ОХУ-ын сөрөг хүчний удирдагч Алексей Навальный энэ оны хоёрдугаар сард Хойд туйлын алслагдсан хорих лагерьт нас барсан. Түүний үхэлд олон нийт Кремлийг буруутгаж байсан ч АНУ-ын тагнуулын алба "Энэ бол Путины шууд захиалга биш байх магадлалтай" гэсэн мэдэгдлийг Баасан гаригт хийлээ.
"The Wall Street Journal"-д мэдээлснээр, АНУ-ын Тагнуулын төв газар, Үндэсний тагнуулын газрын даргын алба, Төрийн департаментын тагнуулын алба хэд хэдэн байгууллага үүнтэй санал нэгдэж байгаа гэв.
Путин уг хэрэгт оролцоогүй гэх магадлалд Польшийн шинжээчид болон Европын зарим тагнуулын агентлаг эргэлзсэн байр суурьтай байгаа. Харин Навальныйн холбоотнууд Кремль аллага зохион байгуулсан гэж эргэлзэлгүй үзэж байгаа аж. "Путин энэ талаар мэдээгүй, аллагыг зөвшөөрөөгүй гэдэг бол инээдтэй мэдэгдэл" гэж Навальныйн ойрын холбоотон Леонид Волков хэлжээ.
Эх сурвалж: INSIDER
