Тойм: Онцгойгийн алба хаагч амиа алдаж, Сүхбаатарын засаг дарга саатуулагдав

Ньюс агентлаг өнгөрч буй долоо хоногт болсон онцлох үйл явдлуудыг тоймлон хүргэж байна.

АМИА АЛДСАН АЛБАН ХААГЧ ХҮСЭЛТ ТАВЬСАН Ч ТЭТГЭВЭРТ НЬ ГАРГААГҮЙ

Чингэлтэй дүүргийн 20 дугаар хороо “Миний” сүлжээ дэлгүүрийн агуулахын байранд Даваа гаригт гал гарч, Гал түймэр унтраах, аврах 10, 14, 26, 29 дүгээр анги, нийслэлийн Аврах ангийн алба хаагчид үүрэг гүйцэтгэн ажиллалаа. Харамсалтай нь Аврах 10-р ангийн алба хаагч ажил үүргээ гүйцэтгэж байгаад нас барсан. Энэ талаар Нийслэлийн Онцгой байдлын газраас мэдээлэл хийсэн.

Онцгой байдлын албаны төлөөлөл "Нийслэлийн Чингэлтэй дүүргийн 20 дугаар хорооны нутаг дэвсгэрт гал түймэр гарсан дуудлагаар онцгой байдлын алба хаагчид үүрэг гүйцэтгэсэн. Гал түймэрт 10х18 харьцаатай гурван давхар барилга өртсөн. Манай алба хаагчид 12.40 цагт галын тархалтыг зогсоож, нийт долоон ангийн 100 гаруй алба хаагч үүрэг гүйцэтгэлээ. Бид 15.00 цагт галыг бүрэн зогсоож, хууль хяналтын байгууллагууд үзлэг хийж байна.

Харамсалтайгаар нэг алба хаагч үүргээ гүйцэтгэж байгаад амь насаа алдлаа. Алба хаагчийнхаа ар гэр, хамт олонд гүн эмгэнэл илэрхийлье" гэсэн юм.

АХБ: 2025 ОНД ХӨДӨӨ АЖ АХУЙ, УУЛ УУРХАЙН САЛБАР СЭРГЭНЭ

Азийн хөгжлийн банкнаас Монгол Улсын эдийн засгийн өсөлтийн төсөөлөл, цаашдын төлөвийг танилцуулсан.Монгол Улсын эдийн засаг 2024 онд 4.1 хувь, 2025 онд зургаан хувиар өснө гэж Азийн хөгжлийн банкнаас тооцоолжээ. Тодруулбал, 2023 онд ашигт малтмалын олборлолт өсч, экспорт нэмэгдсэнээр төлбөрийн урсгал тэнцэл болон төсвийн тэнцэл ашигтай гарч, гадаад валютын улсын нөөц сайжран, Монголын эдийн засаг эрчимтэй өссөн гэдгийг албаныхан онцлов.

Инфляцийн түвшин өмнөх оноос буурсан хэдий ч өндөр хэвээр байна.

Уул уурхайн салбарын өсөлт, түүний дотор зэсийн баяжмалын үйлдвэрлэлээ нэмэгдүүлэх хүлээлттэй байгаа Оюу толгойн уурхай нь эдийн засгийн 2024, 2025 оны өсөлтөд гол түлхэц үзүүлнэ гэж таамаглаж байгааг танилцууллаа.

Азийн хөгжлийн банкны тайланд 2023 онд долоон хувийн өсөлттэй байсан Монгол Улсын эдийн засаг 2024 онд 4.1 хувиар өснө гэж тооцоолсон байна. Эдийн засгийн 2024 оны өсөлтөд уул уурхайн салбар болон төсвийн зардлын өсөлт эергээр нөлөөлөх ч, улсын хэмжээнд сүүлийн жилүүдэд тохиогоогүй хатуу өвөл, зудын гамшиг нүүрслэснээс шалтгаалж хөдөө аж ахуйн салбар агших төлөвтэй байна. Харин 2025 онд хөдөө аж ахуйн салбар сэргэж, уул уурхай болон үйлчилгээний салбар өссөнөөр ДНБ-ий өсөлт хурдасч, зургаан хувьд хүрнэ гэж таамаглажээ.

АТГ: СҮХБААТАРЫН ЗАСАГ ДАРГА УИХ-ЫН ГИШҮҮНД ДАВУУ БАЙДАЛ БИЙ БОЛГОСОН

Сүхбаатар аймгийн Засаг дарга М.Идэрбат, тус аймгийн ИТХ-ын дарга Д.Хосбаяр нарыг Авлигатай тэмцэх газраас шалгаж байсан бөгөөд тэднийг 72 цаг саатуулжээ. Тэднийг АТГ-аас энэ сарын 8-ны өдрөөс эхлэн дуудаж, шалгаж байсан бөгөөд 72 цагийн хугацаатай саатуулсан гэж эх сурвалжууд мэдээлэв.Тэднийг яллагдагчаар татах хүсэлтээ хуулийн байгууллагад өгчээ.

Сүхбаатар аймгийн орон нутгийн сонгуульд 2020 оны УИХ-ын сонгуульд АН ялалт байгуулж, тус аймгийг Ардчилсан намынхан удирдаж байсан юм.

Сүхбаатар аймгийн Засаг дарга М.Идэрбат, тус аймгийн ИТХ-ын дарга Д.Хосбаяр нараас гадна Э.Төгөлдөр, Эрдэнэбат нарын хүмүүсийг саатуулсан гэсэн мэдээлэл байна.

Шалгалтын ажиллагааны хүрээнд Сүхбаатар аймгийн Засаг дарга нь нэр бүхий УИХ-ын гишүүний үеэл дүүгийн эзэмшлийн Сүхбаатар аймгийн Баруун-Урт сумын гуравдугаар багийн нутаг дэвсгэрт байрлалтай 6700 м.кв болон 1359 м.кв хэмжээтэй хоёр байрлал бүхий газрын зориулалтыг Газрын тухай хууль, Газар эзэмших, ашиглах эрхийн гэрчилгээ олгох журмыг зөрчиж, зориулалтыг нь өөрчилж бусдад давуу байдал бий болгосон байж болзошгүй.