Монгол Улс саяхан Ашигт малтмалын тухай хуульд нэмэлт өөрчлөлт оруулж,  хувьцааны 50 хүртэлх хувийг нөхөн төлбөргүйгээр хураан авах эрхийг Засгийн газартаа олголоо. Ингэснээр уул уурхайн төсөл хэрэгжүүлэгчдийн эзэмшлийн хувийг 34 хувьд хязгаарлаж, үлдсэн хувийг нь албадан худалдахаар болсон нь олон улсын хөрөнгө оруулалтын орчинд цочрол үүсгэж байгааг дэлхийн тэргүүлэх мэдээллийн эх сурвалжууд мэдээлж байна. Тухайлбал, AP агентлагт хувийн хөрөнгийг булаах энэ алхам нь уул уурхайн томоохон төслүүдийн хэрэгжилт, тогтвортой байдлыг алдагдуулаад зогсохгүй, Монгол Улсын эдийн засгийн өсөлтийн амин сүнс болсон нэн шаардлагатай гадаадын хөрөнгө оруулалтыг үргээх аюулд хүргэж байна гэжээ.

Уг хууль хэрэгжиж эхэлснээр хөрөнгө оруулагчдын дунд эргэлзээ төрүүлж, салбарын цаашдын хөрөнгө оруулалт, ахиц дэвшлийг боогдуулж болзошгүй байна. Мөн хууль эрх зүйн орчны тодорхойгүй байдал, эдийн засгийн эрсдэлийг үүсгэж магадгүй талаар мэдээндээ бичжээ. Энэ хууль тогтоомж нь хөрөнгө оруулалтын орчинд ойлгомжгүй байдлыг бий болгосноор Монгол Улсын хөгжилд ноцтой аюул учруулж байгааг эдийн засагчид анхааруулж байгаа юм.

“Уул уурхайн салбарт төрийн оролцоог нэмэгдүүлэх талаар зарим хүмүүс маргаж болох ч төрийн оролцоо хамгийн бага байх нь сайн үр дүнд хүрдгийг түүх гэрчилсэн. Энэхүү альтернатив арга нь тогтвортой өсөлтөд чухал ач холбогдолтой ба төслийн үр ашгийг нэмэгдүүлж, инновацыг хөгжүүлж, өрсөлдөх чадварыг дээшлүүлдэг давуу талтай” гэж уг нийтлэлд дурджээ.

Энэхүү хуулийн шинэчлэл нь хөрөнгө оруулалтын чухал шийдвэрүүдийг хойшлуулж, бүр цаашилбал, хөрөнгө оруулах эсэх чиглэлд эргэлзээ үүсгэж байгаа юм. Үүгээр ч зогсохгүй олон улсын эрх зүйн маргаан үүсэх магадлал өндөр байгаа нь хөрөнгө оруулалтын хэтийн төлөвийг бүрхэг болгож, дэлхийн тавцанд Монголын нэр хүндийг эрсдэлд оруулж байна гэж тодотгосон байна.

Төрийн оролцоог нэмэгдүүлэхэд чиглэсэн энэхүү хуулийн өөрчлөлт нь Монгол Улсын хөгжиж буй эдийн засгийн чадавхийг улам сулруулж байгаа бөгөөд Монгол Улсын эдийн засгийн харилцаа, үндэсний эрх ашиг, олон улсын хамтын ажиллагааны тэнцвэрт байдалд хэрхэн нөлөөлж байгааг олон улсын судлаачид анхааралтай ажиглаж байна. Энэ шийдвэрийн үр дагавар нь Монгол Улсын хил хязгаараас давж, олон улсын хөрөнгө оруулалтын орчинд “цуурайтаж” байна гэж онцолжээ.