УИХ-ын чуулганы үндсэн хуралдааны үдээс хойшхи хурал эхэллээ. 

УИХ-ын гишүүн Д.ТОГТОХСҮРЭН:

-2024 оны дөрөвдүгээр сарын 5-ны өдөр УИХ-д өргөн мэдүүлсэн Улсын Их Хурлын шинэчилсэн найруулгын төслийн болон хамт өргөн мэдүүлсэн УИХ-ын тогтоолын төслийн анхны хэлэлцүүлгийг эцсийн хэлэлцүүлэгт бэлтгүүлэхээр байнгын хороо руу шилжүүлсэн. Төрийн байгуулалтын байнгын хороо 2024 оны тавдугаар сарын 1-ний хуралдаанаар УИХ-ын тухай хуулийн шинэчилсэн найруулгын хуулинй төслийн эцсийн хэлэлцүүлгийг явууллаа. 

УИХ-ын дарга Г.ЗАНДАНШАТАР:

-Нийт гишүүдийн 58,3 хувь дэмжиж тогтоолын төсөл батлагдлаа. Байнгын хорооны саналаар цэргийн алба хаагчийн эрх зүйн байдлын тухай хууль болон Монгол Улсын хилийн тухай хуульд өөрчлөлт оруулах тухай, цагдаагийн алба хаагчийн хуульд нэмэлт өөрчлөлт оруулах тухай хуулийг дагаж мөрдөх журмын тухай хуультай хэлэлцүүлнэ. 

Санал хураалтаар хуулийн төслүүдийг үзэл баримтлалын хүрээнд дэмжихээр санал хураалт явуулахад 57,9 хувь нь дэмжлээ. 

УИХ-ын гишүүн Н.УЧРАЛ:

-Эмийн түр хороо ажлаа хариуцлагатай хийлээ гэж дүгнэж байна. Монголд эмч нарын чадвар биш эмийн чанар дутагдаж байна. УИХ-ын тогтоол дээр Licemed системийг хөгжүүлэх чиглэлээр Цахим хөгжлийн яам, Эрүүл мэндийн яам, Гаалийн ерөнхий газарт үүрэг өгч байгаа юм байна. Энэ системийн талаар бид мэднэ. 2015 оноос хойш Эрүүл мэндийн яаман дээр төсөл хэрэгжиж ард түмэн хишгийг нь хүртээгүй. Олон эмнэлэг хоорондоо мэдээллээ солилцож чадаагүй. Эмийн жорыг цахим дээр бүртгэдэг байсан ч эмийн санд мэдээлэл нь очдоггүй байсан. Эрүүл мэндийн цахимжилт 2015 оноос хойш зогссон. Licemed системийг дахин сайжруулах үүрэг өгөөд байх юм. Энэ компанийг хэн хамгаалаад байдаг юм. Дампуурсан байгууллагыг дахин сэргээж чадахгүй. 

УИХ-ын гишүүн Ж.ЧИНБҮРЭН:

– Licemed систем нь ЭМЯ-д бүртгэгдэж байгаа зүйл. Энэ программ ямар ч бүртгэлгүй эмийг гааль дээр ирэнгүүт бүртгээд байгаа юм байна шүү дээ гэдгийг хүлээж авч, Монголд орж ирэхэд дахин ямар ч хамгаалалтгүй тогтолцоо бий болсон. Тиймээс Засгийн газар, Цахим хөгжлийн яам энэ системийг онцгой анхаарч, сайжруулж, сэргээж өгөхийг хүсч байна. 

УИХ-ын гишүүн Н.УЧРАЛ:

-Сонсголын үеэр Ж.Чинбүрэн гишүүн маш анхаарах асуудлуудыг хөндсөн. Эрүүл мэндийн мэдээлэл бол хүний эмзэг мэдээлэл. Хүний эмзэг мэдээллийг хувь хүний зөвшөөрөлгүйгээр ашиглаж болохгүй. Гэтэл эмнэлгийн байгууллагууд өөр, өөр тасаг байсан ч мэдээллийг хардаг байсан. Харин одоо хуулиар энэ байдлыг зогсоосон. 

УИХ-ын гишүүн Б.БАТ-ЭРДЭНЭ:

-Түр хороо үр дүнтэй сайн ажилласан гэж бодож байна. Эмийн салбарт ашиг сонирхлын зөрчилтэй хүмүүс байна. Тэр хүмүүст хэн, ямар хариуцлага тооцох вэ? Нэг шийдвэр гаргахаар нөгөө талаас нь гуд татдаг хувийн ашиг сонирхолтой бүлэг байдаг. ЖДҮ зээл дээр ч ажиглагдаж байсан. Түр хороо байгуулагдаад ирэхээр баахан нэр зарлаж, шалгах ажиллагаа явуулаад хаячихдаг. 

Иргэдийн мэдэх эрхийг хангаж байгаа үйл явдлыг буруутгах аргагүй. Гэхдээ хариуцлагын тогтолцоог сайжруулах хэрэгтэй. 

УИХ-ын гишүүн Г.ГАНБОЛД:

-Гадаад руу явуулсан шинжилгээний сорьц, дотоодод шинжлүүлсэн хариутай таарч байгаа юу. Ноцтой хариулт гарсан эсэх. Анагаахын шинжлэх ухааны эм шинжлэх лабораторийн хариу бүгд зөрсөн гэж үнэн үү. Тэгэхээр лабораториудын хариунууд зөрүүтэй гараад байгаа нь хамгийн анхаарах асуудал юм биш үү. Өчнөөн хуурамч эм зах зээлд нийлүүлэгдсэн юм биш биз. 

Нөгөө талаасаа хүмүүсийн хамаарал гарч ирж, үгүйсгэж байна. 

Хяналт шалгалтын одоо явж байгаа хуульд шинжээч буруу мэдээлэл гаргасан бол хариуцлага хүлээхийг тусгасан. Түр хороо мөн зарлаж байгаа хүмүүс нь хариуцлага хүлээдэг байх хэрэгтэй. Бид одоо эзэн хайгаад л эм чанартай байгаа эсэх, хэдэн төгрөгний ашиг олж байгааг нь олох гээд хэт хэлбэртэж байна. 

УИХ-ын гишүүн Ж.ЧИНБҮРЭН:

-Хамгийн ноцтой гурван жишээг нэрлэе. Нэг дэх нь, одоо үйл ажиллагаа явуулж буй улсын тодотголтой хоёр лабораторийн хариу зөрч гарсан. ХАБУЛ-ын дэргэдэх лабораторийн хариу тэнцэхгүй гэж гарсан. Харин АШУҮИС-ийн лаборатори дээр хариу нь болно гэж гарсан. Хүний эмийн зөвлөл ч хээв нэг батлаад гаргадаг тохиолдол байна. Лабораториос дүгнэлт гарсан бол түүнийг нь заавал шалгах хэрэгтэй. 

Цахим систем эрүүл мэндийн салбарт байхгүйгээс хүнээс хамааралтай асуудлууд их гарч байна. 

Өргөн хэрэглээний 10 эм дээр чанарын зөрүү гараагүй. Эмийн хүнд нөлөөлөх нөлөөллийг судалдаг тогтолцоо Монголд байдаггүй. Эмийн түүхий эдийн цэвэршилтээс хамаараад нөлөөллийг судалж байж хэрэглэж болох эсэх нь тогтоогдоно. 

Тэгэхээр шийдвэр гаргалтын түвшинд байгаа хамаарал бүхий хүмүүсийн асуудлыг шийдэх ёстой. Дараагийн нэг зүйл бол нийтийн мэдээллийн ил тод байдлын тухай хуулиар хүний авч байгаа эм хэдэн төгрөг нэмэгдэж, гар дээр нь ирж байгааг тогтоох. Иргэн эмийн санд орж эм худалдаж авахдаа тэр компанийн эмийг хэдэн хувь нэмэгдэж байгааг харж авна гэсэн үг. 

УИХ-ын дарга Г.ЗАНДАНШАТАР:

Хүний эрх, эрх чөлөөний байдлын 23 дахь илтгэл, 2023 оны эрүүдэн шүүлтээс урьдчилан сэргийлэх үйл ажиллагааны тайланг хэлэлцсэнтэй холбогдуулан авах арга хэмжээний тухай УИХ-ын тогтоолын төслийг батална гэсэн томъёоллоор санал хураалт явуулъя. 59 хувийн саналтайгаар батлагдлаа. 

Дараагийн санал хураалт. Эмийн үнийн шалтгаан нөхцлийг хянан шалгах үүрэг бүхий хянан шалгах түр хорооны сонсголын тайлантай холбоотой санал дүгнэлт, тогтоолын төсөл, түр хорооны санал дүгнэлттэй холбоотой асуудлыг түр хорооны гишүүн хянан шалгах түр хорооны дарга Ж.Чинбүрэн танилцуулна.

УИХ-ын гишүүн Ж.Чинбүрэн:

-Түр хороонд иргэдээс эмийн чанар болон үнэ, төрийн хүнд сурталтай холбоотой олон баримт мэдээлэл цугларсан. Цаасан баримтуудаас гадна гааль, боомтууд дээр бүрэлдэхүүн очиж шалгаж, эмийн болон гаалийн хяналтын ажилтай танилцсан. 2023 оны 60 дугаар тогтоолоор байгуулагдсан 

Нийт 119 гэрчээс 83,2 хувийг оролцуулж тайлбар мэдээлэл авсан болно. 

Тухайлбал, 2024 оны дөрөвдүгээр сарын 15-ны эхний өдрийн сонсголоор хүртээмжийн асуудлыг шинжлэн судалсан болно. 

Эм, эмийн хяналт зохицуулалтын газраас 2021, 2023 онд эмнэлгийн хэрэгсэл үйлдвэрлэх болон ханган нийлүүлэх тусгай зөвшөөрлийг олгож ажилласан тусгай зөвшөөрлийн комиссын гишүүн болон шинжээчээр ажиллаж байсан, ажиллаж байгаа 31 албан тушаалтан хамрагдсанаас 90 хувь нь эм ханган нийлүүлэх аж ахуй нэгжүүдтэй холбоотой байсан. Нийслэлийн эрүүл мэндийн газар 51 албан тушаалтан хамрагдсанаас 18 албан тушаалтан эм ханган нийлүүлэмжийн компанитай хамаарал бүхий байсан. Аймгийн эрүүл мэндийн төвүүд дэх 146 албан тушаалтнаас 24,6 хувь нь хамаарал бүхий гарсан. Хянан шалгах түр хороонд цугларсан баримт бичгүүдийг түр хорооноос хууль хяналтын байгууллагад шилжүүлэн, төрийн байгууллага дахь эм ханган нийлүүлэх компаниудын ашиг сонирхлын зөрчлийн асуудлыг шалгаж, иргэд олон нийтэд нээлттэй мэдээлэхийг УИХ-ын тогтоолд тусгасан болно. Тогтоолын төсөл нийтдээ үндсэн хоёр, задаргаагаар 14 зүйл заалтыг Засгийн газарт үүрэг болгохоор тусгасан байгаа. 

УИХ-ын гишүүн Д.ГАНБАТ: 

-Соёлын тухай хуулийг дэмжиж байгаа. Гэхдээ бид сайн ажиллаж, анхаарах хэрэгтэй. Дутуу дулимаг боловсруулсан төслийг оруулж ирж болохгүй. Заримдаа Засгийн газар МАН-ын хуулийн нэгж шиг байх юм. Соёлын яаманд маш их төсөв баталж өгдөг. Ганцхан "The Hu" хамтлаг гэхэд соёлын нөлөөллийн ажлыг амжилттай явуулж чадаж байна. Энэ бол соёлоо түгээж байгаа хэлбэр. Ингэж ажиллаж байна. Түүнтэй харьцуулахад 400 тэрбумын санхүүжилттэй Засгийн газар муу ажилалж байна. Хэдэн арван телевизээр нэгэн зэрэг контент цацаад хүмүүсийн тархийг угааж байгаа нь утгагүй. 

Давхар дээлтэй сайд хэтэрхий олон байгаа нь дарамт учруулж байж магадгүй. 

Хууль сайжруулахын төлөө л би ярьж байна. Тэгвэл больчихъё. Бид Солонгосоос суралцах хэрэгтэй. Монголчууд арвин баялаг түүх соёлтой. Гэтэл ажиллаж байгаа байдал нь явцгүй байна. 

УИХ-ын гишүүн Н.УЧРАЛ:

-Энэ хууль УИХ дээр удлаа. 2019 онд уран бүтээлчид нэгдэж оюуны өмчийг эдийн засгийн эргэлтэд оруулах төслийг санаачилж, би өргөн барьж байсан. Тухайн үед хууль батлагдсан. Оюуны өмчийн хуулиар нэгдүгээрт, материааллаг бус баялгийг үнэлэх тогтолцоог бий болгосон. Зохиогчийн эрхээр баталгаажсан бүтээгдэхүүнийг банканд тавьж зээл авах боломж бүрдүүлсэн гэсэн үг.  

Олон улсад өрсөлдөх бодит өрсөлдөөнийг бий болгоход зохиогчийн эрхийн гэрчилгээ, барааны тэмдэгтийг үнэлэх нь чухал. Соёлын бүтээлч үйлдвэрлэлийн хууль бол Оюуны өмчийн хуулийг хэрэгжүүлэхэд нөлөөтэй. 

Соёлын салбарт нэг л мэргэжлийн холбоо гарна. Одоо зөв тогтолцоо руу шилжих хэрэгтэй. 

УИХ-ын гишүүн Б.ПҮРЭВДОРЖ:

-Соёлын салбарт, тэр дундаа хувь уран бүтээлчид уран бүтээлээ дотоодод болон гадаадад хэрхэн хүргэх вэ гэдэг дээр анхаарч ажиллах нь чухал. Тиймээс Засгийн газрын журмууд хуулиасаа давсан журам гардаг гэдгийг анзаарах хэрэгтэй. 

УИХ-ын гишүүн, Үйлдвэржилтийн бодлогын байнгын хорооны дарга Г.ГАНБОЛД:

-Улсын болон орон нутгийн өмчийн соёл урлагийн байгууллага нь удирдлага, урын сангийн бодлогын болон засаглалын үйл ажиллагаанд дэмжлэг үзүүлэх чиг үүрэг бүхий удирдах зөвлөлтэй байна. Удирдах зөвлөлийн ажиллах үүргийг Засгийн газар хариуцна. Удирдах зөвлөл дэмжлэг болохоос илүү тээг саад болно гэж харж байна. Байгууллагын үйл ажиллагаанд гацаа үүсдэг энэ байдлыг зогсоох хэрэгтэй. 

Төрийн болон орон нутгийн өмчийн байгууллага гэхээр бүгдэд хамааралтай гэж ойлголоо. 

Тэгэхээр үүнийг анхаарах хэрэгтэй. 

УИХ-ын гишүүн, Олимп, нийтийн биеийн тамир, спортын үндэсний хорооны дарга Б.БАТ-ЭРДЭНЭ:

-Боловсон хүчний боловсролд ч анхаарах хэрэгтэй. Эерэг хандлага, нийтийн нөлөөллийн ажлуудыг биеийн тамир, спорт, соёлын салбарынхан ихээхэн анхаарах хэрэгтэй болж байна. Хүн хүнтэйгээ мэндлэхээс эхлээ хайр, хүндэтгэл үгүй болж байна. Учир шалтгаан нь дээр байгаа хүмүүсээс эхэлсэн. 

Гол үүрэг гүйцэтгэх Соёлын яам анхаарах хэрэгтэй. 

УИХ-ын гишүүн Д.ГАНБАТ:

-Соёл, шинжлэх ухааны тухай хууль маш чухал. Бид өнөөдөр дэлхийгээс маш их хоцрогдож байна. Супер компьютерүүд хүртэл ороод ирсэн байхад бид бүжиглэж, дуулаад хэдэн өвөрмонгол шиг л байна. Би өмнө нь ч хэлж байсан. Байгалийн шинжлэх ухаан байхгүй болоод байна шүү. Өнөөдөр багш нарын цалин ямар байгаа билээ. Ийм мэргэжилтнүүд бэлтгэхгүйгээр бид хол явахгүй. 

Математик, физик, химийн багш нарын цалинг таван сая төгрөгөөс дээш болгох ёстой. 

Муу байгаа зүйлсээ ярьж хэлж чадахгүй байж болж байгаа мэт бөөн мөнгө тавиад байдаг буруу. 

УИХ-ын гишүүн Ёс зүй, сахилга хариуцлагын байнгын хорооны дарга Б.БАТТӨМӨР:

-Шинжлэх ухаан, технологийн тухай хуулийг хэлэлцэж байна. Энэ хуулийг анх 1996 онд баталж, 2008 онд өөрчлөлт хийж, 2008 оноос хойш найман удаа өөрчлөлт хийсэн. Энэ өөрчлөлтүүдийг хийсний үндсэн дээр шинэчлэх шаардлага үүсч байна. Энэ хуулийг шинэчлэх асуудлыг удаа дараа өргөн барьж, хамгийн сүүлд Засгийн газраас өргөн барьж байна. Ганбат гишүүний хувьд цалин хөлсний талаар асуулаа. Технологийг хөгжүүлнэ гэдэг дотоодын нийт бүтээгдэхүүнийг өсгөж, бүтээмж нэмэгдэнэ. Мөн хүний хөдөлмөрийн үнэлэмжийг өсгөнө. 

Боловсрол шинжлэх ухааны сайд Л.ЭНХ-АМГАЛАН:

-Одоогийн Ардчилсан намынхан хөтөлбөрийн чанарын асуудал яриад байгаа. Бид хүссэн хүсээгүй шинэчлэл хийж, Боловсролын багц хуулиар олон ажлуудыг эхлүүлж байна. Шинжлэх ухаан, технологийн багш нарын тухайд тийм ч дутагдалтай гэсэн тоо гараагүй. 

Мэдээж хөтөлбөрийн хүрээнд боловсон хүчнийг нэмэгдүүлэх, сайжруулах зэрэг зүйлс яригдаж байгаа. 

УИХ-ын гишүүн Б.ПҮРЭВДОРЖ:

-Чоно борооноор гэдэг шиг Шинжлэх ухаан, технологийн хууль дээр бараа, үйлчилгээ, санхүүжилт зэрэг янз бүрийн үйлчилгээ авахад тендергүйгээр ажлаа хийхээр болоод орж ирж байна. Үндэсний судалгаа хөгжүүэллт, шинжлэх ухаан, технологийн түүвэр судалгаа, хэрэглээний судалгаа технологийн туршилт, зөвшилцөл зэргийг төрийн өмчийн эрдэм шинжилгээний байгууллагаар гүйцэтгүүлж, санхүүжүүлэхэд бараа үйлчилгээний тухай хуулийг дагаж мөрдөхгүй гэж тусгасан байгаа юм. Цүнх баригчаа томилоод тэрүүгээрээ л бүх ажлаа хийлгэнэ гэсэн үг шүү дээ. 

Ингэж болохгүй. Хувийн өмчийн шинжлэх ухааны хөгжүүлэлтийг огт хийхгүй байна.

Хувийн хэвшил л технологийг шинэ түвшинд хөгжүүлж чадна. Ингэж төр өөрийгөө дөвийлгөж хувийн хэвшлийг дарлаж болохгүй. Наанаа бүх зүйл дээр хувийн хэвшлийг дэмжинэ гэдэг мөртлөө бодит байдал дээр бүгдийг нь эсрэгээрээ хийж байна. 

УИХ-ын дарга Г.ЗАНДАНШАТАР:

-Санал хураалтаар 39 гишүүний 27 нь дэмжлээ. Байнгын хороод санал хураалтын дараа хуралдана. 

УИХ-ын дарга Г.ЗАНДАНШАТАР:

-Өнөөдрийн хуралдаанаар нэгдүгээрт, Шинжлэх ухаан технологийн тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүд, зарчмын зөрүүтэй 18 санал, хоёрдугаарт, Соёлын бүтээлч үйлдвэрлэлийг дэмжих тухай хуулийн төсөл болон хамт өргөн мэдүүлсэн хуулийн төслүүд, гуравдугаарт, Монгол Улс дахь хүний эрх, эрх чөлөөний байдлын 23 дахь илтгэл, 2023 оны эрүү шүүлтээс урьдчилан сэргийлэх үйл ажиллагааны тайлангийн хэлэлцүүлэгтэй холбогдуулан авах зарим арга хэмжээний УИХ-ын тогтоолын төсөл, дөрөвдүгээрт, эмийн үнийн өсөлтийн шалтгаан нөхцөлийг хянан шалгах түр хорооны сонсголын санал, дүгнэлт, тогтоолын төсөл, тавдугаарт, Монгол Улсын Их хурлын тухай хуулийн төслийн шинэчилсэн найруулгын төсөл болон хамт өргөн мэдүүлсэн хуулийн төслүүд, зургадугаарт, УИХ-ын чуулганы дэгийн тухай хуулийн шинэчилсэн найруулга болон хамт өргөн мэдүүлсэн хуулийн төслүүд, долдугаарт УИХ-ын хяналт шалгалтын тухай хуулийн шинэчилсэн найруулгын төслүүд, наймдугаарт, энхийг дэмжих ажиллагаанд ажиллагаанд оролцохтой холбоотой шинэчилсэн найруулга болон хамт өргөн мэдүүлсэн хуулийн төслүүд, есдүгээрт, цэргийн алба хаагчийн эрх зүйн байдлын тухай хуулийн төслүүд, аравт малчны тухай хуулийн төсөл болон хамт өргөн мэдүүлсэн хуулийн төслүүд, арваннэгдүгээрт, мал амьтны эм, нэмэлт тэжээлийн тухай хуулийн төсөл арванхоёрдугаарт, ашигт малтмалын тухай хуульд нэмэлт өөрчлөлт оруулах тухай хуулийн төсөл зэргийг хэлэлцэнэ. 

Арвангуравдугаарт, гаалийн албан татвараас чөлөөлөх тухай хуулийн төсөл, 14, нэмэгдсэн өртгийн албан татвараас чөлөөлөх тухай хуулийн эцсийн хэлэлцүүлэг, 15, тогтоолын хавсралтад өөрчлөлт оруулах тухай УИХ-ын тогтоолын төсөл. 

16, Засгийн газарт чиглэл өгөх тухай УИХ-ын тогтоолын төслийг тус тус хэлэлцэнэ. 

УИХ-ын гишүүн Ш.АДЬШАА:

-Ашигт малтмалын тухай хуульд өөрчлөлт оруулах хуулийн төслийг миний бие 2023 оны арванхоёрдугаар сарын 17-ны өдөр Засгийн газраас өргөн мэдүүлсэн ашигт малтмалын тухай хуулиуд УИХ-аар хэлэлцэгдээд, зарим нь батлагдаад явж байна. Сөрөг хүчний гишүүний хуулийн төслийг оруулж ирэх асуудлыг яагаад та бүхэн анхаарч өгөхгүй байна аа. Ашигтм малтмалын тухай хуульд өөрчлөлт оруулахад уул уурхайн асуудал, ашигт малтмал, газрын баялгаа зарахад нутгийн иргэдийн оролцоог нэмж, тогтолцоог өөрчлөх зайлшгүй шаардлага байгаа учир миний бие санаачилсан. Ашигт малтмалын асуудал бол үндэсний аюулгүй байдлын асуудлын хэмжээнд хүрээд байна. Малчдын асуудлыг Монголын төр шийдэх ёстой. Орон нутгийн өөрөө удирдах байгууллагын эрх мэдлийг энэ хуулийн төсөлд тусгасан. Тиймээс хэлэлцэх асуудалд яаралтай оруулж, хэлэлцэж өгөхийг хүсч байна. 

30 жилийн уул уурхайн золиос нь хөдөөгийн малчид болоод байна. 

УИХ-ын гишүүн Ёс зүй, сахилга хариуцлагын байнгын хорооны дарга Б.БАТТӨМӨР:

-Монгол Улсын Засгийн газраас 2024 оны дөрөвдүгээр сарын 18-ны өдөр УИХ-д өргөн мэдүүлсэн Шинжлэх ухаан технологийн тухай хуулийн шинэчилсэн найруулгын төсөл болон хамт өргөн мэдүүлсэн хуулийн төсөл, УИХ-ын тогтоолын төслийг хэлэлцэх эсэх асуудлыг 2024 оны дөрөвдүгээр сарын 24-ны өдөр нэгдсэн хуралдаанаар хэлэлцүүлж, анхны хуралд бэлтгүүлэхээр Боловсрол, шинжлэх ухаан, спортын байнгын хороонд шилжүүлсэн. УИХ-ын даргын 2024 оны 60 дугаар захирамжаар төслүүдийг хэлэлцүүлэгт бэлтгэх ажлуудыг ажлын хэсгийн гишүүн Б.Баттөмөрөөр ахлуулж, ажлын хэсгээс хуулийн төслийн талаар гаргасан саналаа танилцуулсан. 

Дөрөвдүгээр сарын 30-ны Боловсол, шинжлэх ухаан, спортын байнгын хороогоор хэлэлцэж тус хуулийн төслийг хэлэлцүүлэх санал, зөвлөмжийг гаргасан. 

Нэгдүгээрт, шинжлэх ухаан технологийн үйл ажиллагааг хүний амьдралын чанар, нийгэм, эдийн засгийн болон шинжлэх ухаан технологийн хөгжил, үндэсний аюулгүй байдалд чиглэсэн байхаар хангах. 

Хоёрдугаарт, шинжлэх ухаан технологийн нэгдсэн бодлого бүс нутагт шинжлэх ухаан, технологийг хөгжүүлэх бодлого, төлөвлөлт, тэргүүлэх чиглэл, цөм технологийг тодорхой болгох, гуравдугаарт, шинжлэх ухаан, технологийн чиглэлээр үйл ажиллагаа эрхэлж байгаа хувийн хэвшлийн байгууллагуудын судалгаа хөгжлийн ажлуудын бүрэн хөрөнгө оруулалтыг хууль тогтоомжид заасны дагуу татварын хөнгөлөлт чөлөөлөлт үзүүлэх. Дөрөвдүгээрт, шинжлэх ухаан, технологийн хүний нөөцийг бэлтгэх, шинжлэх ухааны авьяастныг нээх, эрдэм шинжилгээний ажилтан, түүний нийгмийн баталгааг хангах. Тавдугаарт, шинжлэх ухаан, технологийн үйл ажиллагааны санхүүжилт, хөрөнгө оруулат, дэд бүтцийг хөгжүүлэх, санхүүжилтийн эх үүсвэр, санхүүжилтийн журам, захиалагч, гүйцэтгэгчийн эрх, үүргийг зохицуулах талаар зарчмын зөрүүтэй саналын томъёоллыг бэлтгэлээ. 

Ажлын хэсгээс гаргасан саналын зөрүүтэй томъёоллоор санал хурааж, байнгын хорооны гишүүдийн олонх дэмжсэн бөгөөд төслийг хэлэлцүүлэх үед УИХ-ын гишүүдээс асуулт асуухад санал гараагүй болно. 

УИХ-ын дарга Г.ЗАНДАНШАТАР:

-Зарчмын зөрүүтэй санал дээр санал хураалт явуулна.