Монголын оюутны спортын VI наадамд МУИС нэгдсэн дүнгээр тэргүүллээ

Монголын оюутны спортын VI наадам 10 төрлөөр амжилттай зохион байгуулагдаж, 533 багц медалийн төлөө өрсөлдлөө. Наадмын анхан шатны тэмцээнүүд их, дээд сургуулиуд дээр төрөл бүрийн хэлбэрээр 2023- 2024 оны хичээлийн жилийн эхнээс үргэлжлэн явагдаж, 40 орчим их, дээд сургууль дээр 9,000 орчим оюутнууд хамрагдан оролцож, наадмын шигшээ тэмцээнд оролцох тамирчидаа сонгон шалгаруулсан билээ.

Наадмын нээлтийн ёслолын ажиллагааг 2024 оны дөрөвдүгээр сарын 15-нд Спортын төв ордоны “А” зааланд явуулан, 33 их, дээд сургуулийн 2,000 гаруй оюутан залуучуудыг хамруулсан арга хэмжээг явуулсан. Наадмын шигшээ тэмцээнүүдийг дөрөвдүгээр сарын 15-24-нд хуваарийн дагуу сагсан бөмбөг, гандбол, чирлидинг, таеквондо, жүдо, чөлөөт бөх, футзал, волейбол, шатар, ширээний теннисний төрлөөр спортын 10 төрлийн холбоотой гэрээ байгуулан, тэмцээнийг амжилттай удирдан зохион байгуулав.

Тэмцээнийг спортын 10 барилга, байгуулууламжийг түшиглэн Спортын төв ордон, Футзалын ордон, “Оч” спорт клуб, “Зууны шатар” клуб, Баянгол дүүргийн спортын ордон, МУИС, МУБИС, ШУТИС, Мон-Алтиус, Үндэсний БТДС зэрэг их, дээд сургуулийн спортын ордон, заал, танхимыг түшиглэн явуулсан юм.

Наадмын спортын төрлийн болон нэгдсэн 11 удаагийн техникийн зөвлөгөөнийг Спортын төв ордонд хуваарийн дагуу хийн, спортын холбоод болон багш дасгалжуулагч нарыг оролцуулан, сугалааг явуулан, хөтөлбөрийг гарган ажилласан. Наадам нийтдээ 33 их, дээд сургуулийн 1,983 оюутан тамирчныг бүртгэн мандатыг олгосон ба багийн дасгалжуулагч, шүүгч, зохион байгуулагч, сайн дурын ажилтан, оюутан 600 хүн зохион байгуулалтын чиглэлээр ажилласан билээ.

Наадамд оролцсон сургуулиудын жагсаалт.

Аварга дээд сургууль
Анагаахын шинжлэх ухааны үндэсний их сургууль
Ач анагаах ухааны их сургууль
Боловсрол, соёл, эрх зүйн дээд сургууль
Глобал удирдагч дээд сургууль
Дотоод хэргийн их сургууль
Идэр их сургууль
Их засаг олон улсын их сургууль
Мандах их сургууль
Мон-Алтиус дээд сургууль
Монгол Германы хамтарсан ашигт малтмал технологийн их сургууль
Монгол улсын боловсролын их сургууль
Монгол улсын их сургууль
Монголын үндэсний их сургууль
Олон улсын Улаанбаатарын их сургууль
Отгонтэнгэр их сургууль
Рояаль олон улсын их сургууль
Санхүү эдийн засгийн их сургууль
Сити их сургууль
Төмөр замын дээд сургууль
Улаанбаатар эрдэм их сургууль
Үндэсний биеийн тамирын дээд сургууль
Үндэсний техникийн их сургууль
Хөдөлмөр нийгмийн харилцааны дээд сургууль
Хөдөө аж ахуйн их сургууль
Хүмүүнлэгийн ухааны их сургууль
Шинжлэх ухаан технологийн их сургууль
Шинэ анагаах ухааны их сургууль
Шинэ Монгол технологийн дээд сургууль
Шихихутаг хууль зүйн их сургууль
Эм ай Ю дээд сургууль
Эм зүйн шинжлэх ухааны их сургууль
Этүгэн их сургууль

Энэхүү наадам нь нийгмийн хариуцлагын хүрээнд наадмын бэлгэдэлээр дэлхийн ховор амьтан болох говийн “Мазаалай” баавгайг сонгон авч, наадмын бүх төрөлд бэлэгдэлийг зурж хийн, анонс, танилцуулга зэрэгт өргөнөөр оруулан ашигласан. Энэ ховор амьтаны талаар мэдээ, мэдээллийг оюутан залуучуудад хүргэх болон нийгэмд түлхүү ойлголт бий болгох, анхаарлыг хандуулах чиглэлээр ихээхэн ажил зохион байгуулсан.

Наадамд оролцсон тамирчдын дотор Монгол улсын нэрийг тив, дэлхий, 2020 оны Токиогийн олимпын тавцанд өргөн мандуулан оролцож байгаа олон улсын хэмжээний мастер, спортын мастер цол зэрэгтэй олон зуун залуу тамирчид оролцсоноороо чухал онцлоготой боллоо. Наадамд оролцсон чөлөөт бөх, жүдо бөхийн зарим тамирчид эх орноо төлөөлөн Парисын 2024 оны олимпын наадамд оролцох юм.

Наадмын 10 төрлийн тэмцээн бүр ихээхэн сонирхолтой, үзүүштэй сайхан болж, өрсөлдөөн ихтэй тоглолтууд зохиогдон, наадмын тэмцээнүүд өндөр түвшинд зохион байгуулагдсан.

Спортын тэмцээнээс гадна наадмын үеэр” Оюутны спорт, биеийн тамирын боловсрол-2024” эрдэм шинжилгээний хурал МУИС-ийн төв номын санд болж, 9 оюутан, 10 залуу судлаач багш гар оролцон илтгэлээ хэлэлцүүлсэн. Хурлын материалаар 80 хуудас эмхэтгэл хэвлүүлэн гаргасан.

Наадмын нэгдсэн дүнгээр эхний 1-6 дугаар байр эзэлсэн ИДС-д 1-6 сая төгрөг, цом, батламж, медалиар шагнасан ба доорх их, дээд сургуулиуд шагналт 6 байрт орлоо. Үүнд:

МУИС-42 оноо
Монгол Улсын боловсролын их сургууль-49 оноо
Шинжлэх ухаан технологийн их сургууль-51 оноо
Мон-Алтиус ДС-59 оноо
Үндэсний БТДС-81 оноо
“Их засаг” олон улсын их сургууль-96 оноо

Наадмын хаалтын ажиллагаа өчигдөр/2024.04.26/ Спортын төв ордонд болсон ба тус наадамд эхний зургаан байрт шалгарсан баг тамирчид оролцлоо. Наадмын хаалтын ёслолын арга хэмжээнд УИХ-ын гишүүн, УИХ дахь спортын лобби бүлгийн дарга Ц.Мөнхцэцэг Олимп, нийтийн биеийн тамир, спортын үндэсний хорооны ажлын албаны дарга Э.Тэмүүжин, наадмын ЗБХ-ны дарга, БТСУХ-ны даргын үүргийг түр орлон гүйцэтгэгч О.Баттулга, Ази тивийн оюутны спортын холбооны тэргүүн дэд Ерөнхийлөгч, наадмын ЗБХ-ны гишүүн, Монголын оюутны спортын холбооны Ерөнхий нарийн бичгийн дарга, гавьяат дасгалжуулагч, доктор Д.Жаргалсайхан, БШУЯ-ны дээд болон мэргэжлийн боловсролын бодлогын удирдлага, зохицуулалтын газрын ахлах мэргэжилтэн Э.Чойсүрэн, МУБИС-ийн ректор, доктор, профессор Ж. Батбаатар нарын зэрэг их, дээд сургуулийн захирал нар болон ЗБХ-ны гишүүд, МОСХ-ны Удирдах зөвлөлийн гишүүд, наадмын хөтөлбөрт орсон 10 Спортын төрлийн холбоодын удирдлагууд болон бусад хүндэт зочид, төлөөлөгчид хүрэлцэн ирж оролцсон.

Энэхүү наадмын тэмцээнээс шалгарсан баг тамирчдыг 2024 онд зохиогдох Ази тивийн болон Дэлхийн оюутны аварга шалгаруулах тэмцээн, 2025 онд явагдах дэлхийн оюутны Универсиад наадамд оролцуулах арга хэмжээг МОСХ-ноос зохион байгуулан ажиллана.

Энэхүү наадам нь оюутны дунд өмнө нь 2005, 2009, 2013, 2017, 2020-2022 онд явагдаж байсан. Мөн гадаадад суралцагч оюутан залуусын дунд ч зохиогдож ирсэн. Засгийн газрын 2018 оны 183 дугаар тогтоолын дагуу 2020 оноос эхлэн дэлхийн оюутны Универсиадын жишгийн дагуу Монголын оюутны спортын наадам хоёр жилд нэг удаа зохиогдохоор болсон ба дараагийн наадам 2026 онд буюу хоёр жилийн дараа болно.