БНХАУ-ын дарга Ши Жиньпин Ням гаригт эхлэх зургаан өдрийн айлчлалынхаа хүрээнд Европын гурван улсын  удирдагчидтай хэлэлцээ хийнэ. Тэрбээр Франц, Серби, Унгарт айлчилна. Ингэснээр, Хятадын удирдагчийн сүүлийн таван жилийн хугацаанд Европт хийж буй анхны айлчлал болно.

Францад Ши Жиньпин  ерөнхийлөгч Эммануэль Макронтой уулзахаар төлөвлөжээ. Тэд хоёр орны харилцаа, Украин болон Ойрхи Дорнод дахь нөхцөл байдлын талаар хэлэлцэх юм. Энэхүү айлчлал нь Хятад Франц дипломат харилцаа тогтоосны 60 жилийн ойтой давхцах юм. Түүнчлэн  Ши Жиньпин ерөнхийлөгч Макрон болон Европын комиссын дарга Урсула фон дер Лейен нартай гурван талт хэлэлцээ хийх төлөвтэй байна. Тэд Хятад, Европын холбооны харилцааг хэлэлцэх юм.

Францын айлчлалын дараа Сербийн Ерөнхийлөгч Александр Вучичтай уулзах төлөвтэй байна. Мөн Унгарт Ерөнхий сайд Виктор Орбантай уулзана. Удирдагч нар Хятадын “Бүс ба зам” санаачилгын хүрээнд ямар үр дүнд хүрсэн талаар ярилцана. Ши Жиньпиний айлчлал Хятад, Европын харилцаанд чухал ач холбогдолтой гэж Хятадын Гадаад хэргийн яам үзэж байна. Мөн энэхүү аялал нь дэлхийн энх тайван, хөгжилд хувь нэмэр оруулна гэдэгт итгэлтэй байна. Ши Жиньпин саяхан Хятадад Германы канцлер Олаф Шольц, Голландын Ерөнхий сайд Марк Рютте нартай уулзсан. Бээжин АНУ-ыг хяналтандаа байлгахын тулд Европын орнуудтай харилцаагаа бэхжүүлэхийг хичээж байгаа бололтой. Учир нь хоёр улс аюулгүй байдал, дэвшилтэт технологийн асуудлаар хоорондоо зөрчилддөг.

Эх сурвалж: BBC