Л.Чинбатад Хан-Уул дүүргээс гарах эрхийг нь хязгаарлах ял оногдуулав

Сэлэнгэ аймгийн Прокурорын газраас шүүгдэгч Л.Чинбатад холбогдуулан “Манай адууг туугаад явж байгаа малын хулгайч нартай тэмцэж байна. Цаашдаа ч тэмцэнэ. Малын хулгай, хулгайч нар хэрээс хэтэрлээ”. Хууль хяналтын байгууллагад гомдлоо гаргасан” гэх мэдээллийг өөрийн фейсбүүкийн “chinbat lhagva” нэртэй цахим хуудаст 2023 оны зургадугаар сарын 15-ны өдөр оруулан цахим орчинд нийтэлж хүний нэр төр, алдар хүндэд халдсан илт худал мэдээллийг олон нийтэд тараасан хэрэгт холбогдуулан яллах дүгнэлт үйлдэж ирүүлсэн.

Сэлэнгэ аймаг дахь сум дундын Эрүүгийн хэргийн анхан шатны шүүх хэргийг хүлээн авч хянан хэлэлцээд шүүгдэгч Л.Чинбатыг Эрүүгийн хуулийн тусгай ангийн 13.14 дүгээр зүйлийн 1 дэх хэсэгт заасан “Худал мэдээлэл тараах” гэмт хэрэг үйлдсэн гэм буруутайд тооцож, хоёр сарын хугацаагаар Улаанбаатар хотын Хан-Уул дүүргийн нутаг дэвсгэрээс гадагш гарах зорчих эрх хязгаарлах ял оногдуулж шийдвэрлэлээ.

Б.ГАНЗОРИГИЙГ ХУРАЛД АЖИГЛАГЧААР ОРУУЛААГҮЙ ГЭВ

“Гачуурт” ХХК-ийн захирал Л.Чинбатад холбогдох хэргийн гэм буруугийн шүүх хурал өнөөдөр /2024.05.01/ Сэлэнгэ аймаг дахь сум дундын эрүүгийн хэргийн анхан шатны шүүхэд 14.30 цагт болсон. Шүүх хурлын танхимд Сэлэнгэ аймгийн Цагаан нуур сумын гуравдугаар багийн Засаг дарга Б.Ганзориг ажиглагчаар оролцохоор очсон боловч түүнийг оруулаагүй гэдэг мэдээллийг өмгөөлөгч нь өглөө. Одоогийн байдлаар шүүх хурал үргэлжилж байна.

Б.ГАНЗОРИГИЙГ ХУРУУ ХУГАЛСАН, Л.ЧИНБАТЫГ ХУДАЛ МЭДЭЭЛЭЛ ТАРААСАН ГЭЖ ЯЛЛАЖЭЭ

Хөдөлмөрийн баатар, "Гацуурт" компанийн захирал Л.Чинбат өнгөрсөн жил Сэлэнгэ аймгийн малчдыг машинаараа хөөж буй бичлэг олон нийтийн сүлжээнд цацагдсан. Энэ хэргийг прокурорын байгууллагаас мөрдөн шалгаж байна гэдэг мэдээллийг албаныхан өгч буй. Нэг жил гаруй хугацаа өнгөрсөн хэдий ч шийдэгдээгүй байгаа юм. Тэгвэл Сэлэнгэ аймгийн прокурорын газраас яллах дүгнэлт үйлдэн шүүхэд шилжүүлсэн “Гачуурт” ХХК-ийн захирал Л.Чинбатад холбогдох хэргийн гэм буруугийн шүүх хурал өнөөдөр /2024.05.01/ Сэлэнгэ аймаг дахь сум дундын эрүүгийн хэргийн анхан шатны шүүхэд 14.30 цагт болно.

Түүнийг бусдыг амийг машинаараа дайрч хөнөөхийг завдсан буюу Эрүүгийн хуулийн тусгай ангийн 10.1 дүгээр зүйлийн 1 дэх хэсэг хүний амийг хөнөөхийг завдсан үйлдлийг хэрэгсэхгүй болгосон байна.

Харин прокурорын газраас “Гачуурт” ХХК-ийн захирал Л.Чинбатыг хүний нэр төр, алдар хүндэд халдсан илт худал мэдээллийг цахим орчинд тараасан гэмт хэрэгт буруутгаж, Эрүүгийн хуулийн тусгай ангийн 13.14 дүгээр зүйлийн 1 /Худал мэдээлэл тараах/-д зааснаар яллах дүгнэлт үйлдсэн.

Харин Эрүүгийн хуулийн тусгай ангийн 10.1 дүгээр зүйлийн 1 дэх хэсэг хүний амийг хөнөөхийг завдсан үйлдлийг хэрэгсэхгүй болгосон байна. Мөн олон нийтийн сүлжээнд бичлэг хийсэн Сэлэнгэ аймгийн Цагаан нуур сумын гуравдугаар багийн Засаг дарга Б.Ганзоригийг "Гачуурт" ХХК-ийн ажилтны хурууг хугалсан гэж яллах дүгнэлт үйлджээ. Прокурорын байгууллагаас нэг хавтаст хэргийг хоёр зүйл ангиар салгаж, тус тусад нь шүүхээр болсон байна.