Дулаан цаг ирж буй учир "Хөгжимт усан оргилуур"-ын ажиллах нөхцөлийг бүрдүүлж, цэвэрлэгээ ариутгал хийж байна. Төв талбайн усан оргилуур өнгөрсөн жил төвийн шугамд холбогдож, ус зөөхөө больсон талаар албаны хүмүүс мэдээлсэн. Хэтийдсэн төсвөөр үр ашиггүй үзүүлэн бэлдсэнд иргэд таатай ханддаггүй. Тэр бүү хэл усан оргилуур руу ус зөөж, ажиллуулж байгаа нь дотоодын гэлтгүй гадаадын хүмүүсийн гайхшлыг төрүүлж байв. Харин 2023 оноос усан оргилуур төвийн шугамд холбогдсон бөгөөд энэ жил гараар ус зөөхгүй гэсэн юм. Удахгүй буюу ирэх долоо хоногт ажиллаж эхлэх усан оргилуурын талбайг иргэд өөрөөр ашиглаж болох байсанд санал нэгддэг. Гэвч нэгэнт хийсэн бүтээн байгуулалтыг нурааж болохгүй нь лавтай.

Усан оргилуур ажиллаагүй хонхтой цэцэрлэгт хүрээлэнд одоогоор залуус сууж, зарим нь чөлөөт цагаа өнгөрөөдөг.

Улаанбаатар хотод өнгөрсөн жилүүдэд нийт 145 усан оргилуур байгуулсан ч ердөө 50 орчим нь л ажилладаг аж. Хонхтой цэцэрлэгт хүрээлэнгийн бүтээн байгуулалтын хүрээнд 7200 м2 ногоон байгууламж хийж, 84м урт 23.6 өргөнтэй гэрэлт болон хөгжимт усан оргилуур, монгол гэрийн хэлбэр бүхий шилэн пасадан шийдэлтэй хөгжлийн бэрхшээлтэй болон иргэдэд үйлчлэх хоёр нийтийн бие засах газар, хүмүүсийн амарч суух зориулалттай зургаан ширхэг саравч, дөрвөн эгнээ шаталсан суудал бүхий хагас дугуй хэлбэрийн 800 м2 задгай талбайг бий болгосон. Гэхдээ цар тахлын үед хүмүүсийн бөөгнөрөл, халдвар хамгааллын дэглэмийг сахиж, цагийн хуваарьтайгаар ажиллаж байв.

Төв талбайн усан оргилуурыг Хотын дарга асан С.Амарсайхан цар тахлын үед 3.2 тэрбум төгрөгөөр барьж байгуулсан нь тухайн үед шүүмжлэлийг дагуулж байсан.

Ингэхдээ Сүхбаатарын талбайн урд хэсэгт байрлах 1.6 га талбай бүхий Хонхтой цэцэрлэгт хүрээлэнд усан оргилуур барьж, ногоон байгууламжийг нь сэргээн засварлах ажилд нийтдээ гурван тэрбум гаруй төгрөг зарцуулахаар төлөвлөж байлаа.