Цаг агаар тогтуухан нарлаг өдөр хэдий ч Үндэсний соёл амралтын хүрээлэн хөл багатай, намуухан хөгжмийн ая эгшиглэх нь нэн таатай байлаа. Хаалгаар орвол хамгийн эхний тасалбар борлуулдаг шилэн том цонхтой, гурван касс бүхий цагаан өнгийн жижиг байшингийн үүдэнд хүүхдүүд дугаарлан зогсоно. Тасалбарынх нь үнэ суух тоглоомын тоо, багцаасаа хамаараад таван мянган төгрөгөөс дээш үнэтэй байв

"Май, энэ чинийх. Эхлээд гурвуулаа аль тоглоом дээр суух уу. Чиний тасалбарыг харъя даа хэмээн ярилцан цааш алхах ногоон өнгийн ижилхэн цамц өмссөн тэрсхэн гурван хүү эргэдэг оцон шувуунд суухаар явав. Тэд нэг ангийн гурван найзууд болох нь илт.

Тэд жил бүр парк нээгдэхтэй зэрэгцэн ирж, тоглодог уламжлалтай гэнэ. Эцэг, эхийнхээ зөвшөөрлөөр хичээлээ тараад энэ жилийн ээлжит "зугаалгаа" хийхээр иржээ. "Бид найзууд. Энэ жил гурав, гурван тоглоом дээр суух тасалбар авсан. Бидэнд эргэдэг оцон шувуу хамгийн гоё санагддаг" гээд гүйж одов. Гурван найзыг нэгнийх нь ээж дагуулан яваа аж. Түүний н.Нэргүй гэдэг, хүүхдүүддээ цаг гарган, тэднийгээ хөөр баяртай гүйхийг алсаас харан сууж тэрбээр "Бага насны хүүхдүүдийг хараа, хяналтгүй явуулах нь эрсдэлтэй. Тиймээс аль эртнээс ажлаа төлөвлөж, цаг гаргаж ирсэн. Хүүхдүүдэд маань өөр зорьж очих газар Улаанбаатарт ховор. Манай хүүхдүүд үндэсний соёл амралтын хүрээлэнд ирж тоглох дуртай. Хүүгийн маань найзуудын ээж аав ажилтай завгүй болохоор би өнөөдөр энэ гурвыг тоглуулахаар дагуулж ирээд байгаа юм. Энэ хоёр миний хүүгийн сайн найзууд нь. Гадаа дулаан болоод парк нээгдээд хүүхдүүд тоглох, иргэдэд амарч суух газар нэмэгдээд аятайхан л байна. гэлээ.

Улаанбаатарын энэ их завгүй ажлын өдрүүдэд эцэг, эхчүүд хүүхдүүддээ цаг гаргаж паркт ирэх нь тун ховор. Хүүхдийн баяраас өмнө парк ерөнхийдөө хөл хөдөлгөөн багатай. Хүүхдийн баяраас хойш үйлчлүүлэгчдийн хөлд дарагддаг аж.

Е.Төгөлдөр, Н.Төвшинсайхан, Т.Төвшинтөр гэх тэрхүү гурван дэрсхэн хөвгүүд эргэдэг дэльфин, алсыг харагч, далайн дээрэмчний онгоц дээр сууж тоглох дуртай гэнэ. Тэд "Хүүхдийн баяраар хүн ихтэй, тоглох гэж олон цаг дугаарласаар байгаад ядардаг. Мөн олон тоглоом дээр сууж чаддаггүй" гэж ам уралдан ярив.  Мөн тэд паркийг олон тоглоомтой болоосой гэж хүсдэг гэнэ. Тоглоом нь цөөдөөд, жил болгон ирж тоглосоор байгаад заримаас нь уйдсан гэлээ.

Хөвгүүдийн хүсэн хүлээсэн мөч ирж, тэд эргэдэг оцон шувуун дээрээ тоглож дуусаад ээжийгээ дагуулан алсыг харагч тийш явлаа.

 АЛСЫГ ХАРАГЧ ӨНГӨӨ ЗАСЧЭЭ

Нийслэлд урин дулааны цагт зорьж очиж, чөлөөт цагаа өнгөрүүлэх газар ховор. Тиймээс Үндэсний амралтын газар нээгдсэн сургаар тэнд хүүхдүүд тоглож, хөгшид нь нарлаж суулаа. Паркийн 2, 3 настнуудад зориулсан тоглоомын талбай цөөхөн, гэхдээ л бяцхан хүүхдүүд  тэнд тааваараа тоглоно.

Хүүхдүүдээ тэргэн дээр нь унтуулан өөрсдөө элдвийг ярилцан суух ээж аав цөөнгүй. Гадаа дулаарахын хэрээр Үндэсний соёл амралтын хүрээлэнд хүүхдээ салхилуулахаар хүмүүс зорин ирдэг аж.

Үндэсний соёл, амралтын хүрээлэн үүдээ нээхээсээ өмнө өнгө төрхөө өөрчилжээ. Алсыг харагчийн бүхээг бүрийг ногоон, улбар шар, цэнхэр, улаан өнгөөр будсан нь содон харагдаж байв.

Бүхээгний дотор талд хүүхдүүдийн сонирхлыг татах янз бүрийн сонирхолтой зургуудыгмөн зурсан хэмээн үйл ажиллагаа хариуцсан мэргэжилтэн сонирхуулав.

Үндэсний соёл амралтын хүрээлэн нь анх 1965 оны арваннэгдүгээр сарын 10-ны өдрийн шийдвэрээр Нийслэл Улаанбаатар хотын хүүхэд, залуучуудын дунд соёл хүмүүжлийн ажлыг өргөн зохион, тэдний чөлөөт цагийг зөв боловсон өнгөрөөх зорилгоор “Хотын соёл амралтын парк” нэртэйгээр байгуулсан.

ПАРКИЙН 18 ТОГЛООМ АЖИЛЛАЖ ЭХЭЛЖЭЭ

Тус хүрээлэнгийн Үйл ажиллагааны газрын захирал А.АРИУНЖАРГАЛ ярихдаа "Манай парк 18 тоглоомын үйл ажиллагааг эхлүүлээд үйлчлүүлэгчдээ авч байна. Усан завь, галзуу хулгана зэрэг таван тоглоомын үйл ажиллагааг удахгүй эхлүүлнэ. Парк нийт 24 тоглоомтой. Тоглоомын аюулгүй байдлыг хангаж ажиллах тал дээр өглөө болгон хөдөлмөрийн аюулгүй байдлын заавар зөвлөмжийг өгч ажилчдаа гаргадаг. Мөн сардаа болон 14 хоногтоо сургалт мэдээллүүдийг өгдөг. Энэ жилийн хувьд алсыг харагчийг будаж, сайжруулсан.

Удахгүй нэг сарын дараа хүүхдийн баяр болно. Яг тэр өдөр нь ачаалал маш их байдаг. Тиймээс тавдугаар сарын 28-аас зургаадугаар сарын 3-ны хооронд гайхамшигт долоо хоног нэртэй тайзны арга хэмжээ, хүүхдийн баярт зориулсан хөтөлбөрүүд зохион байгуулна. Тэгэхээр эцэг эхчүүд заавал хүүхдийн баярын өдөр гэлгүй хүүхдийн баярын арга хэмжээнүүдийг дээрх өдрүүдэд үзэж болно.

"Парк дотор унадаг дугуй, скүүтер зэргийг унахыг хориглодог. Тиймээс  үйлчлүүлэгчдэд анхааруулахад аль болох унадаг дугуй, скүүтертэй битгий хашаан дотор зорчоорой гэж урилж байна" гэсэн юм.

Үндэсний соёл амралтын хүрээлэнд жилд давхардсан тоогоор хоёр сая гаруй хүн тоглох болон, амарч суух гэж ирдэг.

"АШИГ ОРЛОГО ОЛОХООС ИЛҮҮ ХҮҮХДҮҮДИЙН ИНЭЭД ХӨӨРИЙГ ХАРАХ ГЭЖ ЭНД АЖИЛЛАДАГ"

Зураг дарна, угаана гэсэн хаяг бүхий жижигхэн бор модон байшин байв. Байшингийн дотор гэрэл зураг дарахад зориулагдсан цэцэг навч бүхий чимэглэлээр байшингийн хоймор ханыг зассан байх. Хоёр талд нь поророгийн найзуудын чихмэлийг байрлуулсан бөгөөд үүдний ширээн дээр угаасан зургуудаа үзүүлэн болгон эгнүүлэн тавьжээ.

Хаалганы хажууд жижиг модон сандал дээр 60 орчим настай эрэгтэй сууж байлаа. Тэрбээр 2013 оноос хойш энд гэр бүлийн хүний хамт зураг дарж байгаа гэнэ. Түүнийг П.Норовсамбуу гэдэг.

"Ах нь энд 11 дэх жилдээ зураг дарж угааж өгч байна. Хүмүүс намайг андахгүй сайн таньдаг болсон. Бүр байнгын үйлчлүүлэгчтэй. Анх энд танилцаад одоо ам бүл тавуулаа болсон, жил бүр ирж гэр бүлийнхээ зургийг даруулдаг хүмүүс ч бий.  Бид хоёр хоёулаа тэтгэврийн насных. Зундаа эндээ ажлаад өвөл амарчихдаг. Энд байх амар байдаг шүү. Хүүхдүүдийн инээд хөөр цалгиж, олон хүн бужигналдаад сайхан байдаг юм. Ах нь ашиг орлого гэхээсээ илүү олонтойгоо бужигнаад, хүүхдүүдийн инээд хөөрөнд л хорогдоод ажлаад байдаг юм" хэмээн ярихдаа түүний нүдэнд аз жаргал, нүүрэнд нь эрхгүй инээд тодроно.

Паркийн хойд захаар байдаг тоглоомууд ихэнх нь эзгүй, үйлчлүүлэгч байхгүй байлаа. Ажлын өдөр, гадаа сэрүүхэн өдрүүд таарсан учраас хөл хөдөлгөөн багатай байж болох ч парк нээгдсэнийг мэдээгүй олон жаалууд ч байгаа биз ээ.

Хөл хөдөлгөөн багатай ч хамгийн их дараалалттай тоглоом бол далайн дээрэмчний хөлөг онгоц. Ээлжээ хүлээн дугаарлах хүүхдүүд "Өнөөдөр хоёулахнаа болохоор жаахан тийм байна. Дараа илүү олуулаа ирж тоглоно шүү" хэмээн хоорондоо ярилцана. Зарим нь найзуудаараа зургаа даруулж, сошиал хуудастаа тавина. Би ийм, чи тийм гарч хэмээн ам уралдаж, нэгний ёожлон инээлдэнэ. Цаг агаар дулаархын хэрээр паркийн үйлчлүүлэгчид нэмэгдэж, том хүүхдүүд, бага насныхан гэсэн хоёр "ангилал"-аар тоглоомоо хуваан тоглох нь нүдэнд үзэгдэх мэт.

Паркийн зарим тоглоомууд ажиллаж байгаа бөгөөд үлдсэнийг нь ээлж, дараатайгаар ажиллуулж эхлэх гэнэ. Харин үйлчилгээний газрууд хараахан ажиллаж эхлээгүй ч удахгүй нээгдэнэ гэдгийг ажилчид хэлж байлаа.

Соёл амралтын хүрээлэнд мөхөөлдөс, ус ундаа, түргэн хоол зурагчин гээд олон төрлийн үйлчилгээний газрууд үйл ажиллаагаа явуулдаг. Цэцэрлэг, сургууль амраагүй учраас амралтын өдөр хөл хөдөлгөөн ихтэй байдаг. Ажлын өдөр, амралтын өдөр ч эцэг, эхчүүд жилдээ ядаж нэг удаа парк орж тоглох "өрөө" төлөх цаг урин дулаантай зэрэгцэн иржээ.