Улаанбаатар хотын гэр хорооллыг дахин төлөвлөх төслийн хүрээнд Сэлбэ дэд төв орчимд иргэдийн хашааны газрыг чөлөөлж, орон сууцжуулахаар зөвшилцөл хийгдсэн. “Нийслэлийн орон сууцны корпораци” ХК-ийн мэдээлснээр Сэлбэ дэд төвийг түшиглэн орон сууцжуулах хүрээнд Сүхбаатар дүүргийн 14, Чингэлтэй дүүргийн 14, 18 дугаар хорооны гэр хорооллын 158 га газрын 2206 нэгж талбарыг чөлөөлж, дахин төлөвлөхөөр болсон билээ.

Оршин суугчдын хувьд газар чөлөөлөлтийн ажлыг дэмжин, хөрөнгийн үнэлгээнд хамтран ажиллаж байгаа ч яг хэдэн төгрөгөөр газрыг нь үнэлж авах эсэх хариу хүлээлттэй хэвээр байна. Бид энэ талаар Нийслэлийн Газар зохион байгуулалтын албаны Газар чөлөөлөлтийн хэлтсийн дарга н.Мөнхбаяраас тодрууллаа.

-Газар чөлөөлөлтийн ажил сар гаруйн хугацаанд үргэлжилж байна. Одоогийн байдлаар газар чөлөөлтийг дэмжээгүй 50 иргэн байгаа бол үлдсэн 1475 иргэн буюу оршин суугчдын 96 хувь нь газар чөлөөлөлтийг дэмжсэн. Хээрийн хэмжилт буюу хөрөнгийн үнэлгээг 1324 буюу нийт иргэдийн 59 хувьд нь хийсэн. Үнэлгээний тайлангууд хүлээлтийн байдалтай байна. Өнөөдрийн байдлаар 80 орчим тайлан ирснээс 56 иргэн зөвшөөрсөн, үлдсэн иргэдийн хувьд гэр бүлээрээ ярилцан шийдвэрт хүрнэ гэсэн хариу ирүүлсэн. Ерөнхийдөө газрын 1 м.кв-ийн үнэлгээг гурван янзаар гаргасан. Төв зам дагуух газрыг 1 м.кв-ыг 380 мянга, дараагийн түвшний байршилд 240 мянга, өндөрлөг хэсэгт байгаа айлын газрыг 1 м.кв-ыг нь 175 мянга гэсэн үнэлгээг мэргэжлийн байгууллагын ажилтнууд тогтоосон. Гуравдугаар сарын 6-ны өдрийн Засгийн газрын хуралдаанаар газар чөлөөлтийн тухай журам дэмжигдэн, гуравдугаар сарын 18-наас Сэлбэ дэд төвийн иргэдтэй ажиллах, ажлын хэсэг үйл ажиллагаагаа эхлүүлсэн. Түүнээс хойш айл өрхүүдийн 60 орчим хувьд хөрөнгийн үнэлгээ хийгдсэн байгаа учир ажил маань хурдацтай явж байна гэлээ.

Тодруулж хэлбэл, дээрх бүсэд амьдардаг иргэн 700 м2 газартай гэж бодоход 1 м.кв-ыг 380 мянган төгрөгөөр үнэлүүлэхэд 260 сая төгрөг болж буй. Иргэн энэхүү мөнгөө бэлнээр авч болно, аль эсвэл хашааны газраа орон сууцаар сольж болно. Харин орон сууц ашиглалтад орох хүртэл амьдрах байрных нь түрээсийн төлбөрийг нийслэлээс даах гэрээтэйгээр талууд харилцан тохиролцох боломжтой байгаа юм.

Б.ЭРДЭНЭЗАЯА