Нийслэлийн Хан-Уул дүүргийн III хороо, Говийн замыг “Мишээл экспо”-той холбох зам “Эрэл” компани газар чөлөөлөхгүйгээс болж хойшилсоор жил гаруйн хугацаа өнгөрчээ. Иймээс Улаанбаатар хотын захирагч Х.Нямбаатар өчигдөр /2024.05.06/ “Эрэл”-ийн Б.Эрдэнэбат гэж Монголын бүхий л боломжийг насан туршдаа идэж, эцэст нь гадаадын казинод аваачиж уул уурхайн баялгийг устгасан гэмт хэрэгтэн. Төв цэнгэлдэх хүрээлэн тойрсон газар Б.Эрдэнэбатынх, Зүүн дөрвөн зам тойрсон хотын өөдтэй өнгөтэй бүх газрыг “Эрэл”-ийн Б.Эрдэнэбат авсан. Өвөрхангай аймгийн Уянга сумын газрыг “Эрэл”-ийн Б.Эрдэнэбат сүйтгэсэн. “Эрэл”-ийн Б.Эрдэнэбат СОТ-2-ыг авсан. Шүүхийн шийдвэр гарчихаад байхад яагаад хотын 800 га газрыг чөлөөлдөггүй юм. Замын ажил эхлэх ёстой. “Эрэл”-ийг буулгана гэж мэдэгдсэн юм.

Харин Харин “Эрэл” компанийн захирал Б.Эрдэнэбат өнөөдөр /2024.05.07/ мэдээлэл хийх үеэрээ “Хүний үл хөдлөх хөрөнгийн гэрчилгээтэй төмөр замыг хүн явуулж эвдүүлж байна. Хувийн өмчийг булааж авч болохгүй. Х.Нямбаатар дарга уучлал гуйх байх. Энэ үйл ажиллагаагаа таслан зогсоох байх гэж бодож байна. Надад Улаанбаатар хотод барьсан нэг амбаар ч байхгүй. Төв цэнгэлдэхийг тойроод хэн хамгийн олон барилга барьсныг Монголын ард түмэн надаар хэлүүлэлтгүй мэдэж байгаа.  Баримттай, нотлох баримттай нь гаргаж тавих ёстой. Х.Нямбаатарыг эрх мэдэл албан тушаалаа урвуулж, хүний нэр төрд халдсан асуудлаар хуулийн байгууллагад хандана” гэв.

Ердөө сар гаруйнхны өмнө гэр хорооллыг барилгажуулах төсөлд хамтарч ажиллах боломжтой талаар ярьж зогссон Улаанбаатар хотын захирагч Х.Хямбаатар, “Эрэл” компанийн захирал Б.Эрдэнэбат нарын дунд ийн газрын маргаан өрнөж байна. Нэг нь “Эрэл” компанийн эзэмшдэг газрыг хүчээр булааж, хувийн төмөр замыг эвдэх нь хуулиас давсан дарангуйлал гэж мэдэгдэж байгаа бол нөгөө нь Улаанбаатар хотын эзэмшил газрыг Б.Эрдэнэбат өгөх ёстой гэж үзэж буй.

Маргаанд хэн нь ялах вэ гэдэг нь шүүхээр асуудал орж байж л шийдэгдэж мэдэх нь ээ.

Г.ХОРОЛ