"Dev Hackathon 2024" тэмцээн энэ сард болно

Шинжлэх ухаан технологийн их сургууль /ШУТИС/-ийн Мэдээлэл, холбооны технологийн сургуулиас жил бүр уламжлал болгон зохион байгуулдаг “DEV HACKATHON 2024” тэмцээн энэ сарын 27, 28-ны өдрүүдэд Монгол Улсын нийт их, дээд сургуулиудын дунд зохион байгуулагдах гэж байна. Хакатон нь технологиор дамжуулан өөрийгөө илэрхийлэх, бүтээлч сэтгэлгээгээ бусадтай хуваалцах боломжийг олгодог зохион байгуулалт бүхий хурал, цугларалт, үйл ажиллагаа бөгөөд техникийн суурь мэдлэгтэй хүмүүс цуглаж, ямар нэгэн асуудал эсвэл санаан дээр үндэслэн баг бүрдүүлж, оновчтой шийдлийг програмчладаг /код бичдэг/. Хакатон /Hackathon/ = Hack /юмыг яаж хурдан хугацаанд ухаалгаар шийдэх/ + Marathon /тэсвэр тэвчээртэй байж аливаа зүйлийг түргэн хугацаанд хийх/ гэсэн утгатай.

Хакатон хөгжүүлэгч, дизайнер, төслийн менежер, системийн шинжээч гэх мэт хүмүүсээс баг бүрддэг. Оюутан залуусын мэдлэг боловсрол бүтээлч сэтгэлгээг хөгжүүлэх, нийгмийн идэвх оролцоог нэмэгдүүлэхэд чиглэсэн тэмцээн бөгөөд залуучууд тэмцээнд оролцож өөрсдийгөө сорьж үзэхийг хүсч байна.