Ховдын хүчирхэг баг Баян-Өлгийн хүчтэнүүдийг илт давуу ялжээ

Монголын үндэсний бөхийн холбооны "Алтан цом"-ын төлөөх шигшээ найман багийн дөрөв дэх барилдаан Ховд, Баян-Өлгий аймгуудын хооронд өрнөж, Ховд аймгийн баг 19:6-аар илт давуу ялалт байгуулснаар шөвгийн дөрвөн багт шалгарч үлдэв.

Ховд аймгийн багт улсын аварга О.Хангай /5/, улсын заан Б.Пүрэвсайхан /4/, улсын заан Б.Бат-Өлзий /5/, аймгийн арслан М.Баяржавхлан /3/, аймгийн арслан У.Батцоож /2/, нийт 19 даваа авсан бол Баян-Өлгий аймгийн баг улсын заан Б.Серик /3/, улсын өсөх идэр начин Н.Мустафа /0/ гуравдугаар тойргоос сэлгээнд сууж, түүний оронд орж барилдсан аймгийн арслан Б.Төмөрбаатар /0/, аймгийн хурц арслан У.Береке /1/, аймгийн хурц арслан М.Еркебулан /1/, дөрөвдүгээр тойргоос сэлгээнд сууж, түүний оронд орж барилдсан аймгийн арслан аймгийн арслан Т.Эрболат /0/ аймгийн заан Е.Көптилек /1/ нийт 6 даваа авлаа.

Ховд аймгийн багийн дасгалжуулагчаар улсын харцага Г.Алтангэрэл, Баян-Өлгий аймгийн багийн дасгалжуулагчаар улсын начин Б.Баатарцол нар ажилласан юм.

Ялсан Ховд аймгийн баг шөвгийн дөрөвт шалгарч 20 сая төгрөгийн шагналын болзол биелүүлсэн бол ялагдсан буюу наймд шалгарсан баг таван сая төгрөгийн шагналаа гардлаа.