Франц улсын Ноонт хотноо 2023 оны аравдугаар сарын 14-нд "Чингис Хаан монголчууд дэлхийг өөрчилсөн нь" үзэсгэлэн нээлтээ хийсэн билээ. Монгол, Франц улсын Ерөнхийлөгчдийн ивээл дор зохион байгуулагдаж, тавдугаар сарын 5-нд хаалтаа хийсэн энэхүү үзэсгэлэнгийн хүрээнд бид 6 сар үргэлжилсэн монгол соёлын улирлыг зохион байгуулсан юм. Үүний хаалтын арга хэмжээ болгож, 2024 оны дөрөвдүгээр сарын 20, 21-ний өдрүүдэд Бретанийн Гүнгийн Цайз – Ноонт хотын Түүхийн Музейд зохион байгуулсан Монгол Соёлын Хаврын Наадамд маань 4500 орчим хүн оролцлоо. Үзэсгэлэнгийн амжилтыг илтгэх тоо баримтуудаас дурдвал, үзэсгэлэн дэлгэгдсэн хугацаанд нийт 200 мянга гаруй үзэгчид зорин ирж үзсэнээс гадна, үзэсгэлэнгийн каталог нь даруй 3 дахь хэвлэлтдээ ороод байна.
Соёлын улирлын 24 арга хэмжээгээр Ноонт хот 6 сарын турш Монгол соёлоор амьсгалж, 25 мянга орчим хүн Монгол оронтой язгуур урлаг болон орчин үеийн хөгжим, яруу найраг, монгол бичиг, уран зураг, кино урлаг, идээ ундаа, уран зохиол, бие биелгээ, соёлын биет бус өвөөр нь дамжуулж танилцсан билээ. Ийнхүү, Чингис Хааны үзэсгэлэнг 2023 оны 10-р сард нээгдсэнээс нь хойш 6 сар үргэлжилсэн Монгол соёлын улирал нь цар хүрээ, ач холбогдлын хувьд урьд хожид болж байгаагүй томоохон арга хэмжээ болж өнгөрлөө.
Монгол, Франц хоёр улсын Ерөнхийлөгчдийн ивээл дор, Францын хувьд үндэсний ашиг сонирхлын хэмжээний үйл явдал болсон энэхүү түүхэн үзэсгэлэн нь ийнхүү амжилттай өндөрлөж, олон улсад аялах гараагаа Монгол улсаар эхэлж байгаа юм. Тодруулбал, 2024.07.03-08.25-нд уг үзэсгэлэн нь Улаанбаатар хотноо, Чингис Хаан музейд толилуулагдаж, олны хүртээл болох юм.Монгол Соёлын Хаврын Наадам – Үзэсгэлэнгийн соёлын улирлын хаалтын арга хэмжээ 2 өдөр үргэлжилсэн Монгол Соёлын Хаврын Наадмын хүрээнд үндэсний бөхийн барилдаан, сурын харваа, шагайн болон шагайн нумт харваанаас гадна, монгол бичиг, монгол зураг, хөөмий, шагайн наадгай, буриад бүжгийн хичээл, монгол идээ ундааны танилцуулга, Монголын тува хөөмийн тоглолт, Монгол туулийн тоглолт, Монголын талаар мэргэшсэн зохиолчидтой хийх уулзалт зэрэг соёл, урлаг спортын 18 үйл ажиллагаа зохион байгуулагдсан ба эдгээрт нийт 4500 орчим хүн ирж оролцсон юм. Монгол Соёлын Хаврын Наадмын соёл, урлагийн үйл ажиллагааг Нүүдэлчин Зам Холбоо, Брөтанийн Гүнгийн Цайз – Ноонт Хотын Түүхийн Музейтэй хамтран зохион байгуулсан бол, наадмын тэмцээн уралдааныг Монголын үндэсний бөхийн холбооны Европ дахь салбар холбоо, Монголын шагайн нумт харвааны холбооны харъяа Европ дахь нэгдсэн салбар холбоо, Францын шагайн харваан холбоод тус тус хариуцан ажилласан юм.
Монгол Соёлын Хаврын Наадмын талаар Францын хэвлэл мэдээллийн найман байгууллага ярьж түгээсэн бол, Монголын Үндэсний Олон Нийтийн Телевизийн Чех улс дахь сурвалжлагч, зураглаач нар уригдан ирж, “Чингис Хаан. Монголчууд Дэлхийг Өөрчилсөн нь” үзэсгэлэнгийн голлох хүмүүс, Наадмын үеэрх арга хэмжээдийг хөтлөн эрхлэгчид болон монгол гадаад үзэгч олноос ярилцлага авсан билээ. Түүнчлэн, Монголын Үндэсний Бөхийн Холбооны зураглаач Наадмын арга хэмжээг сурвалжилсан болно.
Монгол Соёлын Хаврын Наадмын хүрээнд зохион байгуулагдсан соёл, урлаг, спортын арга хэмжээдийн хуваарь, хөтлөн явуулагчид болон оролцсон үзэгч олны тоон мэдээ, Францын хэвлэлүүдэд гарсан тойм сэлтийг дараах поостны зураг тус бүрийн тайлбараас харна уу:
https://www.facebook.com/photo/?fbid=1240155007225640&set=pcb.1240285980545876
Нүүдэлчин Зам Холбоо
Сонирхуулахад, Нүүдэлчин Зам Холбоо нь 2006 оноос хойш Монголын биет бус өвийг хадгалж хамгаалах, соёл урлагийг Барууны орнуудад сурталчлан таниулах, түгээн дэлгэрүүлэх үйл ажиллагаагаар мэргэшиж ирсэн бөгөөд, үүгээрээ ЮНЕСКО-гийн итгэмжлэл хүртсэн цорын ганц гадаад байгууллага гэдгээрээ онцлогтой. Ийнхүү 18 жилийн хугацаанд жил бүр Монгол уран бүтээлчдийг урин авчирч аялан тоглолт зохион байгуулж, цомог бүтээж ирснээс гадна, соёлын өвийн менежментийн олон төрлийн үйл ажиллагаа эрхлэн явуулж байгаа ба одоогоор нийт 40 гаруй монгол уран бүтээлчийг дэлхийн 15 орчим улсад урин тоглолт, сургалт, уулзалт, үзэсгэлэн зэрэг олон талт үйл ажиллагаа зохион байгуулж, 6 цомог, 2 баримтат кино бүтээгээд байна. Тус холбоо нь мөн ЮНЕСКО-гийн хөтлөн эрхэлдэг Хүн Төрөлхтний Соёлын Биет бус Өвийн Төлөөллийн Жагсаалтад Монгол хөөмийг бүртгүүлэх баримт бичгийг гардан үйлдсэн билээ. Монгол Соёлын Хаврын Наадмын талаарх сурвалжлагууд
Наадмын нээлт:
https://www.youtube.com/watch?v=GZ4EXyS19iM&list=PLRdACSsKXTxeREF8hjYRaKlPs8XWQp5uj&index=1
Наадмын урлаг, соёл, спортын үйл ажиллагаад:
https://www.youtube.com/watch?v=sZhpjVDNav8&list=PLRdACSsKXTxeREF8hjYRaKlPs8XWQp5uj&index=

Соёлын улирлын хүрээнд болж өнгөрсөн арга хэмжээдийн талаарх тойм мэдээллийг дараах холбоосоос авч болно: 

https://mailchi.mp/0c3dcb85a34d/routes%02nomades-newsletter-september-15117910
Арга хэмжээдийн гэрэл зурагтай дараах холбоосоор орж танилцах боломжтой:

https://www.facebook.com/photo?fbid=1247449709829503&set=pcb.1247533726487768