Гүржийн засгийн газар "Гадаадын нөлөөг ил тод болгох тухай" хуулийн төслийг өргөн барихаа энэ сард зарласан. Тус хуулийн төслийг өнгөрсөн жил анх өргөн барьсан боловч иргэд эсэргүүцэж, гудамжинд жагссан билээ. Тэгвэл Гүржийн нийслэл Тбилисид өчигдөр олон мянган хүн жагсч, маргаантай хуулийн төслөө эргүүлэн татахыг шаардав. Уг хуулийг хөрш зэргэлдээ орнууд болон тэрс үзэлтнүүдийг дарахын тулд ашигладаг ОХУ-ын авторитар хуулиас санаа авч зохиосон гэж үзэж байна.

Парламентын ордны гадаа жагсагчид цугларч, Европын холбоо болон Гүржийн төрийн далбааг намируулан, "Оросын хуульд үгүй гэж хэлье" гэж хашгирч байв.

Жагсагч иргэн хэлэхдээ "Бид эрх чөлөөнийхөө төлөө тэмцэж байна. Бид гэрэлт ирээдүй хүсч байна. Энэ бол энд амьдардаг хүн бүрийн үүрэг хариуцлага" гэжээ.

Хуулийн төсөлд зааснаар санхүүжилтийнхээ 20-иос дээш хувийг гадаадын улсаас авдаг төрийн бус байгууллага, хэвлэл мэдээллийн хэрэгслүүдийг "Гадаад гүрний ашиг сонирхолд үйлчилдэг байгууллага” гэж бүртгүүлэх ёстой. Гадаадаас санхүүжилт авдаг байгууллагуудын санхүүгийн ил тод байдлыг хангахын тулд ийм хууль шаардлагатай гэж Гүржийн ерөнхий сайд Ираклий Кобахидзе хэлжээ.

Гэвч сөрөг хүчний намууд уг хуулийн төсөлд шүүмжлэлтэй хандаж байна. Хуулийн төслөөр дамжуулан Гүрж дэх шүүмжлэгчдийн дуу хоолойг дарж, Европын холбоонд элсэх боломжид саад хийнэ гэж тэд үзжээ. Энэ Путины ОХУ-д өргөн барьсан хуультай ижил байгаа аж. Тиймээс "Гүрж дахин Зөвлөлтөд бууж өгөхгүй!" гэж барууны талыг баримтлагчид үзэж байна.

Эх сурвалж: BBC