Монтессори боловсролын орчин үеийн чиг хандлага гэх сэдэв дор эрдэм шинжилгээний бага хурал өнөөдөр/2024.04.27/ боллоо. Тус хурлын зорилго нь Монтессори боловсролын үзэл санааг нийтэд түгээн дэлгэрүүлэх, Монтессори сургалтын арга зүйгээр хүүхдийн хөгжлийг дэмжих боломж, туршлагаас суралцах, тус арга зүйг хэрэгжүүлэхэд багш нарт тулгарч буй асуудал, шийдэл, багш нарын судалгааны ажлыг дэмжих, оролцоо, хамтын ажиллагааг сайжруулах аж.

Монтессори арга зүй нь дэлхий дахинд түгээд 100 жил болжээ. Монголд 20 гаруй жил болж байна. Олон цэцэрлэг энэ арга зүйг сургалтын хөтөлбөртөө тусгадаг. Багш нар бүтээлч болж, бэлтгэгдсэн орчинд, бэлтгэгдсэн хэрэглэгдэхүүний дагуу хүүхэд өөрийн сонголтоор үйл ажиллагаандаа оролцдог. Заавал өнөөдөр ямар нэгэн зүйл хий гэдэггүй гэнэ. Хүүхэд өөрт таалагдсан, дуртай зүйлээ л хийдэг аж.

Монтессори сургалтын арга зүйг 2004 оноос хойш Монголд түгээн дэлгэрүүлж буй Д.Баасанжавтай ярилцлаа. Багш бэлтгэж буй тэрбээр олон улсын монтессори багш эрхтэй бөгөөд Монголд өөр шигээ олон багш, мэргэжилтнүүдийг бэлтгэх хүсэлтэй. Тэрбээр ярихдаа "Бага насны хүүхдийг хөгжүүлэх сургалтын гол төлөөлөгчдын нэг Италийн алдарт эрдэмтэн Мариа Монтессоригийн сургалтын арга барилыг Монголд олон газар хэрэгжүүлж эхэлсэн. Энэхүү туршлагыг судлах зорилгоор Монголын өнцөг булан бүрээс ирсэн хүмүүс иржээ. Өнөөдрийн байдлаар 140 гаруй багш оролцож байна. Өөр өөрсдийн хэрэгжүүлж буй туршлагаа хуваалцаж буй 10 илтгэгч бий. Манай сургалтын арга зүй бол ямар ч хүүхдийг өөрөөр нь байлгах, бие даах чадварыг нь хөгжүүлэх, аз жаргалтайгаар сургах гэсэн зарчмыг баримталдаг" гэв.

Түүний бага хүү энэ сургалтаар хүмүүжжээ. Үр дүнд нь хүү өөртөө итгэлтэй, бусдаас хараат бус, шинийг эрэлхийлдэг, бие даах чадвартай болсон гэнэ.

"Хүн үргэлж боловсорч байдаг. Эцэг, эхчүүд хүүхдүүдээ зөв чиглүүлэх нь чухал. Хүүхдүүдийн хувьд аав, ээж нь үргэлж чиглүүлэх Алтан гадас од нь байдаг" гэж Д.Баасанжав багш хэлсэн юм. Тэрбээр үргэлжлүүлэн "Энэхүү сургалтын арга зүй нь Монгол ардын ёс заншилтай, сурган хүмүүжүүлэх ухаантай зохицдог. Хүн болох багаасаа гэж ярьдаг. Бага байх тусам хүүхэд суралцах чадвартай, шингээх ухаан сайтай гэж хэлсэн байдаг" гэлээ.

Энэхүү эрдэм шинжилгээний хуралд оролцохоор Дархан-Уул аймгаас хүрэлцэн ирсэн "Хааны хүүхдүүд" цэцэрлэгийн эрхлэгч Ч.Нарангэрэл "Хамтын оролцоонд тулгуурлан Монтессори сургалтын арга зүйг хэрэгжүүлэх нь" сэдвийн хүрээнд илтгэл хэлэлцүүлжээ. Илтгэлийнхээ талаар ярихдаа "Гол зорилго нь Монтессори сургалт зөвхөн багш бус эцэг эх, багш, ажилчдын хамтын оролцооны үр дүнд хүүхдүүдэд хүрнэ гэдгийг харуулах. Манай цэцэрлэг 2003 оноос хойш 21 дэх жилдээ хэрэгжүүлж байгаа. Товчхондоо амьдрал гэж хэлмээр байна. Хүүхэд өсч, бойжихдоо эцэг, эхчүүдэд их мэдлэгийг өгдөг. Хүүхдүүдээр дамжуулж эцэг эхчүүдэд мэдлэг болдог. Энэ нь энэ арга барилын онцлог. Мөн хүүхдүүд сонголтоороо бие дааж суралцдаг" гэлээ.

Багш, эцэг эхчүүдийн хамтын оролцоо хүүхдүүдэд нөлөөлж, өсөлт хөгжилд нь хувь нэмэр оруулна гэдгийг Ч.Нарангэрэл онцолсон юм.

Мөн Чингэлтэй дүүргийн "Хундан цагаан хурга" цэцэрлэгийн эрхлэгч Ц.Одцэцэгийн сэтгэгдлийг сонслоо. Тус цэцэрлэг 2013 оноос хойш Монтессори сургалтын арга зүйг  хэрэгжүүлж, багш нараа бэлтгэжээ. Тэрбээр энэхүү сургалтын арга зүйг тодорхойлохдоо "Үнэхээр хүүхдийн төлөө сургалт. Хамгийн чухал нь бэлтгэгдсэн орчинд, бэлтгэгдсэн сургагч багш байна гэдэг нь онцлог. Энд ирсэндээ талархаж байна. Нийслэлийн боловсролын газрын мэргэлжилтнүүд ч хүрэлцэн ирсэн байна. Монголд үүнийг түгээн дэлгэрүүлж, өөрсдийн сургалтын арга барилтай, Монтессорийг хослуулна гэсэн" гэв.

Монголд Монтессори хөтөлбөрөөр бэлтгэгдсэн 436 багш байдаг аж.

Монтссори сургалтын арга зүйгээр хүмүүжсэн хүүхэд бусадтай харьцуулахад хүүхэд эхлээд хүнтэй мэндэлж сурдаг. Мөн аливаа зүйлийг эмх цэгцтэй, дараалалтай хийдэг. Хувцсаа эвхэхээс эхлээд ээж, аавдаа хүртэл үлгэрлэлдэг. Чимээгүй орчинд сургалт явдаг учир тэр орчиндоо л өөрийн хүссэн зүйлээ хийдэг гэлээ.