Та жинсэн, эсвэл даавуун ямар ч өмдөнд дуртай байсан Оксфордын гуталтай байхад илүү загварлаг дүр төрхийг бүрдүүлж чадна. Оксфорд гэж нэрлэж заншсан энэхүү гутлын загвар анх 19 дүгээр зуунд бий болжээ. Тухайн үед уг гутал оюутнуудын дунд, тэр дундаа Оксфордын их Сургуулийн их сургуулийн орчинд алдартай болсон тул ийн нэрийдсэн байна. Оюутан залуус тэр үед өвдөг хүрсэн урттай түрийтэй гутал өмсдөг байсан ч цаг хугацаа өнгөрөх тусам түрий нь намхан болсон гэдэг. Оксфорд гутлын түрий 1825 оны үед шилбэний тэхий дундуур татдаг байсан бөгөөд Оксониана гэсэн нэртэй байжээ. Харин Оксфорд гэж нэрлэж эхэлсэн нь 1846 он юм. Челси гутлыг урласан гэдгээрээ алдаршсан Жозеф Спаркс Холл анх энэ нэрийг өгчээ.

Оксфорд гутлын гарал үүсэлтэй холбоотой өөр нэг түүх хунтайж Альберттай холбогддог. Хунтайж Альберт ан хийхдээ хоншоортой гутал өмсдөг байжээ. Хоншоортой гутал нь тухайн үедээ хамгийн шинэлэг, хамгийн загварлагт тооцогдож байж.

Эмэгтэйчүүдийн дунд Оксфорд гутал дэлгэрсэн нь 20 дугаар зууны эхэн үе. Энэ үед эмэгтэйчүүд гэрээс гарч, ажил хөдөлмөр эрхлэх нь түгээмэл болсон. Тиймээс илүү олон цагаар өмсөх боломжтой, эвтэйхэн, тухтай гутал хэрэгтэй болжээ. Үндсэндээ 20 дугаар зуунаас хойш Оксфорд гутал нь эрэгтэй, эмэгтэй аль ч хүйсийн хүмүүсийн түгээмэл өмсдөг, бат бөх байр сууриа хадгалсан гутал болсон.

Оксфорд гутлыг бусад гутлаас илүү тодотгож өгсөн зүйл нь дэгжин хийцээс гадна тав тухтай өмсгөл нь байв. Уг гутлын хоншоор нь өө сэвгүй, хатуу бүтэцтэй учир албан ёсны арга хэмжээнүүдэд илүү зохимжтой аж. Мөн хоншоор хэсгийн жижиг оёдлууд нь илүү дэгжин, онцлог шинж чанарыг бий болгожээ.

Орчин цагт Оксфорд гутлыг улаан хивсний ёслолоос эхлээд хурим хүртэл бараг бүх л баяр ёслолын үеэр харах боломжтой. Ханхүү Уильям хүртэл саяхан "BAFTA" шагнал гардуулах ёслолын үеэр гялалзсан хар лакан Оксфорд өмссөн байв. Загварын тайзнаас ч Оксфорд гутал буугаагүй байна. Томоохон брэндийн загварын шоуг үзвэл загвар өмсөгчид Оксфордоор жигдэрсэн байхыг харж болохоор болжээ.