Нигерийн цэргүүд 10 жилийн өмнө Чибок хотод хулгайлагдсан залуу эмэгтэйг аварсан гэж мэдэгдлээ. Тодруулбал,  2014 оны дөрөвдүгээр сарын 14-ний өдөр Борно хотын нэгэн дунд сургуулиас лалын босогч Боко Харам бүлэглэл 275  охиныг хулгайлжээ. Уг хэрэг  дэлхий нийтийг цочирдуулж, олон улсын  хэмжээнд #BringBackOurGirls кампанит хөдөлгөөнийг үүсгэсэн  ба АНУ-ын Тэргүүн хатагтай асан Мишель Обама оролцож байсан.

Охидын 100 гаруй  нь олзлогдсон эсвэл сураггүй алга болсон гэж мэдээлж байв. Тэгвэл  Нигерийн арми Пүрэв гаригт залуу эмэгтэйг гурван хүүхдийн хамт аварсан гэж мэдэгджээ.

Тэрбээр аврагдах үедээ таван сартай жирэмсэн байсан ба Чибок дахь Пэми хотоос иржээ. Бусад хулгайлагдсан 180 гаруй охид зүүн хойд нутгийн Борно мужийн Самбиса ойд байрлах Боко Харам бүлэглэлийн нуугдаж байсан газраас зугтсан эсвэл суллагдаж чадсан. Тэдний зарим нь гэртээ ирэх үедээ жирэмсэн эсвэл хүүхэдтэй болсон байжээ. Нигерт хүн хулгайлах гэмт хэрэг жилээс жилд нэмэгдсэн хэвээр байна. Хулгайн  бүлэглэлүүд ихэвчлэн оюутнуудыг золиослохын тулд сургуулиудыг онилдог. Хүүхдийг Ивээх Сангийн мэдээлснээр 2014 оноос 2022 оны эхэн хүртэл  1680 гаруй сурагч хулгайлагдсан. Өнгөрсөн сард баруун хойд Кадуна мужид 130 гаруй хүүхдийг сургуулиас нь зэвсэгт этгээдүүд барьцаалсан.

Уг хэрэг сүүлийн жилүүдэд тохиолдож байгаагүй томоохон хулгайн гэмт хэрэг болсон юм. Нигерийн арми бүх сурагчдыг хэдхэн долоо хоногийн дараа хөрш Замфара мужид цэргүүд аварсан гэж мэдэгдсэн ч ажиллагааны талаар тодорхой мэдээлэл гараагүй байна.

Эх сурвалж: BBC