Зам тээврийн хөгжлийн сайд С.Бямбацогт Ховд аймгийн Чандмань суманд ажиллахдаа мотоцикл унаж давхин олны нүдийг хужирласан бол УИХ-ын гишүүн Ц.Цэрэнпунцаг нисдэг тэрэг хөлөглөн иржээ.

Нутгийн зон олон энэхүү үйл явдлыг хараад “Манай сагсуу хар ч сонгууль дөхөхөөр хүүхдийн машин дээр ч мордчихдог.  Өмнөх жилийн сонгуулиар хүүхдийн машин эвдлээ гэдэг санал шүүмжлэлд өртсөн болоод тэр үү, мотоцикл унаж сумаар давхилаа. Харин энэ Ц.Цэрэнпунцаг чинь яасан их мөнгөтэй хүн бэ. Ирэх тоолондоо л нисдэг тэрэг хөлөглөж ирэх юм. Мань мэт бол идшийг нь дийлэхгүй” гэцгээн хуучилцгааж байна.

УИХ-ын сонгууль томсгосон тойргоор зохион байгуулагдах болсноор Ховд, Увс, Завхан аймгууд нэг тойрог болсон. Иймээс 2020 оны УИХ-ын сонгуулиар Завхан аймгаас УИХ-д сонгогдсон Ц.Цэрэнпунцаг гишүүний хувьд Ховд аймагт ажиллах нь чухал байгаа. Нэгэн цагт үндэсний бөхөөр шуугиулж, Монгол даяар танихгүй хүнгүй болсон ч хууль тогтоох дээд байгууллагад төлөөлөх хэмжээний хүн мөн үү гэдэг итгэл үнэмшлийг том тойрогт таниулах нь чухал. Тиймээс Ховд, Увс аймагт ажиллахаас аргагүй. Завханаас Ховд руу автомашинаар явахад зам харгуй хүнд тул биеийн амрыг ч бодсон уу, дээр нь цаг хугацаа алдахгүйг боддог уу нисдэг тэрэг хөлөглөн давхиж байна.

Увс аймгаас УИХ-д дөрвөнтөө сонгогдсон Эдийн засаг хөгжлийн сайд Ч.Хүрэлбаатар хаврын чуулган эхэлсэн цагаас үндсэн ажлаа хийдүүлэн Завхан, Увс, Ховд аймгуудад ажиллаж байгаа бол Зам тээврийн хөгжлийн сайд С.Бямбацогт голчлон тойрогтоо бюу Ховд аймагт түлхүү ажиллаж байна гэж тодорхойлж болно. Харин Эрчим хүчний сайд Б.Чойжилсүрэн өмнөх сонгуулиудаар Увс аймгаас УИХ-д сонгогдож байсан бөгөөд бусад шигээ идэвхтэй тойрогтоо ажиллахгүй, харин амьд царцаа Завхан аймаг руу нүүлгэсэн гэх хэл аманд өртөөд буй.

Г.ХОРОЛ