчдыг 34 жил тэжээж ирлээ.  Ирээдүй хойч үеэ бодож,  тусгаар тогтносон Монголыг дахин өндийлгөх шаардлагатай байна” гэв.

Г.ХОРОЛ