-Хэвлэл мэдээллийн байгууллагууд өөрийнхөө мэргэжлийн үйл ажиллагааг худалддаг болжээ. Хэн гэхээр улс төрийн эрх мэдэл бүхий хүмүүст тэд эрх чөлөөгөө худалддаг болсон. Эрх чөлөөгөө эрх баригчдад худалдаж байна гэдэг нь тухай хэвлэл чөлөөт хэвлэл байж чадахгүй гэсэн үг. Харин худалдагдахгүй байгаа хэвлэл мэдээллийн байгууллагыг нь дарамталж эхэлж байна. Өөрөөр хэлбэл, чөлөөт хэвлэлийн байр сууриа хадгалсныг нь дарамталж байна. Үнэн хэрэг дээрээ Монголд хэвлэлийн эрх чөлөө хүнд нөхцөлд байна. Монголд хэвлэлийн эрх чөлөө устаж байна гэж хэлж болно. Хэвлэлийн эрх чөлөөний орон зайг олон нийтийн сүлжээ эзэлж байна. Олон нийтийн сүлжээ, иргэд чөлөөт хэвлэлийн үүргийг гүйцэтгэж байна

Мэдээллийг шуурхай иргэдэд хүргэх тал дээр их дутмаг болж. Тийм учраас иргэд олон нийтийн сүлжээгээр л мэдээлэл солилцдог болжээ. Мэргэжлийн сэтгүүлч олон нийтийн сүлжээнд явж байгаа мэдээллийг мэдээ болгож чадах ур чадвартай байх ёстой. Тэр чадвараа бүрэн гаргаж чадахгүй байна. Сэтгүүл зүйн салбарыг дөрөв дэх засаглал гэж зүгээр ч нэг санамсаргүй хэлчихээгүй. Ардчилсан нийгмийг хамгаалах том багануудын нэг нь хэвлэлийн эрх чөлөө. Жишээлбэл, хараат бус шүүх, парламентат ёстойгоо дүйцэхүйц хэмжээнд чөлөөт хэвлэлийн институци байх ёстой.  Гэтэл тэгж чадахгүй, технологийн дэвшил рүү буруугаа чихэж байна. Эрх бүхий албан тушаалтнууд олон түмэнд хэрэгтэй, сенсаци тарих хэмжээний мэдээллийг хийж байхад сэтгүүлчид тэрийг нь мэргэжлийн түвшинд мэдээ болгож чадахгүй байна. Олон нийтийн сүлжээнд хэзээ ч тийм мэдээ "үйлдвэрлэж" чадахгүй шүү дээ. Нөгөө талаас ажлаа хийж байгаа сэтгүүлчдийг хуулиар далайлгах явдал  ч гарч байна. Заримдаа сэтгүүлчид өөрсдөө энэ боолчлолд дуртай байгаа юм шиг харагддаг.

-“Freedom house”-аас гаргасан судалгаагаар Монгол Улс 2015 онд дээгүүр гарч ирээд, тэрнээс хойш тогтмол байр ухарч байгаа. Олон улсын индекс яагаад ухраад байна гэхээр Монгол Улсын хэмжээнд сэтгүүлчид чөлөөтэй ажиллаж чадахгүй, мэргэжлийн үйл ажиллагаагаа явуулах боломжгүй, үг хэлэх, үзэл бодлоо илэрхийлэх эрх чөлөө хумигдаж байна гэсэн үг. Миний мэдэхийн сүүлийн хоёр, гурван жил сэтгүүлчдийг цагдаа шүүхээр айлгах, хууль барьж далайлгах тохиолдол нэмэгдэж байна. Ялангуяа Эрүүгийн тухай хуулийн 13.14 заалт буюу "Илт худал мэдээлэл тараах" гэдгээр маш их гул барьж байна. Өнгөц харахад, сэтгүүлч худал мэдээлэл тараасан гээд хөнгөн юм шиг харагдаж байгаа боловч өргөн агуулга, үйлдлийг хамруулж, зарим тохиолдолд өөрт ашигтайгаар ашиглах хүмүүс гарч ирж байгаа учраас сэтгүүлчид хуулийн байгууллагад дуудагдах боллоо.

Эрх баригчид сэтгүүлчдийг онцгойлон тойглож, мэдээллээ цацуулж байгаа байдал нь индекс ухрах нэг шалтгаан болсон. Сүүлийн жилүүдэд хэвлэл мэдээллийн салбарын гол санхүүжүүлэгч нь төр болсон. Уг нь хэвлэл мэдээллийн байгууллага мэдээллээ түгээж, хэрэглэгч мөнгөөрөө үзэж, уншаад, энэ салбарыг санхүүжүүлж байх ёстой. Бас нэг оролцогч тал нь зар сурталчилгаа гээд гурван талын тоглогч зах зээл дээр байх ёстой. Гэтэл одоо хэрэглэгч, үзэгч, уншигч байхгүй болж, тэр орон зайг төр эзэлж байгаа нь маш харамсалтай. Хэвлэл мэдээллийн зөвлөлд иргэд гомдол ирүүлдэг. Ингэхдээ сэтгүүлч мэдээ материал нийтлэхдээ мэргэжлийн ёс зүйн ийм алдаа гаргаж, буруу баримт ашигласан байна гэдэг. Хэвлэл мэдээллийн зөвлөл 2015 онд байгуулагдаад, ес дэх жилдээ ажиллаж байна. Энэ хугацаанд нийт 500 гаруй гомдол ирүүлснээс Ёс зүйн хороогоор авч хэлэлцдэг.

Тэгэхээр энэ салбарын тал нь ёс зүйн зарчмаа баримтлахгүй, мэдээ материал нь хуудуутай, баримтаа сайн нягтлахгүй, нэг талыг барьсан байна гэсэн үг. Тэр дундаа шууд мэдээллийг дамжуулах лайв дээр гомдол их ирдэг. Лайв дамжуулахад нэг эх сурвалж давамгайлж, бодит байдал гарахгүй байгаа учраас гомдол мэдээлэл их ирдэг.