Чингэлтэй дүүргийн 15 дугаар хорооны нутаг дэвсгэр Хайлаастын замд хоёр хоногийн өмнө /2024.04.17/ зургаан хүүхэд, нэг том хүн мөргөсөн зам тээврийн ноцтой осол гарсан. Ослоор 16 настай охин яаралтай тусламж авч чадалгүй нас барсан. Мөн хамт явсан 13 настай эрэгтэй хүүхдийн шилбэний яс хугарсан, мөн нэг хүүхдийн хоёр талын дунд чөмөгний хугарсан, 40 настай эмэгтэй тархины битүү гэмтэл авсан, 11 настай эрэгтэй хүүхдийн чөмөг хугарсан, 12 настай эрэгтэй хүүхэд тархины гэмтэл, найман настай эрэгтэй хүүхэд толгойдоо гэмтэл авсан юм. Эдгээр хүмүүс ГССҮТ-д эмчлүүлж байна.

Гэмтэл согог судлалын үндэсний төвөөс өгсөн мэдээллээр, авто ослын улмаас бэртэл гэмтэл авсан нийт зургаан иргэн буюу нэг том хүн, таван хүүхэд яаралтай тусламжийн тасагт тусламж үйлчилгээ авсан.

Одоогийн байдлаар нэг том хүн, хоёр хүүхэд "Эрчимт эмчилгээний тасаг"-т хэвтэн эмчлүүлж байна.

Мөн хоёр хүүхэд "Хүүхдийн мэс заслын тасаг"-т, нэг хүүхэд "Толгойн мэс заслын тасаг"-т хэвтэн эмчлүүлж байна. Эрүүл мэндийн байгууллагын зүгээс үйлчлүүлэгчдийн биеийн байдлыг тогтворжуулах, нарийн мэргэжлийн үзлэг оношлогоог хийсэн бөгөөд шаардлагатай тусламж үйлчилгээг цаг алдалгүй үзүүлж байна.