УИХ-ын чуулганы Баасан гаригийн хуралдаанаар Хот тосгоны эрх зүйн байдлын тухай хуулийн төслийг хэлэлцэх үеэр УИХ-ын гишүүн Т.Доржханд “Парламентын ордон руу нохойтойгоо ч орж ирдэг чөлөөтэй, нээлттэй болох ёстой” гэдэг асуудлыг хөндөв.

Энэ тухай тэрбээр “Ерөнхийлөгчийн ордныг Өвөрхангай руу, Хархорин руу нүүлгэх хэрэгтэй. Ерөнхийлөгч өөрөө ч гэсэн дэмжиж, зөвлөгөө өгөөч гэж байсан. Улаанбаатар хотод парламентын байшинг үлдээх хэрэгтэй. Монгол Улс бол парламентын засаглалтай улс юм. Төрийн шийдвэр гаргадаг бүтэц бол парламент юм. Парламентын байшинд иргэд нь чөлөөтэй орж ирдэг байх ёстой.  Чөлөөтэй орж ирэх гэхээр төрийн бүтцүүд нь байгаа учраас болохгүй байгаа. Засгийн газар нь энэ дотроо байгаа, учраас заавал костюмтэй, зангиатай, гуталтай байхыг шаарддаг. Хоёр давхрыг Засгийн газар дүүргээд байгаа. Гурван давхрын тал жигүүрийг Ерөнхийлөгчийн инстутци нь дүүргээд байгаа. Төр нь энэ саарал ордондоо чихцэлдээд байгаа учраас иргэд нь орж чадахгүй байгаа юм. Парламентын гаднах хашааг буулгах хэрэгтэй. Ногоон байгууламжаа нэмэх хэрэгтэй. Парламент нь парламентын ордондоо байдаг. Парламентын ордондоо иргэд нь хүүхэдтэйгээ чөлөөтэй орж ирдэг, хөгжлийн бэрхшээлтэй иргэд нь орж ирдэг. Нохойтойгоо орж ирдэг чөлөөтэй болгох хэрэгтэй. Дэлхийн парламент ийм л байдаг шүү дээ.  Ийм байдлаар нээлттэй парламентын засаглалаа бэхжүүлээд явах нь зүйтэй байгаа юм аа” гэж саналаа хэлсэн юм.

Харин олон нийтийн зүгээс “Парламентын ордондоо нохойтойгоо орох нь ч юу вэ. Иргэд нь чөлөөтэй ордог байхад л болно. Ер нь иргэд нь зарим баян айлын нохойноос дорд амьдарч байхад Т.Доржханд парламентын ордон руу иргэд нь нохойтойгоо чөлөөтэй ордог болох ёстой гэх асуудал хөндөж суугаа нь амьдралаас хэт тасарсны илрэл" гэж шүүмжилж байна.

Төрийн ордонд Ерөнхийлөгч, УИХ, Засгийн газар байрлаад олон жилийн нүүрийг үзэж буй. Аюулгүй байдал талаасаа эрсдэл дагуулж байна гэдэг асуудал олон жилийн туршид яригдаж, парламентын ордныг шинээр барих асуудал хөндөгдөж ирсэн ч газар олдохгүйгээс шийдвэрлэж чадалгүй өнөөдрийг хүргэсэн. Харин Монгол Улсын Үндсэн хуульд нэмэлт өөрчлөлт оруулж, УИХ 126 гишүүнтэй болох болсноор Төрийн ордноос Ерөнхийлөгчийн Тамгын газар, Засгийн газрыг нүүлгэж, Төрийн ордонд УИХ дангаараа үлдэх болоод байна. Ингэхийн тулд Засгийн газрыг Хөшигийн хөндий орчмын Номтын ам руу нүүлгэхээр төсөлд заасан бол Ерөнхийлөгчийн Тамгын газрыг Өвөрхангайн Хархорин руу нүүлгэн шилжүүлэх асуудал хөндөгдөөд буй юм.

Г.ХОРОЛ