Төрийн ордонд эмийн үнийн өсөлтийн нөхцөл байдлыг нотлох, баримтыг шинжлэн судлах нээлттэй сонсгол өнөөдөр /2024.04.17/ гурав дахь өдрөө үргэлжлээд дуусна. Нээлттэй сонсгол эмийн хүртээмж, эмийн үнэ ба шалтгаан нөхцөл, эмийн бүртгэл болон чанарын хяналт гэсэн гурван сэдвийн хүрээнд энэ сарын 17-ныг дуустал үргэлжлэх бөгөөд гурван өдөр нийт 127 гэрчийг дуудаж сонсох юм.
Гэтэл сонсголын үеэр эмийн компанигүй, энэ чиглэлээр бизнес эрхэлдэггүй иргэдийн овог нэрийг ашиглан олон нийтэд худал мэдээлэл өгсөн талаар зарим хүмүүс олон нийтийн сүлжээнд тайлбар, залруулга бичжээ.
Тэдний нэг болох М.Цолмон 36 жил эрүүл мэндийн салбарт ажиллаж байгаад тэтгэвэрт гарсан байна. Гэвч тэрбээр нээлттэй сонсголоор өөрийг нь гүтгэсэн мэдээлэл олон нийтэд өгсөнд гомдолтой байгаагаа хэлсэн юм. "Хаанаас ямар мэдээлэл авч, гаргаж тавьсныг мэдэхгүй байна. Надаас хэн ч юу ч асуугаагүй. Яг над шиг гүтгүүлсэн нэлээд олон хүн байна. Бид нийлж гомдол гаргана. Өөртөө итгэж ядаад opendatalab.mn тухайн аж ахуйн нэгжтэй хэрхэн яаж хамааралтай болдогоо шалгахад юу ч алга.
Нээлттэй сонсголын шинжээч нар нь маш муу ажилласан байна. Миний нэрний ард аж ахуйн нэгжийн регистрийн дугаар тавьсан байсан. Тэр аж ахуйн нэгжийн мэдээллийг хаанаас авсан, хэн ямар хамааралтайг нь сайн тодруулах хэрэгтэй шүү дээ.
Эмийн шинжээч гэдэг эмийн мэргэжилтэй хүмүүс ямар нэгэн тушаалаар томилогдон хийдэг байх. Гэтэл эмийн мэргэжлийн бус, бас яаманд ямар нэгэн албан тушаал хашдаггүй, эмтэй ямар ч холбоогүй хүн эмийн шинжээч болчихсон байдаг. Тэр томилсон тушаал нь хаана байна. Шинжээч маш их хуудуутай шинжилсэн" гэв.
Мөн иргэн Б.Сонинхүү "Би эмч мэргэжилтэй. Эмийн холбогдолтой ямар нэгэн бизнес эрхэлдэггүй, урьд өмнө нь эрхэлж ч байгаагүй. Нээлттэй сонсголын үеэр нэр нь дурдагдсан "Бат говь хангай " гэдэг компанийн тухай огт мэдэхгүй, тэтгэвэрт гараад долоон жил болж байна. Миний нэрийг олон нийтийн мэдээллийн хэрэгслээр үндэслэлгүйгээр эмийн бизнес эрхэлдэг компанитай ашиг сонирхолын хамааралтай гэж зарласан тул гомдолтой байна. Цаашид хувь хүнийхээ үүднээс зохих байгууллагад нь хандаж гомдол гаргана" гэсэн юм.
Яг ийм утга агуулгатай маш олон коммент сошиал орчинд өрнөсөн. Шинжээчдийн хэлж, танилцуулаад байгаа хүмүүс өөрсдийн сошиал хаягтаа "гүтгүүлсэн, нэр төрд халдсан" гэсэн тайлбаруудыг хийж эхэллээ. Угтаа бол сонголын шинжээчид маш удаан хугацаанд судалж, шинжилж, тулгаж олон нийтэд нээлттэй хүмүүсийн овог нэр, албан тушаал, аж ахуй нэгжүүдийн нэрсийг зарлах учиртай. Гэвч нийгмийн сүлжээнд бичигдсэн эдгээр зүйлсийг анзаарвал нэг бол тэд өөрсдийгөө хамгаалах зорилго агуулсан эсвэл Ж.Чинбүрэн гишүүн хүн гүтгэж, хүний нэр төрд халдсан болох нь.
Тиймээс Эмийн сонсголыг зохион байгуулахаар удаан хугацаанд ажилласан түр хорооны дарга Ж.Чинбүрэн гишүүнээс асууя, та болон түр хорооныхон хүн гүтгэж байгаа юу эсвэл гэдэгт тайлбар өгөх нь зөв болов уу.
Холбоотой мэдээ