"ЦЕГ-аас автобусны суудлын бүрээс урсан хүүхдүүдийг бичлэгийг хийгээгүй"

Дунд сургуулийн сурагчид нийтийн тээврээр зорчихдоо автобусны сандлын бүрээс зүсч, 1.5 сая төгрөгний эд хөрөнгө сүйдэлсэн талаарх бичлэг өнгөрсөн долоо хоногт олон нийтийн сүлжээнд цацагдсан. Энэ талаар цагдаагийн байгууллагаас тодрууллаа.

ЦЕГ-ын Урьдчилан сэргийлэх газрын Хэвлэл мэдээлэл, олон нийттэй харилцах хэлтсийн дарга, цагдаагийн дэд хурандаа Г.Пүрэвдэлгэр:

-Бид олон нийтийн сүлжээнд цацагдсан бичлэгийг харсан. Цагдаагийн байгууллагаас ямар нэгэн хүүхдийн эрх зөрчсөн бичлэгийг олон нийтэд түгээгээгүй гэдгийг мэдэгдэж байна. Энэ бичлэг дээр хүүхдүүд автобусны суудлын бүрээс урж, зүссэн хэргийг цагдаагийн байгууллага шалгаж байгаа нь үнэн. Харин тэр бичлэгийг олон нийтэд цацаж, түгээгээгүй. Албан ёсны Хэвлэл мэдээллийн төвийн мэдээллийн төвөөр баталгаажуулж мэдээлдэг.

Хэн бичлэг хийж, хүүхдүүдийг яриулсан талаар дотоод хяналтаараа шалгаж байна. Цагдаагийн албаны дотоод журам, хуулиар цагдаагийн алба хаагч буруутай нь тогтоогдвол хариуцлага тооцно.

Бид хүүхдийн эрхтэй холбоотой гомдол мэдээлэлд маш нарийн дүрэм журмыг баримталдаг. Эрүүгийн хэрэг хянан шийдвэрлэх тухай хуульд насанд хүрээгүй оролцогчийг хэрхэн шалгах ёстой вэ, хэдэн цаг мэдүүлэг авах вэ, ямар тохиолдолд асран хамгаалагчийг нь байлцуулах ёстой вэ зэрэг нарийвчилсан зохицуулалттай байдаг гэв.