АНУ-ын Ерөнхийлөгч Жо Байден өнгөрсөн Лхагва гарагт "TikTok"-ийг хориглох хуулийн төсөлд гарын үсэг зурсан нь тус компанийн АНУ дахь үйл ажиллагаанд томоохон аюул занал учруулж байна.

Ерөнхийдөө Байден хуулийн төсөлд гарын үсэг зурснаар "TikTok"-ийн толгой компани Хятадын "ByteDance"-д бүтээгдэхүүнээ зарах 270 хоногийн хугацаа өгчээ. Хэрэв бүтээгдэхүүнээ зарахгүй бол Америкт "TikTok"-ийг ашиглах боломжгүй болох аж. Бүтээгдэхүүнээ зарах сүүлийн хугацаа нь 2025 оны нэгдүгээр сарын 19 бөгөөд энэ хугацааг дахин 90 хоногоор сунгах боломжтой гэнэ.

ЯАГААД "TIKTOK"-ИЙГ ХОРИГЛОХ БОЛОВ?

"TikTok" бол Хятадын "ByteDance" компанийн бүтээгдэхүүн. Тиймээс АНУ-ын эрх баригчид иргэдийнхээ хувийн мэдээлэл, аюулгүй байдлыг хамгаалж, гадаадын аппликейшн, бүтээгдэхүүнийг хориглох хүсэлтэй буй.

"ТIKTOK"-ИЙН ЗҮГЭЭС ЯМАР ТАЙЛБАР ӨГСӨН БЭ?

"TikTok" ч зүгээр суухыг хүсэхгүй байна. Саяхан тус компанийн гүйцэтгэх захирал Шоу Зи Чюгийн нийтэлсэн бичлэгт "Та бүхэн итгэлтэй байж болно. Бид хаашаа ч явахгүй. Шүүх дээр та бүхний эрхийн төлөө тэмцэх болно. Баримт болон Үндсэн хууль бидний талд байна. Тиймээс ялна гэж найдаж байна" гэжээ.

"TikTok"-ийн зүгээс дээрх хуулийн төслийг "Үндсэн хууль зөрчсөн" гэж нэрлээд, энэ нь тус платформын АНУ-ын 170 сая хэрэглэгч болон уг аппликейшн дээр ажилладаг долоон сая бизнесийг сүйрүүлнэ гэв.

"TIKTOK"-Д ЯМАР СОНГОЛТ ҮЛДСЭН БЭ? 

Хэрэв "TikTok" тогтоосон хугацаанд "ByteDance"-аас салж чадахгүй бол АНУ-ын хэрэглэгчид ирэх оны нэгдүгээр сарын дундуур хайртай платформдоо баяртай гэж хэлэхээс өөр аргагүйд хүрнэ.

Энэ оны нэгдүгээр сард гаргасан судалгаагаар АНУ-ын 12 болон түүнээс дээш насныхны 35 хувь нь "TikTok" хэрэглэж байна. Энэ үзүүлэлтээрээ "Facebook", "Instagram"-ийн араас бичигджээ.

Хэрэв "TikTok" шүүхэд хандвал энэ хэрэг удаан үргэлжлэх гэнэ.

Мөн худалдах тал дээр ч асуудал гарчээ. Тодруулбал, "TikTok"-ийн толгой компани Хятадын хууль тогтоомжид захирагддаг бөгөөд Хятадын засгийн газар "TikTok"-ийг зарахыг эсэргүүцэж байгаа аж. Гагцхүү "TikTok"-ийн алгоритмыг Хятадын засгийн газар Америкт алдахыг хүсэхгүй байна. Хэрэв худалдаалах болвол алгоритмгүй зарах боломжтой байж магадгүй. Гэхдээ "TikTok" өөрийн тусгай алгоритмгүй үнэд хүрнэ гэдэг учир дутагдалтай.