АНУ алсын тусгалт пуужинг Украинд нууцаар илгээв

Оросын түрэмгийллийн эсрэг АНУ-ын нууцаар илгээсэн алсын тусгалт баллистик пуужинг (ATACMS) Украин ашиглаж эхэлсэн гэж Цагаан ордны эх сурвалж мэдээлжээ. Уг пуужин нь гуравдугаар сард санаачилсан Жо Байдены 300 сая ам.долларын тусламжийн багцад багтсан бөгөөд энэ сард Украинд ирсэн байна. Мөн эзлэгдсэн Крым дэх Оросын объектуудад цохилт өгөхөд дор хаяж нэг удаа пуужинг ашигласан гэж АНУ-ын хэвлэлүүд мэдээлэв. Өмнө нь Украинд армийн тактикийн пуужингийн систем (ATACMS)-ийн дунд тусгалын хувилбарыг нийлүүлж байсан ч цэргийн бэлэн байдлыг алдагдуулах вий гэсэн болгоомжлолоос үүдэн илүү хүчирхэг зүйл илгээхээс татгалзаж байв. Гэвч, Байден өнгөрсөн хоёрдугаар сард 300 км зам туулах чадвартай алсын тусгалт пуужинг Украинд нууцаар илгээжээ. Түүнчлэн, Байден дөрөвдүгээр сарын 24-нд дахин 61 тэрбум ам.долларын тусламжийн багцыг баталлаа.

Төрийн департментын хэвлэлийн төлөөлөгч Ведант Пател" АНУ-ын ерөнхийлөгчийн заавраар ATACMS пуужингийн системийг Украинд илгээсэн гэх мэдээлэл үнэн. Энэ тухай Украины аюулгүй байдлын хүсэлтийн дагуу нууцалж байсан" гэж мэдэгджээ.

Нууцаар илгээсэн пуужинг өнгөрсөн долоо хоногт Крым дэх Оросын агаарын баазад цохилт өгөхөд ашигласан гэж "Reuters" агентлаг мэдээлэв. Харин шинээр ирсэн пуужингуудыг Бердянск боомт хотын орос цэргүүдэд Мягмар гаригт цохилт өгөхөөр ашигласан гэж "New York Times" сонин мэдээлсэн байна. Сүүлийн саруудад Киевийн зэвсгийн нөөц шавхагдаж, Орос тогтмол ашиг олж байгаа тул барууны орнуудаас тусламж хүсэх хүсэлтээ улам нэмэгдүүлсээр байна. Тусламжийн шинэ багц нь Конгресс дахь зарим хүмүүсийн эсэргүүцэлтэй олон сар тулгарсан ч батлагдаж, Зеленский талархсан сэтгэлээ илэрхийлжээ. "Энэ нь Америк болон дэлхийг илүү аюулгүй болгоно" гэж Байден мэдэгдсэн байна.

Эх сурвалж: BBC